loader

All News

லண்டன்: கொரோனா வைரசுக்கு எதிரான தடுப்பு மருந்துகளை அமெரிக்கா, ரஷியா, சீனா, இங்கிலாந்து உள்ளிட்ட நாடுகள் உருவாக்கி பொது மக்களுக்கு செலுத்தி வருகின்றன.

ஐரோப்பிய நாடுகள், தடுப்பு மருந்துகளை வாங்கி தங்களது குடிமக்களுக்கு செலுத்தி வருகிறது. ஆனால் ஏழை நாடுகளால் தடுப்பு மருந்துகளை வாங்க முடியாததால் அவர்களுக்கு உதவ உலக சுகாதார அமைப்பு கோவாக்ஸ் திட்டத்தை உருவாக்கியது.

பல்வேறு நாடுகள் இணைந்துள்ள இந்தத் திட்டத்தின் மூலம் தடுப்பு மருந்துகள் ஏழை நாடுகளுக்கு அனுப்பப்பட்டன. இதையடுத்து அந்த நாட்டு மக்களுக்கு தடுப்பூசி போடப்பட்டன.

இந்த நிலையில் கொரோனா தடுப்பு மருந்து தட்டுப்பாடு காரணமாக 60 நாடுகள் பாதிக்கப்பட்டுள்ளன. இந்தியாவில் கொரோனா பரவல் மீண்டும் அதிகரித்துள்ளதால் தடுப்பு மருந்து ஏற்றுமதியை நிறுத்த உத்தரவிட்டுள்ளது.

இதனால் அஸ்ட்ரா செனகா நிறுவனத்தின் தடுப்பு மருந்தின் பெரும் பகுதியை உற்பத்தி செய்யும் இந்தியாவின் சீரம் இன்ஸ்டிடியூட்டில் இருந்து ஏற்றுமதி நிறுத்தப்பட்டுள்ளது.

இதையடுத்து உலக சுகாதார அமைப்பின் கோவாக்ஸ் திட்டத்துக்கு அனுப்பப்பட்டும் தடுப்பு மருந்து அளவு பெரும் அளவில் குறைந்து விட்டது. உலகில் உள்ள சில ஏழை நாடுகள் உள்பட 60 நாடுகளில் கொரோனா தடுப்பு மருந்தின் முதல் டோஸ் போடப்படுவது நிறுத்தப்பட்டும் சூழ்நிலை உள்ளது.

மேலும் முதல் டோஸ் செலுத்தி கொண்டவர்களுக்கு 2-வது டோஸ் செலுத்த மருந்து இல்லை. தடுப்பு மருந்து தட்டுப்பாடு காரணமாக அதன் வினியோகம் கடந்த 5-ஆம் தேதி முதல் நிறுத்தப்பட்டுள்ளது.

மேலும் அனைத்து வினியோகங்களும் ஜூன் மாதம் வரை நிறுத்தப்படலாம். இதனால் ரஷியா மற்றும் சீனாவின் தடுப்பு மருந்துகளை வாங்கும் உலக நடவடிக்கைகளை சுகாதார அமைப்பு விரைவுப்படுத்தலாம் என்று தகவல் வெளியாகி உள்ளது!

 

நாம்பென்: கொரோனா பாதிப்பு மீண்டும் அதிகரித்துள்ளதால் உலக நாடுகள் அச்சத்தில் உள்ளன.

தென்கிழக்கு ஆசிய நாடான கம்போடியாவிலும் கொரோனா பரவல் வேகம் அதிகரித்துள்ளது. இங்கு உலகின் மிகப்பெரிய இந்து கோவிலான அங்கோர்வாட் ஆலயம் உள்ளது.

இந்த ஆலயத்துக்கு உள்நாட்டில் மட்டுமல்லாமல், வெளிநாட்டு பயணிகளும் ஏராளமானோர் வந்து வழிபாடுவார்கள். இது முக்கிய சுற்றுலா தலங்களில் ஒன்றாகவும் இருக்கிறது.

கம்போடியாவில் இதுவரை 3 ஆயிரத்து 28 பேர் கொரோனாவால் பாதிக்கப்பட்டுள்ளனர். கடந்த 24 மணி நேரத்தில் மட்டும் 113 பேருக்கு நோய் தொற்று இருப்பது உறுதி செய்யப்பட்டுள்ளது. இதுவரை 23 பேர் கொரோனாவுக்கு பலியாகி உள்ளனர்.

தற்போது கம்போடியாவில் கொரோனா நோய் தொற்று பரவல் அதிகரித்து வருவதால் அதைத் தடுக்க  அந்நாட்டு அரசு பல்வேறு கட்டுப்பாடுகளை விதித்துள்ளது.

