loader

All News

 

செக் குடியரசு நாட்டை சேர்ந்த பெண் கிராமிய பாடகி ஹனா ஹொர்கா. 57 வயதான இவர் கொரோனா தடுப்பூசிக்கு எதிரான இயக்கங்களால் ஈர்க்கப்பட்டுள்ளார். இதனால், ஹனா ஹெர்கா தடுப்பூசி செலுத்திக்கொள்ளவில்லை.

அதேவேளை அவரது கணவர் மற்றும் மகன் ஜென் ரீக் ஆகிய இருவரும் தடுப்பூசி செலுத்திக்கொண்டுள்ளனர். தனது தாயிடம் தடுப்பூசி செலுத்திக்கொள்ளுமாறு ரீக் தொடர்ச்சியாக வலியுறுத்தி வந்துள்ளார்.

ஆனால், ஹனா ஹொர்கா தடுப்பூசி செலுத்திக்கொள்ள விரும்பவில்லை. தடுப்பூசி செலுத்திக்கொள்வதை விட கொரோனா வருவதே மேல் என அவர் கூறியதாக ரீக் தெரிவித்துள்ளார்.

செக் குடியரசில் தியேட்டர் போன்ற பொது இடங்களுக்கு செல்ல தடுப்பூசி செலுத்தி இருக்க வேண்டும் அல்லது கொரோனா பாதிப்பில் இருந்து குணமடைந்ததற்கான சான்றிதலை வைத்திருக்க வேண்டும்.

இதற்கிடையில், ஹனா ஹொர்காவின் கணவருக்கும், மகன் ரீக்கிற்கும் கடந்த சில நாட்களுக்கு முன்னர் கொரோனா தொற்று ஏற்பட்டுள்ளது. இதையடுத்து, இருவரும் தனிமைப்படுத்திக்கொண்டனர்.

ஆனால், ஹனா ஹெர்க்கா தனது கணவர் மற்றும் மகனுடன் எந்த வித பாதுகாப்பு வழிமுறைகளையும் பின்பற்றாமல் தொடர்பில் இருந்துள்ளார். அவர்களுடன் முகக்கவசம் அணியாமலும், கொரோனா தடுப்பு நெறிமுறைகளை பின்பற்றாமலும் தொடர்பில் இருந்துள்ளார்.

தனக்கு கொரோனா வந்ததும் அந்த பாதிப்பில் இருந்து குணமடைந்து அதன்பின்னர் தியேட்டர் போன்ற பொதுஇடங்களுக்கு செல்லலாம் என அவர் நினைத்துள்ளார்.

தடுப்பூசி செலுத்துவதற்கு எதிரான மனநிலையில் இருந்த ஹனா இந்த விபரீத முடிவை எடுத்துள்ளார். கணவரும், மகனும் தொடர்ந்து எச்சரிக்கை விடுத்தும் ஹனா அதை கண்டுகொள்ளவில்லை.

இந்நிலையில், கணவர் மற்றும் மகனை தொடர்ந்து ஹனாவுக்கு கடந்த சில நாட்களுக்கு முன்னர் கொரோனா தொற்று உறுதியாகியுள்ளது.

இதனால், அவர் வீட்டிலேயே தனிமைப்படுத்திக்கொண்டிருந்தார். ஆனால், கடந்த சில நாட்களுக்கு முன்னர் ஹனாவுக்கு உடல்நிலை மிகவும் மோசமாகியுள்ளது. கொரோனாவின் கோரப்பிடியில் சிக்கிய ஹனா கடந்த ஞாயிற்றுக்கிழமை தனது வீட்டில் உயிரிழந்தார்.

உயிரிழப்பதற்கு இரண்டு நாட்களுக்கு முன்னர் ஹனா தனது சமூகவலைதள பக்கத்தில், நான் குணமடைந்துவிட்டேன். இது (கொரோனா) தீவிரமானது. ஆகையால், தற்போது தியேட்டர் செல்வது முக்கியமானது. கடல் பயணம் தற்போது மிகவும் முக்கியம்’ என பதிவிட்டுள்ளார்.

கொரோனா பாதிப்பால் தனது தாயார் உயிரிழக்க கொரோனா தடுப்பூசிக்கு எதிரான பிரசாரமே காரணம் என ஹனாவின் மகன் ரீக் குற்றஞ்சாட்டியுள்ளார்.

கொரோனாவை வேண்டுமென்றே வரவைத்த பாடகி ஹனா உயிரிழந்த சம்பவம் செக் குடியரசு நாட்டில் பெரும் பரபரப்பை ஏற்படுத்தியுள்ளது!

 

வட கொரியாவில் மக்கள் பொது இடங்களில் சிரிப்பதற்கும் மது அருந்துவதற்கும் 11 நாட்கள் தடைவிதிக்கப்படுள்ளது. கிம் ஜாங் இல் அவர்களின் நினைவு தினத்தை ஒட்டி அரசு இந்த அறிவிப்பை வெளியிட்டிருக்கிறது. கிம் ஜாங் இல் 1994 முதல் டிசம்பர் 17 , 2011, தனது மரணம் வரை வடகொரியாவின் அதிபராக இருந்தார். தற்போதைய வட கொரியா அதிபர் கிம் ஜாங் உன்னின் தந்தை கிம் ஜாங் இல் என்பது குறிப்பிடத்தக்கது. இல் -ன் 10 வது ஆண்டு நினைவு தினத்தை அனுசரிக்க 11 நாட்கள் துக்கம் கடைப்பிடிக்க, நாட்டு மக்கள் அறிவுறுத்தப்பட்டுள்ளனர்.

மக்கள் மது அருந்தவும், சிரிக்கவும் , பொழுது போக்கு நடவடிக்கையில் ஈடுபடவும் தடைவிதிக்கப்பட்டுள்ளது. அத்தோடு டிசம்பர் 17 அன்று மளிகை பொருட்கள் வாங்கவும் தடைவிதிக்கப்பட்டுள்ளது. இறுதி சடங்குகள், பிறந்தநாள் கொண்டாட்டங்கள் கூட கொண்டாட தடையாம். கிம் ஜாங் இல் டிசம்பர் 17 2011 மாரடைப்பு காரணமாக இறந்தார். தனது 69 வயதில் 17 வருட ஆச்சி காலத்தை முடித்திருந்தார். வருடா வருடம் பத்து நாட்கள் நடக்கும் இந்த துக்க அனுசரிப்பு நிகழ்ச்சி இந்த வருடம் 10 ம் ஆண்டு நினைவை குறிக்க 11 நாட்கள் அனுசரிக்கபடுகிறது!

அமெரிக்காவில் 72 லட்சம் குழந்தைகள் கொரோனா தொற்றால் பாதிக்கப்பட்டுள்ளதாக அதிர்ச்சி தகவல் வெளியாகி உள்ளது.

அமெரிக்காவின் குழந்தைகள் மருத்துவ அகாடமி மற்றும் குழந்தைகள் மருத்துவமனை சங்கமும் இணைந்து இந்த அதிர்ச்சி தகவலை வெளியிட்டுள்ளது.

அங்கு கொரோனாவால் குழந்தைகள் பாதிக்கப்படும் அளவு, சராசரியாக 1 லட்சம் குழந்தைகளில் 9 ஆயிரத்து 562 பேர் கொரோனோ பாதிப்புக்கு உள்ளாகி இருக்கின்றனர் என்கிற அளவில் உள்ளது. 

அமெரிக்காவில் இதுவரை 71 லட்சத்து 96 ஆயிரத்து 901 குழந்தைகள் பாதிக்கப்பட்டுள்ளனர் என்றும், அமெரிக்காவின் மொத்த கொரோனா பாதிப்பில் 17.2 சதவீதத்தினர் குழந்தைகளே என்ற தகவலும் வெளியாகி உள்ளது.

கடந்த 1 வாரத்தில் மட்டும், 1 லட்சத்து 64 ஆயிரம் குழந்தைகள் கொரோனாவால் பாதிக்கப்பட்டுள்ளனர். 

இதன்மூலம், அமெரிக்காவில் தொடர்ந்து 18வது வாரமாக 1 லட்சத்துக்கும் அதிகமாக குழந்தைகளின் கொரோனா தொற்று பாதிப்பு பதிவாகி வருவது குறிப்பிடத்தக்கது.

கடந்த செப்டம்பர் மாதம் முதல், 21 லட்சத்துக்கும் அதிகமான குழந்தைகள் கொரோனாவால் பாதிக்கப்பட்டுள்ளனர். அமெரிக்காவில் கொரோனாவால் உயிரிழந்தவர்களில் 0.27 சதவீதத்தினர் மட்டுமே குழந்தைகள் என்பது சற்று ஆறுதலான விஷயமாக கருதப்படுகிறது.

அமெரிக்காவின் குழந்தைகள் மருத்துவ அகாடமி(ஏ ஏ பி) மற்றும் குழந்தைகள் மருத்துவமனை சங்கமும் இணைந்து மேற்கண்ட தகவல்களை வெளியிட்டுள்ளது!

