கோலாலம்பூர்:
இந்தியாவைச் சேர்ந்த மகளிர் சுகாதாரப் பராமரிப்பு நிறுவனமான Femi9 International, மலேசியாவில் தனக்குக் கிடைத்துவரும் வரவேற்பைத் தொடர்ந்து, இந்நாட்டில் தனது சந்தையை மேலும் விரிவுபடுத்தத் திட்டமிட்டுள்ளது.
Femi9 மலேசியாவின் தலைமைச் செயல்முறை அதிகாரி சுரேஷ் தனசாகரன் கூறுகையில், தற்போது 15 நாடுகளில் தனது தயாரிப்புகளை அறிமுகப்படுத்தியுள்ள இந்நிறுவனம், தென்கிழக்காசிய சந்தையில் தனது இருப்பை வலுப்படுத்தும் முயற்சியில் ஈடுபட்டுள்ளதாகத் தெரிவித்தார்.
மலேசியாவில் Femi9 நிறுவனத்தை அறிமுகப்படுத்தி விரிவுபடுத்தும் முயற்சிக்கு அதன் நிறுவனர் டாக்டர் கோமதியும் ஆதரவளித்து வருவதாக அவர் குறிப்பிட்டார். இதன் ஒரு பகுதியாக, சுமார் இரண்டு வாரங்களுக்கு முன்பு டாக்டர் கோமதி நாடு முழுவதும் பயணம் மேற்கொண்டு நிறுவனத்தின் தயாரிப்புகளையும் அதன் நோக்கத்தையும் அறிமுகப்படுத்தினார்.
Asian Influential Award 2026 விருது நிகழ்ச்சியில் பங்கேற்கக் கிடைத்த வாய்ப்பு, Femi9 International நிறுவனத்திற்கும் அதன் நிறுவனருக்கும் கிடைத்த பெருமைமிகு அங்கீகாரம் என்று சுரேஷ் தெரிவித்தார்.
இந்த நிகழ்ச்சி, வணிகத் துறையில் புதிய தொடர்புகளை ஏற்படுத்தவும், நிறுவனத்தின் வணிக வலையமைப்பை விரிவுபடுத்தவும் சிறந்த வாய்ப்பாக அமைந்துள்ளதாகவும் அவர் கூறினார்.
Femi9 நிறுவனம் பெண்களின் சுகாதாரப் பராமரிப்புக்கான தயாரிப்புகளில், குறிப்பாக பெண்களின் தனிப்பட்ட சுகாதாரத் தேவைகளைப் பூர்த்தி செய்யும் தயாரிப்புகளில் கவனம் செலுத்தி வருகிறது. பெண்களுக்குப் பயனளிக்கும் தரமான தயாரிப்புகளை வழங்குவதுடன், அவற்றை அதிகமான நுகர்வோரிடம் கொண்டு சேர்ப்பதும் நிறுவனத்தின் முக்கிய நோக்கமாகும்.
பெண்களுக்கான சுகாதாரப் பராமரிப்புப் பொருட்களுடன், குழந்தைகளுக்கான டயப்பர் தயாரிப்புகளையும் நிறுவனம் தனது தயாரிப்பு வரிசையில் இணைத்துள்ளது.
இதனிடையே, டாக்டர் கோமதி சுமார் 40 ஆண்டுகளாகத் தொழில்முனைவோர் துறையில் பெற்றுள்ள அனுபவமும் Femi9 நிறுவனத்தின் வளர்ச்சிக்கு முக்கியப் பங்களிப்பாக அமைந்துள்ளதாக சுரேஷ் குறிப்பிட்டார்.
தனது நீண்டகாலத் தொழில் பயணத்தில் 100-க்கும் மேற்பட்ட விருதுகளைப் பெற்றுள்ள டாக்டர் கோமதி, சர்வதேச அளவிலான நிகழ்ச்சிகளிலும் உரையாற்ற அழைக்கப்பட்டுள்ளார். மேலும், அவரது தொழில்முனைவோர் அனுபவங்களும் சாதனைகளும் இந்தியாவில் வணிக நிர்வாக முதுநிலை (MBA) பாடத்திட்டத்திற்கான பாடநூலிலும் இடம்பெற்றுள்ளதாக அவர் தெரிவித்தார்.
டாக்டர் கோமதி இந்தியக் குடியரசுத் தலைவரிடமிருந்தும் விருது பெற்றுள்ளதுடன், கர்நாடக மாநில அரசிடமிருந்து சுற்றுச்சூழலுக்கு உகந்த தயாரிப்புகள் தொடர்பான அங்கீகாரத்தையும் பெற்றுள்ளார்.
ஏற்கெனவே பல்வேறு விருதுகளையும் அங்கீகாரங்களையும் பெற்றிருந்தாலும், Asian Influential Award 2026 அங்கீகாரம் அவருக்கு மேலும் சிறப்பான ஒன்றாக அமைந்துள்ளதாக சுரேஷ் கூறினார்.
இந்த விருது நிகழ்ச்சியின் வாயிலாகக் கிடைக்கும் புதிய வணிகத் தொடர்புகள், மலேசியாவில் Femi9 நிறுவனத்தின் சந்தையை விரிவுபடுத்துவதுடன், தென்கிழக்காசிய பிராந்தியத்தில் அதன் வளர்ச்சியையும் வலுப்படுத்தும் என அவர் நம்பிக்கை தெரிவித்தார்.
0 Comments