இதன் ஒரு பகுதியாக அங்கோர்வாட் ஆலயத்துக்குப் பொதுமக்கள் செல்லத் தடை விதிக்கப்பட்டுள்ளது. உள்நாட்டினர் மட்டுமல்லாமல் வெளிநாட்டினருக்கும் இந்தத் தடை பொருந்தும் என்று அறிவிக்கப்பட்டுள்ளது.

வரும் 20-ஆம் தேதி வரை இந்தத் தடை அமலில் இருக்கும் என்று கம்போடியாவின் தொல்லியல் துறை தெரிவித்துள்ளது!

 

ஜகார்த்தா: இந்தோனேசியாவின் கிழக்குப் பகுதியில் உள்ள நுசா தெங்கரா மாகாணத்தில் நேற்று முன்தினம் இரவு தொடங்கி விடிய விடிய கனமழை கொட்டித் தீர்த்தது. இதன் காரணமாக அங்குள்ள பல கிராமங்களில் கடும் வெள்ளப்பெருக்கு ஏற்பட்டது. தொடர் மழை காரணமாக அங்குள்ள ஆறுகளில் இருந்து சேறும் சகதியுமாக வெள்ள நீர் வெளியேறி ஊர்களுக்குள் புகுந்து.

கனமழை மற்றும் வெள்ளத்தை தொடர்ந்து லாமெனெலே என்ற மலை கிராமத்தில் பயங்கரமான நிலச்சரிவு ஏற்பட்டது. சுமார் 50 வீடுகள் மீது மண் சரிந்து விழுந்தது‌. இதில் அந்த வீடுகளில் இருந்த ஏராளமானோர் உயிரோடு மண்ணில் புதைந்தனர்.

உடனடியாக அங்கு மீட்பு பணிகள் முடுக்கிவிடப்பட்டன. போலீசார் மற்றும் ராணுவ வீரர்களுடன் உள்ளூரை சேர்ந்த 100-க்கும் மேற்பட்ட பொதுமக்களும் தீவிர மீட்பு பணியில் ஈடுபட்டனர். எனினும் 38 பேரை பிணமாகத்தான் மீட்க முடிந்தது. பலத்த காயங்களுடன் 9 பேர் மீட்கப்பட்டனர். இந்த நிலச்சரிவில் சிக்கி மேலும் பலர் மாயமாகியுள்ளனர். அவர்களை தேடும் பணி முழுவீச்சில் நடந்து வருகிறது.

இதனிடையே அருகிலுள்ள ஓயாங் பாயாங் மற்றும் வாய்புராக் ஆகிய கிராமங்களில் 6 பேர் வெள்ளத்தில் அடித்துச் செல்லப்பட்டு உயிரிழந்தனர்.‌ அவர்களது உடல்களை மீட்பு குழுவினர் மீட்டனர்.

மழை வெள்ளம் காரணமாக அங்குள்ள பல கிராமங்களில் மின் இணைப்பு முற்றிலுமாக துண்டிக்கப்பட்டுள்ளது. மேலும் சாலைகளில் வெள்ளம் பெருக்கெடுத்து ஓடுவதால் சாலை போக்குவரத்து முழுவதுமாக தடைபட்டுள்ளது.‌ இதன் காரணமாக மக்களின் இயல்பு வாழ்க்கை பெரிதும் முடங்கியுள்ளது!

 

புதுடெல்லி: இலங்கையில் 1983-ஆம் ஆண்டு தொடங்கி 2009-ஆம் ஆண்டு வரையில் சிங்கள ராணுவத்துக்கும், விடுதலைப்புலிகளுக்கும் இடையே உள்நாட்டுப்போர் நடந்தது. இந்தப் போரின் இறுதிக்கட்டத்தில் மனித உரிமை மீறல்கள் மிகச்சாதாரணமாக நடந்தன. போரில்லா பிரதேசங்களில்கூட அப்பாவித்தமிழ் மக்கள் கொத்து கொத்தாக இனப்படுகொலை செய்யப்பட்டனர். தமிழ்ப்பெண்கள் பலாத்காரம் செய்யப்பட்டனர்.