நியூஸிலாந்தில் சிகரெட் விற்பனைக்குத் தடை விதிக்க அந்நாட்டு அரசாங்கம் திட்டமிட்டு வருகிறது. புகைப் பழக்கத்தை முற்றிலும் ஒழிக்கும் நோக்கில் நியூஸிலாந்து செயல்படுகிறது. சிகரெட் விற்பனையைத் தடை செய்வதன் மூலம் நியூஸிலாந்தில் இளையவர்கள் அவர்கள் வாழ்வில் சிகரெட்டைப் புகைத்துப் பார்க்கவே முடியாத சூழலை ஏற்படுத்தமுடியும் என்று அதிகாரிகள் நம்புகின்றனர்.

புகைப் பழக்கத்திற்கு எதிராக பல நடவடிக்கைகளை நியூஸிலாந்து எடுத்து வருகிறது. சிகரெட் புழக்கத்திற்கு எதிரான நடவடிக்கைகள் பலன் தருவதற்குக் காலம் பிடிக்கும் என்பதால், கடுமையான திட்டங்களை கையில் எடுக்க நியூஸிலாந்து யோசித்து வருகிறது. அடுத்த ஆண்டு இறுதிக்குள் புதிய சட்டம் நடப்புக்கு கொண்டுவரப்படும் என்று எதிர்பார்க்கப்படுகிறது.

2027ஆம் ஆன்டு முதல் நியூஸிலந்தில் 14 வயதுடையவர்கள் சிகரெட்டுகளை வாங்க முடியாது என்ற சட்டம் நடப்பில் உள்ளது. அதேபோல் சிகரெட்டில் உள்ள நிக்கோட்டினின் அளவும் குறைக்கப்படும். புதிய சட்டம் நடப்பிற்கு வந்தால் பூட்டானுக்குப் பிறகு சிகரெட்டுகளுக்கு தடை விதிக்கும் இரண்டாவது நாடாக நியூஸிலந்து இருக்கும்.


மாஸ்கோ: உலகை அச்சுறுத்தும் புதிய வகை கொரோனாவாக அடையாளம் காணப்பட்டுள்ளது ஒமிக்ரான்.

50 பிறழ்வுகளைக் கொண்டுள்ள உருமாறிய கொரோனா வைரசான ‘ஒமிக்ரான்’ தென் ஆப்பிரிக்காவில் முதலில் கண்டுபிடிக்கப்பட்டது. இந்த வைரஸ், இதுவரை கண்டறியப்பட்டுள்ள கொரோனா வைரஸ்களில் ஆபத்தானதாக கூறப்படுகிறது.

இதனால் உலக நாடுகள் எச்சரிக்கையாக இருக்கின்றன. இருப்பினும் இந்த வைரஸ் தென் ஆப்பிரிக்காவில் தோன்றி, பெல்ஜியம், இஸ்ரேல், ஹாங்காங்குக்கு ஏற்கெனவே பரவி விட்டது.

இந்த வகை கொரோனா பாதிப்பில் இருந்து மீண்டவர்களை குறிவைத்து தாக்குகிறது என்ற தகவல் வெளியாகி உள்ளது.

தென்னாப்பிரிக்காவில் அடையாளம் காணப்பட்ட ஒமிக்ரான், ஒரே வாரத்தில் உலகின் பெரும்பாலான நாடுகளில் பரவி உள்ளது. அதிக எண்ணிக்கையிலான பிறழ்வுகள், முந்தைய வகைகளை  விட வேகமான பரவல், தற்போதைய தடுப்பூசிக்கு அடங்காதது என வெளியாகி வரும் பல தகவல்கள், ஒமிக்ரான் மீதான கவலையை அதிகரித்துள்ளன.

இந்த நிலையில் ஸ்புட்னிக் வி மற்றும் ஸ்புட்னிக் லைட் தடுப்பூசிகள் ஒமிக்ரான் கொரோனா வகைக்கு எதிராக நோய் எதிர்ப்பு சக்தியை உருவாக்கும் என்று ரஷிய சுகாதாரத்துறை நம்பிக்கை தெரிவித்துள்ளது.

மேலும், கொரோனா வகை வைரசில், எத்தகைய திரிபுகள் ஏற்பட்டாலும், அவற்றை எதிர்கொள்ளும் திறன்வாய்ந்தவை ஸ்புட்னிக் தடுப்பூசி என்றும், தேவைப்பட்டால் லட்சக்கணக்கான பூஸ்டர் தடுப்பூசிகளை தயாரிக்கவிருப்பதாகவும் ரஷியா தெரிவித்துள்ளது!

சூடான் நாட்டில் கூட்டணி ஆட்சியை கவிழ்த்து கடந்த மாதம் 25-ஆம் தேதி அந்நாட்டு  ராணுவம் ஆட்சியை கைப்பற்றியது. இந்த ஆட்சியின் தலைவராக ராணுவ தளபதியான ஜெனரல் ஃபடக் அல்-பர்ஹன் செயல்பட்டு வருகிறார்.

அதேவேளை ராணுவ ஆட்சிக்கு எதிர்ப்பு தெரிவித்து சூடானின் பல்வேறு பகுதிகளில் பொதுமக்கள் போராட்டத்தில் ஈடுபட்டு வருகின்றனர். இதனையடுத்து, போராட்டத்தில் ஈடுபட்டு வரும் பொதுமக்கள் மீது ராணுவத்தினர் கண்மூடித்தனமான தாக்குதல்களில் ஈடுபட்டு வருகின்றனர். இந்த தாக்குதலில் ஏற்கனவே 24 பேர் உயிரிழந்துள்ளனர்.

இந்நிலையில், ராணுவ ஆட்சிக்கு எதிர்ப்பு தெரிவித்து தலைநகர் ஹர்டோமின் பல்வேறு பகுதிகளில் நேற்று பொதுமக்கள், சமூக ஆர்வளர்கள் மீண்டும் போராட்டத்தில் ஈடுபட்டனர். அப்போது, போராட்டக்காரர்கள் மீது ராணுவத்தினர் துப்பாக்கிச்சூடு, கண்ணீர்புகை குண்டு வீசி தாக்குதல் நடத்தினர். இந்த தாக்குதலில் போராட்டக்காரர்கள் 15 பேர் உயிரிழந்தனர். மேலும், பலர் படுகாயமடைந்தனர்.

இதனால், சூடானில் ராணுவ ஆட்சிக்கு எதிராக நடந்த போராட்டத்தில் உயிரிழந்தோர் எண்ணிக்கை 39 ஆக அதிகரித்துள்ளது!

அமெரிக்கா 1969 ஆம் ஆண்டு ஜூலை 21ஆம் தேதி முதன்முதலில் மனிதனை நிலவுக்கு அனுப்பியது. அதன் பிறகு அமெரிக்கா நாசா விண்வெளி மையம் பல தடவை மனிதனை நிலவுக்கு அனுப்பி சோதனை நடத்தியது. இதற்கு மிக அதிகமாக செலவானதால் அதன் பின்னர் மனிதர்கள் அனுப்பப்படவில்லை.

டிரம்ப் ஜனாதிபதியாக இருந்த போது மீண்டும் மனிதனை நிலவுக்கு அனுப்பி ஆய்வு மேற்கொள்ளப்படும் என்று அறிவித்தார். 2024-ஆம் ஆண்டு நிலவுக்கு அனுப்பும் பணி நடைபெறும் என்றும் அவர் கூறினார்.

இதற்காக தனியார் விண்வெளி ஆய்வு மையமான ஸ்பேஸ் எக்ஸ்நிறுவனத்திடம் ஒப்பந்தம் செய்யப்பட்டது. இதற்காக ரூ.20 ஆயிரம் கோடி வழங்குவதாக ஒப்பந்ததில் முடிவு செய்தனர்.

விண்வெளி வீரர்கள் பயணம் செய்வதற்காக ஆர்டிமிஸ் லூனர்-3 என்ற விண்வெளி ஓடத்தை ஸ்பேஸ் எக்ஸ் நிறுவனம் தயாரித்தது. ஆனால் இதன் பணிகள் தாமதமாகி உள்ளன. எனவே இது சம்பந்தமாக வழக்குகளும் பதிவு செய்யப்பட்டுள்ளன.

சட்டப் பிரச்சினைகள் காரணமாக நிலவுக்கு மனிதனை அனுப்பும் பணி 2025-ஆம் ஆண்டுக்கு தள்ளி வைப்பதாக நாசா விண்வெளி மையத்தின் நிர்வாகி பில் நெல்சன் தெரிவித்துள்ளார்!


தாம் திருமணம் செய்துகொண்டதாக மலாலா தெரிவித்துள்ளார்.

