கோலாலம்பூர்: கிழக்கு கடற்கரை ரயில் இணைப்பு (ஈ.சி.ஆர்.எல்) போன்ற மெகா திட்டங்களில் பணியாற்ற உள்ளூர் தொழிலாளர்களுக்கு முன்னுரிமை அளிக்கும் பட்சத்தில், கோவிட் -19 க்கு பிந்தைய வேலையின்மை பிரச்சினைகளுக்குத் தீர்வு காண முடியும் என மனிதவள அமைச்சர் டத்தோஸ்ரீ எம். சரவணன் தெரிவித்துள்ளார்.
நாட்டில் வேலையின்மை பிரச்சினைக்குத் தீர்வு காண அமைச்சகம் மேற்கொண்ட நடவடிக்கைகளில், இந்த ஆண்டு இறுதி வரை சில துறைகளில் அந்நியத் தொழிலாளர்களைச் சேர்ப்பதை முடக்குவதன் மூலம், வெளிநாட்டு தொழிலாளர்களின் ஈடுபாட்டைக் குறைக்க இயலும் என அமைச்சர் கூறினார்.
இதுபோன்ற சூழ்நிலையில், ஈ.சி.ஆர்.எல் மற்றும் பிற திட்டங்கள் உள்ளூர் தொழிலாளர்களுக்கு இடமளிக்கும் என்றும், வேலை தேவையைப் பூர்த்தி செய்ய மறைமுகமாக அவர்களுக்கு வாய்ப்பளிக்கும் என்றும் தாம் நம்புவதாக இன்று நாடாளுமன்றக் கேள்வி நேரத்தின்போது அமைச்சர் சரவணன் விளக்கினார்.
DOSM இன் புள்ளிவிவரங்களின் அடிப்படையில் மலேசியாவில் வேலையின்மை விகிதம் 5.3% ஆக இருந்தது, ஏப்ரல் மாதத்தில் 5% ஆக இருந்தது என்று சரவணன் கூறினார்.
வேலையின்மை விகிதம் 3.5% முதல் 5.5% வரை இருக்கும் என்று DOSM கணித்துள்ளது என்று அவர் கூறினார்.
மோசமாகப் பாதிக்கப்பட்டுள்ளதாக அடையாளம் காணப்பட்ட துறைகளில் சுற்றுலா, சேவைகள், உற்பத்தி மற்றும் சுயதொழில் செய்பவர்கள் அடங்குவர். இது பெரும்பாலும் சிறு வணிகங்களை உள்ளடக்கியது.
இயக்க கட்டுப்பாட்டு ஒழுங்கு (எம்.சி.ஓ) காரணமாக வேலைகள் மற்றும் வருமான ஆதாரங்களை இழக்கும் அபாயத்தில் அவை உள்ளன என்று சரவணன் மேலும் கூறினார்.
2.4 மில்லியனுக்கும் அதிகமான தொழிலாளர்களுக்கு உதவுவதற்கும், 11 மில்லியன் மலேசியர்களின் நிதிச் சுமையைக் குறைக்க உதவுவதற்கும், கோவிட் -19 தொற்றுநோயின் தாக்கத்திலிருந்து போராடும் 300,000 க்கும் மேற்பட்ட நிறுவனங்களுக்கு கூடுதல் ஆதரவளிப்பதற்கும் பிரிஹாத்தின் போன்ற பல பொருளாதாரத் திட்டங்களை அரசாங்கம் உருவாக்கியுள்ளது!
0 Comments