இந்த மானுட சோகத்துக்கு நீதி கேட்டு இலங்கைக்கு எதிராக ஜெனீவாவில் ஐ.நா. மனித உரிமை கவுன்சிலின் 46-வது அமர்வில் இங்கிலாந்து, ஜெர்மனி, மலாவி, மாண்டிநீக்ரோ மற்றும் வடக்கு மாசிடோனியா சார்பில் ஒரு தீர்மானம் கொண்டு வரப்பட்டது. இந்த தீர்மானத்தை இந்தியா ஆதரிக்க வேண்டும் என்று தி.மு.க. தலைவர் மு.க.ஸ்டாலின் மற்றும் அரசியல் தலைவர்கள் கோரிக்கை விடுத்தனர்.

இந்த பிரச்சினையை நேற்று காலை நாடாளுமன்ற மாநிலங்களவையில் அ.தி.மு.க. எம்.பி. தம்பித்துரை  பேசினார். அப்போது அவர், “இலங்கையில் கடந்த காலத்திலும். தற்போதும் சிறுபான்மை தமிழ் மக்களுக்கு எதிராக இழைக்கப்படுகிற குற்றச்செயல்கள் மீது விசாரணை நடத்த வலியுறுத்தும் ஐ.நா. மனித உரிமைகள் கவுன்சில் தீர்மானத்துக்கு ஆதரவாக வாக்கு அளிக்க வேண்டும். இதுபற்றி அங்குள்ள இந்திய பிரதிநிதிகளுக்கு மத்திய அரசு அறிவுறுத்த வேண்டும் என்ற கோரிக்கையை விடுக்கிறோம்என குறிப்பிட்டார்.

மேலும், “பிரதமர் மோடி தமிழ்நாட்டுக்கு வந்தபோது, இலங்கை தமிழ்மக்களின் பிரச்சினைகள் கவனத்தில் கொள்ளப்படும், தமிழ் மக்களின் நலன்கள் பாதுகாக்கப்படும் என்று உறுதி அளித்தார். அந்த வாக்குறுதியை, ஜெனீவாவில் உள்ள இந்திய பிரதிநிதிகள் பின்பற்ற வேண்டும்என வலியுறுத்தினார்.

இந்த நிலையில், ‘இலங்கையில் நல்லிணக்க பொறுப்புக்கூறல் மற்றும் மனித உரிமைகளை மேம்படுத்துதல்என்ற இந்த தீர்மானம், ஜெனீவா நகரில் ஐ.நா. மனித உரிமைகள் கவுன்சிலில் நேற்று பிற்பகலில் ஓட்டெடுப்புக்கு விடப்பட்டது. இதில் தீர்மானத்துக்கு ஆதரவாக, 47 நாடுகளில் 22 நாடுகள் ஓட்டுப்போட்டன. 11 நாடுகள் தீர்மானத்தை எதிர்த்து வாக்கு அளித்தன.

இந்தியா உள்ளிட்ட 14 நாடுகள் ஓட்டெடுப்பில் பங்கேற்காமல் புறக்கணித்தன. தீர்மானத்துக்கு ஆதரவாக கூடுதல் எண்ணிக்கையிலான நாடுகள் ஓட்டு போட்டதால், தீர்மானம் நிறைவேறியது. இது இலங்கை உள்நாட்டுப்போரால் பாதிப்புக்குள்ளான உலகமெங்கும் உள்ள இலங்கை தமிழர்களுக்கு சற்றே ஆறுதலைத் தந்துள்ளது!

 

 

 

 

 

வாஷிங்டன்: அமெரிக்காவின் கொலராடோ மாகாணத்தில் பவுல்டர் பகுதியில் சூப்பர் மார்க்கெட் ஒன்று செயல்பட்டு வருகிறது. இங்கு துப்பாக்கியுடன் புகுந்த மர்ம நபர் ஒருவர், திடீரென சரமாரியாக துப்பாக்கிச்சூடு நடத்தினார். இதனால் அங்கிருந்த மக்கள் அலறியடித்தபடி ஓடினர்.

இது குறித்து தகவலறிந்து அங்கு போலீசார் விரைந்து வந்தனர். சூப்பர் மார்க்கெட்டில் வேலை செய்யும் பணியாளர்கள் மற்றும் பொதுமக்கள் உள்ளே இருந்ததால், போலீசார் அந்த நபரிடம் பேச்சுவார்த்தை நடத்த முயன்றனர். அப்போது அந்த நபர் திடீரென துப்பாக்கியால் சுடத் தொடங்கினார்.

இந்த துப்பாக்கிச் சண்டையில் ஒரு போலீஸ் அதிகாரி உள்பட 10 பேர் உயிரிழந்ததாக காவல்துறையினர் தெரிவித்துள்ளனர். இது குறித்து பவுல்டர் காவல்துறை அட்டார்னி மைக்கேல் டஹர்டி கூறுகையில், “இது மிகவும் வேதனை மிகுந்த நாள். தங்கள் அன்றாட ஷாப்பிங்கிற்காக வந்த பொதுமக்கள் இன்று உயிரிழந்துள்ளனர். அவர்களின் உயிரிழப்புக்கு நிச்சயம் நீதி கிடைக்க வழி செய்வோம்என்று தெரிவித்துள்ளார்!