பெண் குழந்தைகள் கல்விக்காக போராடியதற்காக, மலாலா யூசுப் மீது தலிபான் பயங்கரவாதிகள் 2012ல் தாக்குதல் நடத்தினர். தலையில் குண்டு பாய்ந்த நிலையில் அவர் உயிர் தப்பினார்.  இந்த சம்பவம் உலக அளவில் பரபரப்பானது. தலையில் பலத்த காயமடைந்து இங்கிலாந்தில் சிகிச்சை பெற்று குணமடைந்த மலாலா, தனது குடும்பத்தினருடன் அங்கேயே வசித்து வருகிறார்.

தனது 16வது வயதில் கல்வியில் பாலின சமத்துவத்தின் அவசியம் குறித்து ஐநாவில் உரையாற்றிய மலாலா, தொடர்ந்து பெண் குழந்தைகளின் கல்வி உரிமைக்காகப் பணியாற்றி வருகிறார்.  இதற்காக அவருக்கு அமைதிக்கான நோபல் பரிசு வழங்கப் பட்டது.

இந்நிலையில் அசர் என்பவருடன் இங்கிலாந்தில் உள்ள பர்மிங்ஹாமின் எளிமை முறையில் திருமணம் நடந்ததாக தகவல் வெளியாகியுள்ளது.

இது தொடர்பாக மலாலா  தனது அதிகாரப்பூர்வ டுவிட்டர் பக்கத்தில் திருமண புகைப்படங்களை வெளியிட்டுள்ளார்.

அதில் , என் வாழ்வில் இது ஒரு பொன்னான நாள், அசரும் நானும் வாழ்க்கைக்கு துணையாக இருக்க முடிவு செய்தோம். எங்கள் குடும்பத்துடன் பர்மிங்காமில் உள்ள வீட்டில் ஒரு சிறிய நிக்கா விழாவைக் கொண்டாடினோம். உங்கள் ஆசீர்வாதத்தை எங்களுக்கு அனுப்புங்கள். இவ்வாறு அதில் தெரிவித்துள்ளார்.  இதையடுத்து அவருக்கு ஏராளமானோர் வாழ்த்துகளை தெரிவித்து வருகின்றனர்.

அண்மையில் மலாலா இங்கிலாந்து பத்திரிக்கைக்கு அளித்த பேட்டி ஒன்றில்,

“ மக்கள் ஏன் திருமணம் செய்து கொள்கிறார்கள் என்பதை இப்போது வரைக்கும் என்னால் புரிந்து கொள்ள முடியவில்லை. உங்கள் வாழ்கைக்கு ஒரு துணைவர் வேண்டுமென்றால், பிறகு ஏன் திருமண பத்திரங்களில் கையெழுத்து இடுகிறீர்கள். அது வெறும் பாட்னர்ஷிப்பாக மட்டும் ஏன் இருக்க கூடாது” என்று குறிப்பிட்டு இருந்தார். அவரது இந்த பேட்டி சர்ச்சையை ஏற்படுத்தி இருந்தது குறிப்பிடத்தக்கது!

 

கொரோனாவுக்கு எதிராக மாத்திரைகளும் சிறந்த பயனளிப்பதாக ஆய்வில் தெரியவந்துள்ளது.

அந்த வகையில், ஆண்டிவைரல் மாத்திரையோடு பைசர் கொரோனா எதிர்ப்பு மாத்திரையை எடுத்துக்கொண்டவர்களுக்கு இறப்பு அபாயம் குறைந்துள்ளதாக தகவல்கள் தெரிவிக்கின்றன.

பைஸர் மாத்திரையை எடுத்துக்கொண்ட நோயாளிகளில் 89 சதவீதம் பேருக்கு மருத்துவமனையில் அனுமதிக்கப்படுதல் அல்லது இறப்பு அபாயம் குறைந்து இருப்பதாக பைசர் நிறுவனத்தின் தரவுகள் தெரிவித்துள்ளன

இந்த மருந்தை உட்கொண்டவர்களில் 1 சதவீதத்திற்கும் குறைவானவர்களே மருத்துவமனையில் அனுமதிக்கப்பட்டதாகவும் உயிரிழப்பு எதுவும் ஏற்படவில்லை எனவும் 775 பேரிடம் மேற்கொண்ட பரிசோதனையில் தெரியவந்து இருப்பதாக தெரிவிக்கப்பட்டுள்ளது!

சிங்கப்பூரில் வேலை பார்க்கும் வெளிநாட்டு ஊழியர்களுக்கு மனநல மற்றும் உளவியல் முதலுதவி பயிற்சிக்கு ஏற்பாடு செய்யப்படும் என அந்நாட்டு அரசு தெரிவித்துள்ளது.

நடப்பாண்டில் செப்டம்பர் வரையிலான காலகட்டத்தில் work permit வைத்துள்ள தொழிலாளர்கள் 98 பேர் மனநலக் கழகத்தில் சிகிச்சைக்காக அனுமதிக்கப்பட்டுள்ளனர்.

தங்குவிடுதிகளில் வசிக்கும் தொழிலாளர்களுக்கு மனநல பாதிப்பு ஏற்பட்டால் உடனடியாக சிகிச்சை அளிக்க ஏற்பாடு செய்யப்படும் என சிங்கப்பூர் மனிதவள அமைச்சர் டான் சீ லெங் நாடாளுமன்றத்தில் தெரிவித்தார்.

கொரோனா நெருக்கடி காரணமாக, சிங்கப்பூரில் பணியாற்றும் வெளிநாட்டு ஊழியர்கள் சமூக இடங்களுக்குச் சென்றுவர கட்டுப்பாடுகள் விதிக்கப்பட்டுள்ளன.

இதையடுத்து, அவர்களது மன அழுத்தத்தைப் போக்குவதற்கான நடவடிக்கைகளை மேற்கொள்ள வேண்டும் என கோரிக்கை எழுந்துள்ளது.

இந்நிலையில், வெளிநாட்டு ஊழியர்கள் கடந்த ஆண்டு ஆகஸ்ட் மாதத்தில் இருந்து பொழுதுபோக்கு மையங்களுக்குச் செல்ல அனுமதிக்கப்பட்டு வருவதாக அமைச்சர் டான் சீ லெங் தெரிவித்தார்.

இது வாரத்துக்கு ஒருமுறையில் இருந்து மூன்று முறைக்கு உயர்த்தப்பட்டுள்ளது. இத்தகைய வருகைகளுக்கு முன் முழுமையாகத் தடுப்பூசி போட்டுக்கொண்டுள்ள ஊழியர்கள் பரிசோதனை செய்துகொள்ள வேண்டும் என்ற விதிமுறையையும் அமைச்சு நீக்கியுள்ளது!

விளம்பரம்:



 


காபூல்: ஆப்கானிஸ்தான், தலீபான்கள் கட்டுப்பாட்டில் வந்ததில் இருந்து பதற்றத்தின் பிடியில் சிக்கித்தவிக்கிறது. அங்குள்ள வெளிநாட்டினர் மட்டுமல்லாது உள்நாட்டினரும் ஆப்கானிஸ்தானில் இருந்து வெளியேறினால் போதும் என்ற மன நிலையில் உள்ளனர்.

இதனால் தலைநகர் காபூல் சர்வதேச விமான நிலையத்தில் கூட்டம் தொடர்ந்து அலை மோதுகிறது. விமான நிலையத்துக்கு வெளியேயும் ஒரு குழப்பமான சூழ்நிலை நீடிக்கிறது. பல்லாயிரக்கணக்கான ஆப்கானிஸ்தானியர்கள் நாட்டை விட்டு தப்பினால் போதும் என்ற நிலையில், விமான நிலையத்தை நோக்கி படையெடுக்கின்றனர்.

இந்த நிலையில், ஆப்கானிஸ்தான் விமான நிலையத்தில் நடைபெற்ற துப்பாக்கிச்சண்டையில்  ஆப்கானிஸ்தான் நாட்டை சேர்ந்த  ஒருவர் பலியானதாக செய்திகள் வெளியாகியுள்ளன.  மூன்று பேர் காயம் அடைந்துள்ளனர். 

ஆப்கானிஸ்தான் பாதுகாப்புப் படையினருக்கும் அடையாளம் தெரியாத நபர்களுக்கும் இடையே துப்பாக்கிச்சண்டை நடைபெற்றுள்ளது. ஜெர்மனி,அமெரிக்க படைகளும் இணைந்து துப்பாக்கிச்சூடு நடத்தியதாக ஜெர்மனி வெளியிட்ட அறிக்கையில் தெரிவிக்கப்பட்டுள்ளது.


ஆப்கானிஸ்தானை தலிபான்கள் கைப்பற்றியதைத் தொடர்ந்து ஆயிரக்கணக்கான மக்கள் அந்நாட்டை விட்டு வெளியேறி வருகின்றனர்.

இந்நிலையில், காபூலில் உள்ள விமான நிலையத்தில் இருந்து வெளிநாட்டு விமானங்கள் மீட்பு பணியில் ஈடுபடுவதால் அந்த விமானநிலையத்திற்கு ஆயிரக்கணக்கான ஆப்கன் மக்கள் குவிந்துள்ளனர்.

அமெரிக்கா, இங்கிலாந்து, இந்தியா உள்ளிட்ட பல்வேறு நாடுகள் காபூல் விமான நிலையத்தை பயன்படுத்தி தங்கள் நாட்டு மக்களை மீட்டு வருகின்றனர். நூற்றுக்கணக்கான ஆப்கானிஸ்தான் மக்களும் மீட்கப்பட்டுள்ளனர்.

இதற்கிடையில், காபூல் விமான நிலையத்தில் ஆயிரக்கணக்கான மக்கள் சூழ்ந்துள்ளதால் விமான நிலையத்தை சுற்றிலும் அமெரிக்க படையினர் பாதுகாப்பு பணியில் ஈடுபட்டு வருகின்றனர்.

நேற்று காபூல் விமான நிலையத்திற்கு வெளியே நின்றுகொண்டிருந்த நூற்றுக்கணக்கான மக்கள் விமான நிலையத்திற்குள் நுழைய முயற்சித்தனர். அப்போது, அந்த கூட்டத்தில் திடீரென தள்ளுமுள்ளு ஏற்பட்டது.

இந்த கூட்ட நெரிசலில் சிக்கி 4 பெண்கள் பரிதாபமாக உயிரிழந்தனர். மேலும், பலர் படுகாயமடைந்தனர். நீண்ட நேரமாக வெயிலில் அமர்ந்திருந்ததால் சோர்வாக இருந்தவர்கள் கூட்ட நெரிசலில் சிக்கியதால் பரிதாபமாக உயிரிழந்தனர். 

காபூல் விமான நிலையத்தில் நிலைமை மோசமாக உள்ளதால் ஆப்கானிஸ்தானில் உள்ள அமெரிக்கர்கள் யாரும் காபூல் விமான நிலையத்திற்கு வர வேண்டாம் என அமெரிக்க அரசு தெரிவித்துள்ளது!


டோக்கியோ, ஜூலை 17: கொரோனா பரவல் காரணமாக டோக்கியோ ஒலிம்பிக் போட்டி கடும் கட்டுப்பாடுகளுக்கு மத்தியில் நடைபெற உள்ளது. ஏற்கனவே இந்தப் போட்டியை நேரில் காண ரசிகர்களுக்கு அனுமதி கிடையாது என்று அறிவிக்கப்பட்டு விட்டது.

டோக்கியோ ஒலிம்பிக் திருவிழா வரும் ஜூலை 23- ஆம் தேதி ஜப்பானின் தேசிய விளையாட்டு அரங்கில் தொடங்கவுள்ளது. வழக்கமாக பல்லாயிரக்கணக்கான மக்கள் முன்னிலையில் பிரமாண்டமாக கொண்டாடப்படும் ஒலிம்பிக் திருவிழா இம்முறை கொரோனா அச்சுறுத்தல் காரணமாக எளிமையாக கொண்டாடப்படவுள்ளது. முன்னதாக 10 ஆயிரம் பேர் கலந்து கொள்வார்கள் என அறிவிக்கப்பட்டிருந்தது.

இதனிடையே டோக்கியோவில் கொரோனா தினசரி பாதிப்பு அதிகரித்ததாலும், அங்கு அவசர நிலை பிரகடனப்படுத்தப்பட்டுள்ளதாலும் உலகின் மிக முக்கிய பிரபலங்கள் ஆயிரம் பேர் மட்டுமே தொடக்கவிழாவில் கலந்து கொள்ளவுள்ளனர். ஜப்பான் பேரரசர் நரிஹிட்டோ, அமெரிக்க அதிபர் ஜோ பைடனின் மனைவி ஜில் பைடன் உள்ளிட்டோர் கலந்து கொள்வார்கள் என்ற தகவல் வெளியாகியுள்ளது.

தற்போது டோக்கியோ ஒலிம்பிக் விளையாட்டு வீரர்கள் கிராமத்தில் ஒருவருக்கு கொரோனா பாதிப்பு ஏற்பட்டுள்ளது. அந்த நபர் ஆயிரக்கணக்கான வீரர்கள் தங்க உள்ள ஒலிம்பிக் கிராமத்தில் இருந்து அப்புறப்படுத்தப்பட்டு ஓட்டல் ஒன்றில் தனிமைப்படுத்தப்பட்டுள்ளார். வீரர்கள் கிராமத்தில் ஏற்பட்ட முதல் பாதிப்பு இதுதான் என்று  டோக்கியோ ஒலிம்பிக் ஏற்பாட்டுக் குழுவின் செய்தித் தொடர்பாளர் மாசா தகாயா தெரிவித்தார். இருப்பினும், தாகாயா அந்த நபர் எந்த நாட்டை சேர்ந்தவர் என்பதை  வெளியிடவில்லை.

டோக்கியோவில் தற்போது அவசர நிலை பிறபிக்கப்பட்டு உள்ளது, அங்கு நோய்த்தொற்றுகள் தொடர்ந்து அதிகரித்து வருகின்றன. டோக்கியோ ஒலிம்பிக்கின் தொடக்க விழாவில் மிக முக்கியப் பிரமுகர்கள் ஆயிரம் பேர் மட்டுமே கலந்து கொள்ளவுள்ளதாகத் தகவல்கள் வெளியாகியுள்ளன!

 

பீஜிங்: கொரோனா பரவலைக் கட்டுப்படுத்த பல நாடுகள் பல்வேறு நடவடிக்கைகளை மேற்கொண்டுவருகின்றன. இந்நிலையில், மருத்துவமனைகள், பள்ளிகள் உள்ளிட்ட பொது இடங்களுக்கு செல்ல தடுப்பூசி செலுத்தி கொள்ளாத 18 வயதுக்கு மேற்பட்டோருக்கு தடை விதிக்கப்படும் என சீனா அரசு அறிவித்துள்ளது.

கொரோனா வைரஸானது சீனாவில் பரவத் தொடங்கி இருந்தாலும், கட்டுப்பாடுகளை மேற்கொண்டதன் மூலம் அந்நாடு அதனைக் கட்டுப்படுத்தியது. இருப்பினும், ஆசிய நாடுகளில் டெல்டா வகை கொரோனா வேகமாக பரவிவரும் நிலையில், சீனா புதிய விதிகளை அறிவித்துள்ளது.

அதன்படி, இரண்டாம் நிலை நகரங்களில் கடும் கட்டுப்பாடு விதிக்கப்பட்டுள்ளது. ஜூலை 23-ஆம் தேதிக்குள், சுக்சியாங் நகர மக்கள் ஒரு தவணை தடுப்பூசியாவது செலுத்தியிருக்க வேண்டும் என அரசு அறிவுறுத்தியுள்ளது.

அப்படி செய்யவில்லை எனில், மருத்துவமனைகள், நூலகங்கள், அருங்காட்சியகங்கள், பள்ளிகள் உள்ளிட்ட இடங்களுக்கு செல்லவும் பொது போக்குவரத்தை பயன்படுத்தவும் தடை விதிக்கப்படும் என எச்சரிக்கை விடுத்துள்ளது!


 

பாக்தாத், ஜூலை 13: ஈராக்கில் கொரோனா நோயாளிகள் சிகிச்சை பெற்று வந்த மருத்துவமனையில் ஏற்பட்ட தீ விபத்தில் 52 பேர் உயிரிழந்துள்ளனர். ஈராக்கின் தெற்கு நகரமான நாசியாவில் கொரோனா நோயாளிகளுக்கு என்று மருத்துவமனை ஒன்று செயல்பட்டு வந்தது. இங்கு 200-க்கும் மேற்பட்ட கொரோனா நோயாளிகள் சிகிச்சை பெற்று வந்தனர்.

இந்நிலையில் மருத்துவமனையில் பொருத்தப்பட்டிருந்த பிராணவாயு சேமிப்பு கிடங்களில் திடீரென தீ விபத்து ஏற்பட்டுள்ளது. தீ கொழுந்துவிட்டு எரிந்ததால் ஆக்சிஜன் சிலிண்டர்கள் பயங்கரமாக வெடித்து சிதறின.

பொதுமக்கள் மற்றும் நோயாளிகளின் உதவியுடன் அங்கு சிகிச்சை பெற்று வந்த 100-க்கும் மேற்பட்டவர்களை காப்பாற்றி பாதுகாப்பான இடங்களுக்கு மாற்றினர்.

விரைந்து வந்த தீயணைப்பு வீரர்களும் பல மணி நேரம் போராடி தீயைக் கட்டுக்குள் கொண்டு வந்தனர். இருப்பினும் தீ மற்றும் மூச்சுத்திணறல் காரணமாக கொரோனா நோயாளிகள் 52 பேர் உடல் கருகி உயிரிழந்துவிட்டனர். தீக்காயங்களுடன் மீட்கப்பட்ட 50 பேருக்கு நாசியாவில் உள்ள பல்வேறு மருத்துவமனைகளில் சிகிச்சை அளிக்கப்பட்டு வருகிறது.