உலகில் மக்கள் மகிழ்ச்சியாக வாழும் நாடுகளின் பட்டியலை ஐ.நா. வெளியிட்டுள்ளது.

சுகாதாரம், கல்வி, வேலை உள்ளிட்ட பல்வேறு அம்சங்களின் அடிப்படையில் 149 நாடுகள் இதில் மதிப்பிடப்பட்டு வரிசைப்படுத்தப்பட்டுள்ளன.

இந்தப் பட்டியலில் பின்லாந்து முதலிடத்தில் உள்ளது. டென்மார்க், சுவிட்சர்லாந்து, ஐஸ்லாந்து, நெதர்லாந்து, நார்வே, ஸ்வீடன், லக்ஸம்பர்க், நியூசிலாந்து, ஆஸ்திரியா ஆகிய நாடுகள் அடுத்தடுத்த இடங்களில் முறையே இடம்பெற்றுள்ளன. 

இந்தப் பட்டியலில் மலேசியா 81-வது இடத்தில் உள்ளது. சிங்கப்பூர் 32-வது இடத்திலும், அமெரிக்கா 19-வது இடத்திலும் உள்ளது. இப்பட்டியலில் இறுதி இடத்தில் ஆப்கானிஸ்தான் இடம்பெற்றுள்ளது!

 

மெக்சிகோ சிட்டி: உலக அளவில் போதை பொருட்களை கடத்தும் நாடுகளின் வரிசையில் மெக்சிகோவும் ஒன்று.  இங்கு போதை பொருள் கடத்தலில் ஈடுபடும் கும்பல் எண்ணிக்கை அதிகம். அவர்கள் தங்களுக்கு எதிராக நடக்கும் அரசு அதிகாரிகள், அரசியல்வாதிகளை விட்டு வைப்பதில்லை.

இந்த நிலையில், அந்நாட்டின் பாதுகாப்பு அமைச்சகத்தின் பாதுகாப்பு வாகனம் ஒன்றின் மீது மர்ம கும்பல் ஒன்று திடீரென தாக்குதல் நடத்தியுள்ளது.

லானோ கிராண்ட் மாவட்டத்தின் கோட்டெபெக் ஹரினாஸ் நகராட்சிக்கு உட்பட்ட பகுதியில் நடத்தப்பட்ட இந்த தாக்குதலில், பாதுகாப்பு அமைச்சகத்தின் 8 அதிகாரிகள் கொல்லப்பட்டுள்ளனர்.  இதுதவிர மெக்சிகோ மாநில வழக்கறிஞர் அலுவலக ஊழியர்கள் 5 பேர் கொல்லப்பட்டனர்.

இதனை, மண்டல பாதுகாப்பு அமைச்சக செய்தி தொடர்பு அதிகாரி வெளியிட்டுள்ள அறிக்கை தெரிவிக்கின்றது.

இதனையடுத்து, தாக்குதல் நடத்தியவர்களைத் தேடும் பணி தொடர்கிறது!

வாஷிங்டன்: அமெரிக்காவின் மினசோட்டா மாகாணத்தின் மினியாபோலீஸ் நகரைச் சேர்ந்த ஆப்பிரிக்க அமெரிக்கரான ஜார்ஜ் பிளாய்ட், கடந்த ஆண்டு மே மாதம் 25-ஆம் தேதி மினியாபோலீஸ் நகரில் உள்ள ஒரு கடைக்கு சென்று பொருட்களை வாங்கினார்.‌ அப்போது அவர் வழங்கிய பணத்தில் 20 டாலர்  கள்ளநோட்டு இருந்ததாக கடையின் ஊழியர் போலீசுக்கு தகவல் கொடுத்தார். அதன் பேரில் போலீஸ் அதிகாரி டெரிக் சாவின் தலைமையில் 4 போலீசார் அங்கு விரைந்தனர்.‌ பின்னர் அவர்கள் புகார் தொடர்பாக விசாரிக்க அழைத்தபோது பிளாய்ட் போலீஸ் வாகனத்தில் ஏற மறுத்ததாகத் தெரிகிறது.