பிராணவாயு சேமிப்பு கிடங்களில் போதுமான தீ தடுப்பு பாதுகாப்பு உபகரணங்கள் இல்லை என்பது முதற்கட்ட விசாரணையில் தெரிய வந்துள்ளதை அடுத்து மருத்துவமனை நிர்வாக அதிகாரி பணியிடை மாற்றம் செய்யப்பட்டுள்ளார்!

கொரோனா பெருந்தொற்றுப் பரவலைக் கட்டுப்படுத்த விதிக்கப்பட்ட ஊரடங்கு மற்றும் அதனால் ஏற்பட்ட நெருக்கடிகளால், உலகம் முழுவதும் பல்வேறு தரப்பு மக்களும் பாதிப்புக்குள்ளாகி உள்ளனர்.

இந்நிலையில் கென்யாவின் நைரோபியைத் தலைமையிடமாகக் கொண்டு செயல்படும் உலகளாவிய வறுமை எதிர்ப்பு இயக்கமான 'ஆக்ஸ்பாம்' ஆய்வு ஒன்றை நடத்தியது.

சமீபத்தில் வெளியான அந்த ஆய்வின் அறிக்கையில், 'கொரோனா பரவல் அவசரநிலை அறிவிக்கப்பட்ட காலத்திலிருந்து சேகரிக்கப்பட்ட தரவுகளின் அடிப்படையில் மேற்கொள்ளப்பட்ட ஆய்வில், உலக அளவில் பட்டினியால் ஒவ்வொரு நிமிடத்திற்கும் 11 பேர் உயிரிழந்து வருவது தெரியவந்துள்ளது.

மேலும், கடந்த ஒரே ஆண்டில் உலகம் முழுவதும் பசியால் வாடுபவர்களின் எண்ணிக்கை 2 கோடியாக அதிகரித்துள்ளது!

ஓரேகான்: அமெரிக்காவின் வடமேற்கு மற்றும் கனடா ஆகிய நாடுகளில் கடந்த வாரத்தில் சுட்டெரிக்கும் அனல் காற்றுக்கு 500-க்கும் மேற்பட்டோர் பலியாகி உள்ளனர்.

அமெரிக்காவின் பல்வேறு மாகாணங்களில் இதுவரை இல்லாத அளவில் வெயில் சுட்டெரித்து வருகிறது.  இவற்றில், ஓரேகான் மாகாணத்தில் மட்டும் வெயில் பாதிப்புக்கு 95 பேர் உயிரிழந்துள்ளது அதிர்ச்சி ஏற்படுத்தி உள்ளது.மாகாண கவர்னர் கேட் பிரவுன்

இந்நிலையில், பருவகால மாற்றத்திற்கு ஏற்ப தயார்படுத்தி கொள்ள பல ஆண்டுகளாக பணியாற்றி வருவதாகவும், முன்னெப்போதும் இல்லாத வகையில் அனல் காற்று 95 பேரை பறித்துச் சென்றிருப்பது கொடூரம் எனவும் ஓரேகான் மாகாண கவர்னர் தமது வருத்தத்தப் பதிவு செய்துள்ளார்!

வாஷிங்டன்: கொரோனா வைரஸ் தாக்கத்திலிருந்து பாதுகாத்துக்கொள்ள அனைவரும் முகக் கவசம் அணிகிறோம். மூலிகை முகக் கவசம்,  துணியால் ஆன முக கவசங்கள், பிளாஸ்டிக் முககவசம் எனப்  பல வகை முக கவசங்கள் தற்போது விற்பனையாகின்றன. ஏன் தங்கத்தில் கூட ஒருவர் முக கவசம் அணிந்து வலம் வருகிறார்.

முககவசங்கள் உடன் வைபை, புளூடூத், ஸ்மார்ட்போன் ஆகியவற்றை இணைக்கும்படியான தொழில்நுட்ப ரீதியான முககவசங்கள் ஜப்பான் உள்ளிட்ட ஆசிய நாடுகளில் விற்பனையாகி வருகின்றன.

தற்போது  விஞ்ஞானிகள் ஓர் வித்தியாசமான தொழில்நுட்பம் நிறைந்த அதிநவீன முககவசம் ஒன்றை தயாரித்துள்ளனர். 

முககவசம் அணிந்த 90 நிமிடங்களுக்குள் கொரோனா வைரசை கண்டறியக்கூடிய ஒரு புதிய முககவசத்தை  மாசசூசெட்ஸ் இன்ஸ்டிடியூட் ஆப் டெக்னாலஜி  மற்றும் அமெரிக்காவின் ஹார்வர்ட் பல்கலைக்கழகத்தின் விஞ்ஞானிகள் வடிவமைத்துள்ளனர்.

இது குறித்து நேச்சர்  பயோடெக்னாலஜி  பிரபல அறிவியல்  இதழ்  கட்டுரையில் கூறப்பட்டு இருப்பதாவது:-

பிரெஞ்சு விஞ்ஞானிகள் அதிநவீன நோய்களை கண்டறியும் சென்சார்கள் பொருத்திய கவசங்களை கண்டுபிடித்துள்ளனர். காற்றில் கொரோனா வைரஸ் உட்பட வேறு ஏதாவது வைரஸ் இருந்தால் அதனை இந்த முககவசத்துடன் பொருத்தப்பட்டிருக்கும் சென்சார்கள் கண்டறிந்து உடனடியாக முககவசத்தை அணிந்து இருக்கும் எஜமானருக்கு தகவல் அளிக்குமாம். இதனால் அவர்கள் அந்த இடத்தை விட்டு விரைவில் நகர்ந்து தப்பித்துக்கொள்ளலாம் என விஞ்ஞானிகள் தெரிவித்துள்ளனர்.

நாம் சாலையில் நடந்து செல்லும்போது சுவாசிக்கும் காற்றில் பலவித வைரஸ், பாக்டீரியாக்கள் உள்ளன. நமது நாசி துவாரத்தில் உள்ள மியூகோஸ் மற்றும் ரோமங்கள் ஆகியவை இவற்றை நுரையீரலுக்குள் நுழைவதை தடுக்கின்றன. கொரோனா வைரஸ் நுண் துகள் வேகமாகப் பரவும் என்பதால் குறிப்பிட்ட ஒரு நபர் அணியும் முககவசத்தில் சென்சார் பொருத்த பிரெஞ்சு விஞ்ஞானிகள் திட்டமிட்டு இதனை உருவாக்கியுள்ளனர்.

காற்றில் மிதக்கும் வைரஸ் துகள் இந்த சென்சாரில் பட்டாலே இந்த சென்சார்கள் இந்த வைரஸின் தன்மையை கண்டறிந்து விடும். இதற்கு பேட்டரி தேவை இல்லை என்பது குறிப்பிடத்தக்கது. நமது சருமத்தின் மீது ஒவ்வாமையை ஏற்படுத்தும் ஏதாவது தூசி பட்டால் உடனே அந்த இடத்தில் எரிச்சல் மற்றும் அரிப்பு ஏற்படுகிறது அல்லவா? அது போலவே இந்த சென்சார்கள் வேலை செய்யும் என்று விஞ்ஞானிகள் தெரிவித்துள்ளனர்.

ஆரம்ப சோதனைகளில்  இந்த  முகமூடி மிகவும் துல்லியமான முடிவுகளை அளித்துள்ளது , இது தற்போதைய பி.சி.ஆர் சோதனைகளுடன் ஒப்பிடக்கூடியதாக உள்ளது.

சென்சார்களை சோதனை செய்ய விரும்பும் போது அணிபவர்களால் செயல்படுத்தப்படும் வகையில் வடிவமைக்கப்பட்டுள்ளன. பயனர்கள் தனியுரிமைக்காக முகமூடியின் உட்புறத்தில் மட்டுமே முடிவுகள் காண்பிக்கப்படும் என்று விஞ்ஞானிகள் வெளியிட்டுள்ள அறிக்கையில் தெரிவிக்கப்பட்டுள்ளது!

ஜகார்த்தா, ஜூன் 26: இந்தனோசியாவில் கொரோனா பாதிப்பு மீண்டும் அதிகரித்துள்ளது.

கடந்த வியாழக்கிழமை அந்நாட்டில் 20 ஆயிரம் பேருக்குத் தொற்று உறுதி செய்யப்பட்டது. தொற்று பாதிப்பு அந்நாட்டில் பரவிய பிறகு ஏற்படும் அதிகபட்ச பாதிப்பு எண்ணிக்கை இதுவாகும். 

தொற்று பாதிப்பு விகிதம் 14.6 சதவீதத்தை அந்நாட்டில் எட்டியுள்ளது. இதனால், மருத்துவமனைகளில் படுக்கைகள் நிரம்பி வழிகின்றன. ஆக்சிஜன் தட்டுப்பாடு ஏற்படும் சூழலும் ஏற்பட்டுள்ளது. இந்த நெருக்கடிக்கு மத்தியில், இந்தோனேசியாவில் மருத்துவர்களும் அடுத்தடுத்து கொரோனா தொற்றால்  அதிகம் பாதிக்கப்படுகின்றனர். 

தொற்று பரவத்தொடங்கியதில் இருந்து 401 மருத்துவர்கள் உயிரிழந்துள்ளனர். இவர்களில் 20 க்கும் மேற்பட்டோர் தடுப்பூசியை முழுமையாக செலுத்திக்கொண்டவர்கள் என்று தெரிவிக்கப்பட்டுள்ளது. சீனாவின் சினோவேக் தடுப்பூசிதான்  அந்நாட்டில் அதிகம்  போடப்பட்டுள்ளது. 

குறிப்பாக கடந்த 2 வார காலத்தில் மட்டும் 358- மருத்துவர்கள் தொற்று பாதிப்புக்கு ஆளாகியுள்ளனர். இவர்கள் அனைவரும் சினோவேக் தடுப்பூசியின் இரு டோஸ்களையும் போட்டுக்கொண்டவர்கள்.  இந்தோனேசியாவின் மொத்த மக்கள் தொகையில் வெறும் 5 சதவீதம் பேருக்கு மட்டுமே கொரோனா தடுப்பூசி போடப்பட்டுள்ளது. அதிலும் பெரும்பாலும் சினோவேக் தடுப்பூசியே போடப்பட்டுள்ளது.

உருமாறிய கொரோனா வைரஸ் தொற்றுகளுக்கு எதிராக சினோவேக் தடுப்பூசியின் செயல் திறன், பிற தடுப்பூசிகளை காட்டிலும் மிகவும் குறைவு என நம்பப்படுகிறது!

வாஷிங்டன், ஜூன் 25: அமெரிக்காவின் புளோரிடா மாகாணத்தில் மியாமி கடற்கரை அருகே 12 மாடிகளை கொண்ட அடுக்குமாடிக் குடியிருப்பு வளாகம்  உள்ளது. லத்தீன் அமெரிக்காவின் பராகுவே, கொலம்பியா, வெனிசுலா, அர்ஜெண்டினா, உருகுவே   நாடுகளைச் சேர்ந்தவர்கள் அதில் அதிகம் தங்கி இருந்தனர்.1981-களில் கட்டப்பட்ட இந்தக் கட்டிடத்தின் பராமரிப்புப்  பணி நடைபெற்று வந்த வேளையில், இந்தக் கட்டிடம் இன்று அதிகாலை 1 மணி அள்வில் சீட்டுக்கட்டு  போல் சரிந்துவிழுந்தது.

கட்டிடத்தின் ஒரு பகுதி முழுவதும் சரிந்தது. குடியிருப்பின் வடகிழக்கு பகுதியில் உள்ள சுமார் 55 குடியிருப்புகள் இடிந்து சரிந்துள்ளது. இந்தக் கோர விபத்தில் நூற்றுக்கும் மேற்பட்டோர் சிக்கி உள்ளதால் மீட்புப் பணிகள் துரிதப்படுத்தப்பட்டுள்ளன.

இடிபாடுகளில் சிக்கிய 12 வயது சிறுவன் உள்பட 50-க்கும் மேற்பட்டோர் மீட்கப்பட்டுள்ளனர் , 100க்கும் மேற்பட்டோர்  இடிபாடுகளுக்குள் சிக்கி உயிரிழந்திருக்கலாம் என அஞ்சப்படுகிறது.  ஆனால் உயிரிழப்பு எண்ணிக்கை இதுவரை அதிகாரப்பூர்வமாக வெளியிடப்படவில்லை. பலர் காயமடைந்துள்ளனர் அவர்களில் பலரது நிலைமை கவலைக்கிடமாக உள்ளது.

சம்பவம் நடந்தபோது கட்டிடத்தில் எத்தனை பேர் இருந்தார்கள் என்பது தெளிவாகத் தெரியவில்லை. காணாமல் போனவர்களை தங்களால் உறுதிப்படுத்த முடியவில்லை என்று அதிகாரிகள் தெரிவித்துள்ளனர்.

கட்டிடம் இடிந்து விழுவதற்கு என்ன காரணம் என்று அதிகாரிகள் இன்னும் தீர்மானிக்கவில்லை, மியாமி-டேட் போலீசார் விசாரணையைத் தொடங்கியுள்ளனர்.

பராகுவே அதிபரின் உறவினர்கள் உள்பட பராகுவேவைச் சேர்ந்த 51 பேரைக் காணவில்லை.

அர்ஜென்டினாவின் பிரபல  பிளாஸ்டிக் அறுவை சிகிச்சை நிபுணர் ஆண்ட்ரஸ் கால்ப்ராஸ்கோனி, அவரது மனைவி மற்றும் புதிதாக தத்தெடுக்கப்பட்ட ஆறு வயது மகள் ஆகியோரையும் காணவில்லை என்று தெரிவிக்கப்பட்டுள்ளது!

 

வாஷிங்டன்: கொரோனா வைரஸ் டெல்டா மற்றும் டெல்டா பிளஸ் என உருமாறி அதிகரித்து வரும் கவலைகளுக்கு மத்தியில், விஞ்ஞானிகள் எல்லா வகை கொரோனா வைரஸ்களில் இருந்தும் பாதுகாப்பு அளிக்கும் புதிய சூப்பர் வேக்சின் ஒன்றை கண்டறிந்து உள்ளனர்.

அமெரிக்காவின் வடக்கு கரோலினாவில் உள்ள மருத்துவப் பல்கலைக்கழகத்தை சேர்ந்த விஞ்ஞானிகள், சூப்பர் வேக்சின் என்று குறிப்பிடப்படும் ஹைபிரிட் தடுப்பு மருந்தை உருவாக்கியுள்ளனர்.

கொரோனா வைரசின்  ஆபத்தான அமைப்பான ஸ்பைக் புரதத்தின் பல்வேறு வகைகளுக்கு எதிராக, ஆன்ட்டிபாடிகளை இந்த தடுப்பு மருந்து உருவாக்குவது, எலிகள் மீதான பரிசோதனையில் உறுதி செய்யப்பட்டுள்ளது. நோய்த்தொற்று ஏற்படாமல் தடுப்பதோடு, நுரையீரல் பாதிப்பு ஏற்படுவதையும் தடுப்பதாக ஆய்வறிக்கையில் தெரிவிக்கப்பட்டுள்ளது.

கொரோனா நோய்த்தொற்றை உருவாக்கும் கொரோனா வைரஸ்கள் மட்டுமின்றி, விலங்குகளில் இருந்து மனிதர்களுக்கு பரவக்கூடிய வாய்ப்பு உள்ள பிற கொரோனா வைரஸ்களுக்கு எதிராகவும் தடுப்பாற்றலை ஏற்படுத்தும் வகையில், தடுப்பு மருந்து வடிவமைக்கப்பட்டுள்ளதாக  ஆய்வாளர்கள் தெரிவித்துள்ளனர். இந்த தடுப்பு மருந்து அடுத்த ஆண்டில் மனிதர்களுக்கு செலுத்தி பரிசோதிக்கப்பட உள்ளது!

 

பிரிட்டோரியா, ஜூன் 9: தென்னாப்பிரிக்காவைச் சேர்ந்த 37 வயது பெண் ஒரே பிரசவத்தில் 10 குழந்தைகளை பெற்றெடுத்து உலக சாதனை படைத்துள்ளார்.

இதன்மூலம், இதற்கு முன் மாலி நாட்டு பெண் ஒரே பிரசவத்தில் 9 குழந்தைகளை பெற்றெடுத்த சாதனை முறியடிக்கப்பட்டுள்ளது.

ஆப்ரிக்க நாடான தென்னாப்பிரிக்காவைச் சேர்ந்த கோஷியாமி தமாரா சித்தோல் என்ற 37 வயது பெண்ணுக்கு ஏற்கனவே இரட்டை குழந்தைகள் உள்ளன. இந்நிலையில் மீண்டும் கர்ப்பம் தரித்திருந்தார். 7-ம் தேதி பிரசவ வலி ஏற்பட்டதையடுத்து பிரிட்டோரியா நகரில் உள்ள மருத்துவமனையில் அனுமதிக்கப்பட்டார்.

நேற்று அவருக்கு சிசேரியன் மூலம் 7 ஆண் குழந்தைகள், 3 பெண் குழந்தைகள் என 10 குழந்தைகள் பிறந்தன. தாயும், 10 குழந்தைகளும் நலமாக உள்ளதாக கூறப்படுகிறது.

இதற்கு முன்னர் மாலி நாட்டைச் ஹலிமா சிசி, என்ற 25 வயது இளம்பெண் கடந்த மே மாதம் ஒரே பிரசவத்தில் ஏழு குழந்தைகளை பெற்றெடுத்தது உலக சாதனையாக இருந்தது!