இதையடுத்து போலீஸ் அதிகாரி டெரிக் சாவின் ஜார்ஜ் பிளாய்ட்டை தரையில் கிடத்தி அவர் கழுத்தை கால் முட்டியால் அழுத்தினார். என்னால் மூச்சுவிட முடியவில்லை எழுந்திருங்கள் என ஜார்ஜ் பிளாய்ட் கெஞ்சிய போதும் விடவில்லை. சிறிது நேரத்தில் ஜார்ஜ் பிளாய்ட் உயிரிழந்தார்.

ஜார்ஜ் பிளாய்ட் கழுத்தில் போலீஸ் அதிகாரி கால் முட்டியை வைத்து அழுத்தியது, இதனால் அவர் மூச்சுவிட முடியாமல் திணறி உயிரிழந்தது தொடர்பான வீடியோ சமூக வலைதளங்களில் பரவி வைரலானது.

இதனைத் தொடர்ந்து ஜார்ஜ் பிளாய்டின் சாவுக்கு நீதி கேட்டு அமெரிக்கா முழுவதும் பெரும் போராட்டம் வெடித்தது. இனவெறிக்கு எதிராகவும் போலீசாரின் காட்டுமிராண்டித்தனத்தை கண்டித்தும் நடந்த இந்தப் போராட்டங்கள் அமெரிக்காவையே உலுக்கியது.

இதற்கிடையே ஜார்ஜ் பிளாய்டின் குடும்பத்தினர் இந்த சம்பவம் தொடர்பாக போலீஸ் அதிகாரி டெரிக் சாவின் உள்பட 4 போலீசார் மற்றும் மினியாபோலீஸ் நகர நிர்வாகத்துக்கு எதிராக நீதிமன்றத்தில் வழக்கு தொடர்ந்தனர்.

இதையடுத்து டெரிக் சாவின் உள்பட 4 போலீசாரும் பணிநீக்கம் செய்யப்பட்டு, கொலை வழக்கில் கைது செய்யப்பட்டனர். டெரிக் சாவின் மீது கொலைக் குற்றச்சாட்டு பதிவு செய்யப்பட்டது.

இதில் டெரிக் சாவின் மீதான விசாரணை மினசோட்டாவின் ஹென்னெபின் நகரில் உள்ள மாவட்ட நீதிமன்றத்தில் கடந்த வாரம் தொடங்கியது.‌ அப்போது குற்றத்தை ஒப்புக்கொள்ள மறுத்த டெரிக் சாவின் தனது போலீஸ் பயிற்சியை முறையாகப் பின்பற்றியதாகக் கூறினார். அதனைத் தொடர்ந்து நீதிபதி வழக்கு விசாரணையை ஒத்திவைத்தார்.‌

இந்த வழக்கில் டெரிக் சாவின் மீதான குற்றச்சாட்டுகள் நிரூபிக்கப்பட்டால் அவருக்கு அதிகபட்சமாக 65 ஆண்டுகள் வரை சிறை தண்டனை விதிக்கப்படலாம் என தகவல்கள் தெரிவிக்கின்றன.

இந்நிலையில், ஜார்ஜ் பிளாய்ட் கொலைவழக்கில் மினியாபோலீஸ் நகர நிர்வாகத்துக்கு எதிராக தொடரப்பட்ட வழக்கில் ஜார்ஜ் பிளாய்ட் குடும்பத்துக்கு 27 மில்லியன் டாலர் நிவாரணமாக வழங்க மினியாபோலீஸ் நகர அதிகாரிகள் ஒப்புதல் அளித்துள்ளனர்.

இதுகுறித்து ஜார்ஜ் பிளாய்ட் குடும்பத்தின் வக்கீல் பெஞ்சமீன் கிரம்ப் கூறுகையில், “அமெரிக்க வரலாற்றில் ஒரு தவறான மரணத்துக்கான வழக்கில் பாதிக்கப்பட்ட குடும்பத்திற்கு ஒதுக்கப்படும் மிகப்பெரிய நிவாரணம் இது” என்றார்.

ஜார்ஜ் பிளாய்டின் சகோதரி பிரிட்ஜெட் பிளாய்ட் கூறுகையில், “எனது சகோதரர் ஜார்ஜ் பிளாய்டின் நீதிக்கான பயணத்தின் இந்தப் பகுதி சுமுகமாக தீர்க்கப்பட்டதில் மகிழ்ச்சி” என தெரிவித்தார்!

 

வாஷிங்டன்: தென்கிழக்கு ஆசிய நாடான மியான்மரில் ஜனநாயக ரீதியில் தேர்ந்தெடுக்கப்பட்ட அரசைக் கவிழ்த்து ஆட்சி அதிகாரத்தை ராணுவம் கைப்பற்றியுள்ளது.அந்த நாட்டின் தலைவர் ஆங் சான் சூகி, அதிபர் வின் மைன்ட் உள்பட 100-க்கும் மேற்பட்ட அரசியல் தலைவர்களை ராணுவம் கைது செய்து சிறை வைத்துள்ளது.

கடந்த ஆண்டு நவம்பரில் நடந்த பொதுத்தேர்தலில் மோசடி நடந்திருப்பதாக குற்றம்சாட்டி, ஆட்சிக்கவிழ்ப்பை நியாயப்படுத்தி கொண்டிருக்கிறது மியான்மர் ராணுவம்.

ஆனால் மியான்மர் மக்கள் ராணுவ ஆட்சியை ஏற்றுக்கொள்ளவில்லை. நாட்டில் ஜனநாயகம் மீட்கப்பட வேண்டும் என்று கோரி ஒரு மாதத்துக்கும் மேலாகத் தொடர் போராட்டங்களில் ஈடுபட்டுள்ளனர்.

மக்களின் இந்த தன்னெழுச்சி போராட்டம் சர்வதேச நாடுகளை மியான்மர் ராணுவத்துக்கு எதிராகத் தூண்டுவதால் இது ராணுவ ஆட்சியாளர்களுக்கு தலைவலியாக அமைந்துள்ளது. எனவே மக்களின் போராட்டங்களை ராணுவம் இரும்புக்கரம் கொண்டு ஒடுக்கி வருகிறது.‌

போராட்டக்காரர்கள் மீது துப்பாக்கிச் சூடு நடத்தி அவர்களைக் கொன்று குவித்து வருகிறது. ஆட்சிக் கவிழ்ப்பு நடந்த பிப்ரவரி 1 முதல் இப்போது வரை ராணுவம் நடத்திய துப்பாக்கி சூட்டில் 70-க்கும் அதிகமான போராட்டக்காரர்கள் பலியாகியுள்ளனர். ஆனாலும் ராணுவத்தின் இந்த அடக்குமுறையை மீறியும் மியான்மரில் நாளுக்கு நாள் போராட்டம் தீவிரமடைந்து வருகிறது.

இந்த நிலையில், ராணுவ ஆட்சி மற்றும் வன்முறை காரணமாக  நாடு திரும்ப முடியாமல் தவிக்கும் மியான்மர் நாட்டு மக்களுக்குத் தற்காலிக அடைக்கலம் அளிக்க தயராக இருப்பதாக அமெரிக்கா தெரிவித்துள்ளது.

தீவிர ஆய்வுக்கு பிறகு  'தற்காலிக பாதுகாக்கப்பட்ட நிலை' என்ற முடிவின் கீழ் மியான்மர் நாட்டவர்களுக்கு அடைக்கலம் அளிக்க முடிவு செய்யப்பட்டு இருப்பதாக  உள்நாட்டுப் பாதுகாப்புத் துறை செயலாளர் அலெஜான்ட்ரோ மயோர்காஸ் தெரிவித்தார்.  இதன்படி, மியான்மர் மக்கள்  தற்காலிகமாக அமெரிக்காவிலேயே இருக்க முடியும்!

இந்தியாவில் ‘கோவிஷீல்ட்’, ‘கோவாக்சின்’ என்ற இரண்டு தடுப்பூசிகள் தயாரிக்கப்பட்டு பயன்பாட்டிற்கு வந்துள்ளது. இதில், கோவிஷீல்ட் தடுப்பூசியை சீரம் நிறுவனம், ஆக்ஸ்ஃபோர்டு பல்கலைக்கழகம் மற்றும் அஸ்ட்ராஜெனெகாவுடன் இணைந்து தயாரித்திருந்தது.

இந்தநிலையில் கொரோனா தடுப்பூசியை தங்கள் நாட்டிற்கு வழங்குமாறு கம்போடியா பிரதமர் ஹன் சென், இந்திய பிரதமர் மோடியிடம் கோரிக்கை விடுத்தார்.

அதனடிப்படையில் கடந்த பிப்ரவரி 6-ஆம் தேதி, கம்போடியாவிற்கு ஒரு லட்சம் தடுப்பூசிகளை அனுப்ப இந்தியா ஒப்புதல் அளித்தது. அதனையடுத்து கம்போடியாவிற்கு தடுப்பூசி அனுப்பப்பட்டது.

இந்நிலையில் கம்போடியா பிரதமர் ஹன் சென், அவரது மனைவி, அந்த நாட்டின் சுகாதாரத்துறை அமைச்சர் உள்ளிட்டோர், இந்தியாவில் தயாரிக்கப்பட்ட கோவிஷீல்ட் தடுப்பூசியைச் செலுத்திக்கொண்டுள்ளனர்.