 

புதுடெல்லி: எய்ட்ஸ் பெண் நோயாளி ஒருவரின் உடலில் 216 நாட்கள் வரை தங்கிய கொரோனா, அடுத்தடுத்து பல உருமாற்றம் அடைந்த சம்பவம் ஆய்வாளர்களையே அதிர்ச்சிக்குள்ளாக்கி உள்ளது.

தென் ஆப்பிரிக்காவை சேர்ந்த கொரோனாவால் பாதிக்கப்பட்ட 36 வயது பெண் கடந்த சில ஆண்டுகளாக எய்ட்ஸ் நோயால் பாதிக்கப்பட்டு இருந்துள்ளார்.

கடந்த ஆண்டு செப்டம்பரில் இவருக்கு கொரோனா நோய் தொற்று ஏற்பட்டுள்ளது. பொதுவாக ஒருவரது உடலில் 15 முதல் 20 நாட்கள் மட்டுமே கொரோனா வைரஸ் தொற்று பாதிப்பு இருக்கும் என்று கூறப்படுகின்றது. ஆனால்,  எய்ட்ஸ் நோய் பாதித்த இந்தப் பெண்ணின் உடலில் சுமார் 216 நாட்கள் கொரோனா தொற்று இருந்துள்ளது.
இந்த 216 நாள்களில் சுமார் 30 முறை கொரோனா வைரஸ் உருமாற்றம் அடைந்துள்ளதாக ஆராய்ச்சியாளர்கள் கண்டறிந்துள்ளனர்.

பெண்ணின் உடலில் இருந்த புரத ஸ்பைக்கானது 13 முறை மாற்றம் அடைந்துள்ளது. வைரசில் 19 முறை மரபணு மாற்றம் நடந்துள்ளது. இந்த பெண்ணின் உடலில் இங்கிலாந்தில் கண்டறியப்பட்ட ஆல்பா வகை கொரோனா வைரஸ், தென் ஆப்பிரிக்காவில் கண்டறியப்பட்ட பீட்டா வகை உருமாற்றம் ஆகியவை இருப்பது கண்டறியப்பட்டுள்ளது.

ஆபத்து மிகுந்த இந்த வைரஸ்கள் கவலை ஏற்படுத்துவதாக இருப்பதாக ஆராய்ச்சியாளர்கள் தெரிவித்துள்ளனர். ஆனால் பெண்ணின் உடலில் இருந்து மற்றவர்களுக்கு கொரோனா தொற்று பரவியதா என்பது குறித்து சரியான விவரங்கள் தெரியவில்லை!

பாகிஸ்தானில் 2 விரைவு ரயில்கள் நேருக்கு நேர் மோதிய விபத்தில் 30 பேர் பரிதாபமாக பலியானார்கள். மேலும் பலர் காயமடைந்துள்ளதாக தகவல் வெளியாகி உள்ளது.

தெற்கு பாகிஸ்தானின் சிந்து மாகாணத்தில் கோட்கி மாவட்டத்தில் சர் சையது விரைவு ரயிலும், மில்லத் விரைவு ரயிலும் இன்று காலை நேருக்கு நேர் மோதின.

இந்தச் சம்பவத்தில் 30 பேர் பலியானதாகவும், பலர் காயமடைந்துள்ளதாகவும் கோட்கி மாவட்டத்தின் போலீஸ் அதிகாரிகள் மற்றும் மீட்புக்குழுவினர் தெரிவித்தனர். காயமடைந்தவர்கள் உடனடியாக அருகில் உள்ள மருத்துவமனையில் சிகிச்சைக்காக அனுமதிக்கப்பட்டுள்ளனர்.

தடம் புரண்டதற்கும் அடுத்தடுத்த மோதலுக்கும் என்ன காரணம் என்பது உடனடியாகத் தெரியவில்லை. சம்பவ இடத்துக்கு விரைந்த மீட்புக்குழுவின,ர் மீட்பு நடவடிக்கையில் தொடர்ந்து ஈடுபட்டுள்ளனர். இந்த சம்பவம் தொடர்பாக அதிகாரிகள் விசாரணை மேற்கொண்டு வருகின்றனர்!

சீனாவின் உகான் நகர ஆய்வகத்திலிருந்துதான் கொரோனா வைரஸ் பரவியது என அமெரிக்கா தொடர்ந்து குற்றம் சாட்டி வருகிறது.

கொரோனா வைரஸ் உகான் நகரில்தான் தோன்றியது என்பதை தொடர்ந்து சீனா மறுத்து வருகிறது.

சீனாவின் உகான் நகரில் தோன்றிய கொரோனா வைரஸ் பெருந்தொற்று, உலக நாடுகளையெல்லாம் உலுக்கி விட்டது. இன்றளவும் அதற்கு எதிராக உலகமே ஒன்றிணைந்து யுத்தம் நடத்தி வருகிறது.

கொரோனா  அறிகுறிகளைக் கொண்ட முதல் நோயாளி உகானில் 2019 டிசம்பர் 8 ஆம் தேதி பதிவு செய்யப்பட்டதாக சீனா, உலக சுகாதார நிறுவனத்திற்குத் தெரிவித்தது.

சர்வதேச ஊடகங்கள் பல உகான் நகருக்குச் சென்று செய்தி சேகரித்து விஞ்ஞானிகளைப் பேட்டிகண்டு ஆவணப் படங்களையும் வெளியிட்டு உள்ளனர்.

கொரோனா தொற்று குறித்து சீனா அறிவிப்பதற்கு பல மாதங்களுக்கு முன்னரே, அதன் உகான் நகர வைராலஜி ஆய்வக விஞ்ஞானிகள் மருத்துவ உதவியை நாடியதாக, அமெரிக்க உளவுத்துறை அறிக்கையை மேற்கோள் காட்டி, வால் ஸ்ட்ரீட் ஜெர்னல் செய்தி வெளியிட்டு இருந்தது.

இந்த நிலையில்  கொரோனா  தொற்றுநோயின் மூலத்தை கண்டுபிடிப்பதற்கான முயற்சிகளை தீவிரப்படுத்துமாறு  அமெரிக்க ஜனாதிபதி ஜோ பைடன் புலனாய்வு அமைப்புகளுக்கு உத்தரவிட்டுள்ளார். மேலும் 90 நாட்களுக்குள் இது தொடர்பான அறிக்கை தாக்கல் செய்யுமாறு கேட்டுக் கொண்டார்.

ஜோ பைடன் தேவைப்பட்டால்,  மேலதிக விசாரணையில்,  சீனாவிடம் சில கேள்விகளை முன் வைப்பது குறித்தும், விசாரணை குழுவிடம் கூறியுள்ளார்.

கொரோனா வைரஸ்  எங்கிருந்து பரவியது என்பதை ஆராயும் முயற்சியில் எங்கள் தேசிய ஆய்வகங்கள் மற்றும் எங்கள் அரசாங்கத்தின் பிற ஏஜென்சிகள், உளவுத்துறையினர், இதற்கான நடவடிக்கையை தீவிரப்படுத்த வேண்டும் என்றும் கேட்டுள்ளேன். இது தொடர்பான பணிகள் குறித்து நாடாளுமன்ற உறுப்பினர்களிடம் முழுமையாக தெரிவிக்கும்படி நான் புலனாய்வு பிரிவிடம் கூறியுள்ளேன்.

முழுமையான, வெளிப்படையான, சான்றுகளை அடிப்படையாகக் கொண்ட சர்வதேச விசாரணையில் பங்கேற்கவும், கொரோனா தொடர்புடைய அனைத்து புள்ளிவிவரங்கள்  மற்றும் ஆதாரங்களை வழங்கவும் சீனாவிற்கு அழுத்தம் கொடுக்க அமெரிக்கா, ஒத்த எண்ணம் கொண்ட  உலகின் நட்பு நாடுகளுடன் தொடர்ந்து செயல்படும்  என அறிக்கையில் ஜோ பைடன் கூறி உள்ளார்.

இது தொடர்பான விசாரணை குறித்த விவரங்களை உடனுக்குடன் நாடாளுமன்றத்தில் தெரிவிக்க வேண்டும்மென்றும், இதன் தரவுகள் அனைத்தும் எந்தவொரு ஒளிவுமறைவுமின்றி வெளிப்படையாக கையாளப்படும் என்றும் அதில் குறிப்பிடுள்ளார்.

இந்த நிலையில் உலக சுகாதார அமைப்பு சீனாவை விசாரிப்பது போல் அமெரிக்காவையும் விசாரிக்க வேண்டும் என சீனா கூறி உள்ளது.