இந்தியாவின் தடுப்பூசியை முதல்முறையாக வெளிநாட்டுப் பிரதமர் ஒருவர் செலுத்திக்கொண்டுள்ளார் என்பது குறிப்பிடத்தக்கது!

 

ஹூஸ்டன்: கொரோனாவுக்கு எதிரான போராட்டத்தை வெற்றிகரமாக நடத்தி வருகிற இந்தியா, கோவிஷீல்டு, கோவேக்சின் ஆகிய 2 தடுப்பூசிகளைt தயாரித்து வருகிறது. இவ்விரு தடுப்பூசிகளின் அவசரகால பயன்பாட்டு ஒப்புதலை வழங்கி, உள்நாட்டில் உபயோகத்துக்கு கொண்டு வந்ததுடன், உலகின் பல நாடுகளுக்கும் இந்தியா ஏற்றுமதி செய்து வருகிறது. இந்திய தடுப்பூசிகளைப் பெறுவதற்காக உலகின் பல நாடுகளும் காத்திருக்கின்றன.

இந்த நிலையில் அமெரிக்காவின் முன்னணி விஞ்ஞானிகளில் ஒருவரும், பேய்லர் மருத்துவ கல்லூரியின் தேசிய வெப்ப மண்டல மருத்துவ நிறுவனத்தின் டீனுமான டாக்டர் பீட்டர் ஹோடெஸ், காணொலி காட்சி வழியாக நடந்த ஒரு கருத்தரங்கில் பேசினார்.

அதில், அமெரிக்கா உருவாக்கியுள்ள இரு எம்.ஆர்.என்.ஏ. தடுப்பூசிகள், உலகின் குறைந்த மற்றும் நடுத்தர வருமான நாடுகளில் தாக்கத்தை ஏற்படுத்தாது. ஆனால், பி.சி.எம்., ஆக்ஸ்போர்டு பல்கலைக்கழகம் போன்ற உலகளாவிய பல்கலைக்கழகங்களுடன் சேர்ந்து உருவாக்கப்பட்டுள்ள இந்திய தடுப்பூசிகள், உலகத்தை கொரோனாவில் இருந்து மீட்டிருக்கின்றன. அந்த வகையில், இந்தியாவின் பங்களிப்பை குறைத்து மதிப்பிட்டு விட முடியாது.

கொரோனா வைரசுக்கு எதிரான போரில், உலகிற்கு இந்தியாவின் பரிசுதான் தடுப்பூசிகள் ஆகும்.

இந்தியாவிடம் ஏதோ ஒரு சிறப்பு இருக்கிறது. அதை நானே பார்க்கிறேன். நான் இந்தியாவில் உள்ள எனது சகாக்களுடன் வாரம்தோறும் காணொலி காட்சி வழியாக உரையாடுகிறேன். ஒரு பரிந்துரையைச் செய்தால், அதை சில நாட்களில் செய்து முடித்து விடுகிறார்கள். பெயருக்கு அல்ல சிறப்பாகவே அதுவும் நம்ப முடியாத வகையில் சிந்தனையுடனும், படைப்பாற்றலுடனும் செய்கிறார்கள்.

கெரோனாவுக்கு எதிரான உலகளாவிய போரில், இந்தியாவின் மாபெரும் முயற்சிகள் உலகில் உண்மையிலேயே வெளிவராத ஒரு கதை. எனவேதான் இதை சொல்ல வேண்டிய கட்டாய நிலை ஏற்பட்டு விட்டது!

இந்தியாவில் கடந்த 1-ஆம் தேதி முதல் 60 வயதுக்கு மேற்பட்ட முதியவர்கள் மற்றும் 45 வயதுக்கு மேற்பட்ட நோயாளிகளுக்கு தடுப்பூசி போடப்பட்டு வருகிறது.

இந்த முகாம்களில் தினந்தோறும் லட்சக்கணக்கானோர் பங்கேற்று தடுப்பூசி போட்டு வருகின்றனர்.

அந்த வகையில் திபெத் புத்த மதத் தலைவர் தலாய்லாமா நேற்று இமாசல பிரதேச தலைநகர் தர்மசாலாவில் உள்ள மண்டல மருத்துவமனையில் தடுப்பூசி போட்டுக்கொண்டார்.