ஜோ பைடனின் திடீர் உத்தரவைக் கடுமையாக எதிர்த்துள்ள சீனா, அமெரிக்கா மீது கடுமையான குற்றம்சாட்டுகளை முன்வைத்துள்ளது. இது தொடர்பாக, கருத்து தெரிவித்துள்ள சீனா வெளியுறவுத்துறை அமைச்சகத்தின் செய்தித்தொடர்பாளரான ஜாவோ லிஜியன், "அமெரிக்கா அரசு உள்நோக்கத்துடனேயே இந்த விசாரணைக்கு உத்தரவிட்டுள்ளது. ஈராக்குக்கு கோடிக்கணக்கில் ஆயுதங்கள் விற்கப்பட்டது குறித்து விமர்சனம் எழுந்துள்ள சூழலில், அதை திசைமாற்றுவதற்காகவே சீனா மீது அவதூறு கருத்துக்களை திட்டமிட்டு தெரிவித்து இதைச் செயல்படுத்தியுளார் ஜோ பைடன். உலகமே இந்தப் பெருந்தொற்றை எதிர்த்து போராடி வரும் சூழலில் உலக சுகாதார அமைப்பை அவமதித்தது மட்டுமில்லாமல், நாடுகளுக்கிடையேயான ஒற்றுமையைட் சீர்குலைக்கிறார் பைடன்.

கொரோனா தொற்றின் தொடக்கம் குறித்து எங்களுக்கு அமெரிக்காவின் மீது சந்தேகம் உள்ளதால் உலக சுகாதார அமைப்பு சீனாவை விசாரிப்பது போல் அமெரிக்காவையும் விசாரிக்க வேண்டும். உலகமெங்குமுள்ள அமெரிக்காவுக்கு சொந்தமான ஆய்வகங்களில் நிபுணர்கள் ஆய்வு மேற்கொள்ள வேண்டும். அதுவே வெளிப்படையான விசாரணையாக இருக்கும் என கூறி உள்ளார்.

 

சிங்கப்பூர், மே 24: மூச்சுக் காற்று மூலம் ஒருவருக்கு கொரோனா தொற்று இருக்கிறதா இல்லையா என்பதைக் கண்டறியும் கருவியை சிங்கப்பூர் தேசியப் பல்கலைக்கழகத்தின் இந்தியப் பேராசிரியர் தலைமையிலான குழு கண்டுபிடித்துள்ளது.

இதற்கு சிங்கப்பூர் அரசு அனுமதி வழங்கியுள்ளது. இந்தக் கருவிக்கு ‘பிரீபென்ஸ் கோ’ எனப் பெயரிடப்பட்டுள்ளது.

சிங்கப்பூரில் உள்ள புகழ்பெற்ற சிங்கப்பூர் தேசிய பல்கலைக்கழகத்தின் 3 மாணவர்கள், இந்தியப் பேராசிரியர் அடங்கிய குழு கண்டுபிடித்த இந்தக் கருவி மூலம் ஒருவருக்கு கொரோனா தொற்று இருக்கிறதா என்பதை ஒரு நிமிடத்துக்குள் கண்டுபிடிக்க முடியும்.

சிங்கப்பூர் தேசிய பல்கலைக்கழக்தைச் சேர்ந்த இந்தியப் பேராசிரியர் டி வெங்கி என்ற வெங்கடேசன், அவரின் மாணவர்கள் டாக்டர் ஜியா ஹூனன், டு ஃபாங், வேனே வீ ஆகியோர் இந்த பிரீத்தா நிக்ஸ் நிறுவனத்தைத் தொடங்கியுள்ளனர்.

இந்த நிறுவனத்துக்கு சிங்கப்பூர் தேசிய பல்கலைக்கழகம் ஆதரவு அளிக்கிறது. புதிய கண்டுபிடிப்புகள், ஸ்டார்ட் அப்களுக்குத் தேவையான ஊக்கத்தையும் நிதியுதவியையும் வழங்குகிறது.

சிங்கப்பூர் தேசிய பல்கலைக்கழகத்தின் ப்ரீத்தா நிக்ஸ் நிறுவனம் சார்பில் இந்தக் கருவி கண்டுபிடிக்கப்பட்டது என சேனல் நியூஸ் ஏசியா செய்தி வெளியிட்டுள்ளது.

இந்தத் தொழில்நுட்பத்தை சிங்கப்பூர் சுகாதாரத் துறையுடன் இணைந்து ப்ரீத்தா நிக்ஸ் நிறுவனம் பரிசோதனை செய்து வருகிறது.

சிங்கப்பூருக்குள் வரும் வெளிநாட்டுப் பயணிகளுக்கு இந்த ‘ப்ரீபென்ஸ் கோ’ கரோனா மூச்சுப் பரிசோதனைக் கருவி மூலம் பரிசோதனை செய்யப்படும் எனத் தெரிவிக்கப்பட்டுள்ளது.

சிங்கப்பூருக்குள் நுழையும் பிற நாட்டவருக்குக் கண்டிப்பாக ஆன்டி ரேபிட் பரிசோதனை செய்யப்பட்டு வருகிறது. அதோடு சேர்த்து இந்த ப்ரீபென்ஸ் கோ பரிசோதனையும் நடத்தப்படும்.

தற்போது நடைமுறையில் இருக்கும் ஆன்டி ரேபிட் டெஸ்ட் கருவியில் கரோனா பரிசோதனை செய்தால் 30 நிமிடங்களுக்குள் முடிவு கிடைக்கும். ஆர்டிபிசிஆர் பரிசோதனையில் சில மணி நேரங்களில் முடிவு கிடைக்கும்.

ஆனால், ப்ரீபென்ஸ் கோ கோவிட் பரிசோதனைக் கருவி மூலம் ஒருவரின் மூச்சுக் காற்றைச் செலுத்தி பரிசோதனை செய்தால், ஒரு நிமிடத்துக்குள் முடிவு கிடைத்துவிடும். இந்த ஸ்பெக்டோமீட்டர் ஒருவரின் மூச்சுக் காற்றைப் பரிசோதித்து அந்தக் காற்றில் தீங்கு விளைவிக்கும் நுண்கிருமிகள் இருக்கிறதா எனக் கண்டறிந்து சில வினாடிகளில் முடிவைக் கூறிவிடும். இந்தக் கருவியில் பாசிட்டிவ் வந்துவிட்டால் கண்டிப்பாக பிசிஆர் பரிசோதனைக்கு உட்பட வேண்டும்.

இந்தக் கருவியில் இருக்கும் சிறிய குழாயைப் பரிசோதனைக்கு உட்படுபவர் வாயில் வைத்து மூச்சுக் காற்றை அழுத்தமாகச் செலுத்த வேண்டும். அவரின் மூச்சுக் காற்று இந்தக் கருவியில் சேமிக்கப்பட்டு, ஸ்பெக்டோமீட்டர் அடுத்த சில வினாடிகளில் மூச்சுக் காற்றில் கரோனா வைரஸ் கிருமி இருக்கிறதா அதாவது பாசிட்டிவா அல்லது நெகட்டிவா என்பதைக் கூறிவிடும்!

வாஷிங்டன்: கொரோனா வைரஸ் பரவலை தடுக்க ஒரே வழியாக உள்ள தடுப்பூசியை மக்களுக்கு செலுத்தும் நடவடிக்கையில் உலக நாடுகள் தீவிரம் காட்டி வருகின்றன. அமெரிக்காவிலும் கொரோனா தடுப்பூசி செலுத்தும் பணிகள் தீவிரமடைந்துள்ளது. இதனால், அந்நாட்டில் கொரோனா வைரஸ் பரவல் பெருமளவில் குறைந்துள்ளது.

அமெரிக்காவின் மொத்த மக்கள் தொகையில் 46 சதவிகிதம் பேருக்கு கொரோனா தடுப்பூசியின் முதல் டோஸ் செலுத்தப்பட்டுள்ளது. அதாவது, சுமார் 15 கோடியே 40 லட்சம் பேருக்கு கொரோனா தடுப்பூசியின் முதல் டோஸ் செலுத்தப்பட்டுள்ளது. அதேவேளை 11 கோடியே 70 லட்சம் பேருக்கு கொரோனா தடுபூசியின் இரண்டு டோஸ்களும் செலுத்தப்பட்டு விட்டது.

இதற்கிடையில், கொரோனா பரவலைத் தடுப்பதில் முக்கியமானதாக கருத்தப்படும் முகக்கவசம் அணிதல் அமெரிக்காவில் கட்டாயமாக்கப்பட்டுள்ளது. பொது இடங்களுக்கு செல்வோர்  கட்டாயம் முக்கவசம் அணிய வேண்டும் என்ற உத்தரவு அமலில் உள்ளது.

இந்நிலையில், அமெரிக்காவில் கொரோனா தடுப்பூசியின் இரண்டு டோஸ்களையும் செலுத்திக்கொண்டவர்கள் பொது இடங்களில் முக்ககவசம் அணிய கட்டாயத்தேவையில்லை என்று அந்நாட்டின் நோய் கட்டுப்பாட்டு மற்றும் தடுப்பு மையம் இன்று அதிரடியாக அறிவித்துள்ளது. மேலும், 6 அடி சமூக இ