இதற்காக இந்திய அரசுக்கும், இமாசல பிரதேச மாநில அரசுக்கும் அவர் நன்றி தெரிவித்தார். மேலும் மக்கள் அதிக எண்ணிக்கையில் தைரியத்துடன் வந்து தடுப்பூசி போட்டுக்கொள்ள வேண்டும் எனவும் கேட்டுக்கொண்டார்!

நைஜீரியாவின் அனாம்ப்ரா மாகாணத்தில் உணவகம் நடத்தி வந்த ஒரு பெண், மனித இறைச்சியை விற்றதற்காக  போலீசாரால் கைது செய்யப்பட்டுள்ளார்.

அனாம்ப்ரா மாகாணத்தில் உள்ள குறிப்பிட்ட உணவகத்தில் மனித இறைச்சி விற்கப்படுவதாக போலீசாருக்கு தகவல் கிடைத்ததை அடுத்து, அந்த உணவகத்தில் போலீசார் நடத்திய திடீர் சோதனையில்
மனித இறைச்சி விற்கப்படுவது கண்டறியப்பட்டது.

இதனையடுத்து, இறைச்சிக்காக பயன்படுத்தப்பட்ட மனித உடல் பாகங்களையும், சமைக்கத் தயாராக இருந்த இறைச்சியையும் போலீசார் கண்டுபிடித்துள்ளதோடு, அந்த உணவகத்தை நடத்தி வந்த பெண்ணை போலீசார் கைது செய்துள்ளனர்.

இறைச்சிக்காக மனிதர்கள் யாரும் கொல்லப்பட்டனரா? அல்லது அது இறந்தவர்களின் உடலா? என்பது குறித்த தகவலை போலீசார் வெளியிடவில்லை.

கடந்த 2015 ஆம் ஆண்டு இதே அனாம்ப்ரா மாகாணத்தில் உள்ள உணவகம் ஒன்றில், மனித இறைச்சி விற்கப்பட்டதை போலீசார் கண்டுபிடித்தனர். இக்கொடூரச் செயலில் ஈடுபட்ட 10 பேரை போலீசார் கைது செய்தனர் என்பது குறிப்பிடத்தக்கது!

நேபிடாவ்: மியான்மரில் ஆங் சான் சூகி தலைமையிலான ஜனநாயக ரீதியிலான ஆட்சியைக் கவிழ்த்து ஆட்சி அதிகாரத்தை ராணுவம் கைப்பற்றியுள்ளது. தலைவர் ஆங் சான் சூகி, அதிபர் வின் மைன்ட் உள்பட 100-க்கும் மேற்பட்ட அரசியல் தலைவர்கள் மற்றும் செயற்பாட்டாளர்கள் தடுப்புக்காவலில் வைக்கப்பட்டுள்ளனர்.

கடந்த ஆண்டு நவம்பரில் நடந்த தேர்தலில் மோசடி நடந்திருப்பதாகக் குற்றம்சாட்டி, ஆட்சிக்கவிழ்ப்பை நியாயப்படுத்திக் கொண்டிருக்கிறது மியான்மர் ராணுவம்.

ஆனால் மியான்மர் மக்கள் ராணுவ ஆட்சியை ஏற்றுக் கொள்ளவில்லை. நாட்டில் ஜனநாயகம் மீட்கப்பட வேண்டும் என்று கோரி கடந்த சில வாரங்களாக அந்த நாட்டு மக்கள் தொடர் போராட்டம் நடத்தி வருகின்றனர்.

ராணுவ ஆட்சிக்கு எதிராகவும் தடுப்புக்காவலில் வைக்கப்பட்டுள்ள அரசியல் தலைவர்களை உடனடியாக விடுவிக்க கோரியும் தினந்தோறும் லட்சக்கணக்கான மக்கள் வீதியில் இறங்கி போராடி வருகின்றனர்.

மியான்மர் ராணுவம் இந்தப் போராட்டங்களை  ஒடுக்கி வருகிறது.  ஞாயிற்றுக்கிழமை போராட்டத்தின் போது பல்வேறு இடங்களில்  போலீசார் நடத்திய துப்பாக்கிச் சூட்டில் இதுவரை 18 பேர் வரை உயிரிழந்ததாக ஐநா மனித உரிமை கவுன்சில் தெரிவித்துள்ளது.

யங்கூன், தாவெய், மாண்டலே உள்ளிட்ட நகரங்களில் இந்த உயிரிழப்புகள் பதிவாகியுள்ளன. 30-க்கும் மேற்பட்டோர் காயமடைந்துள்ளனர் என்றும் தெரிவிக்கப்பட்டுள்ளது.

அதேசமயம் ராணுவத்தின் அடக்குமுறைக்கு மத்தியிலும் மியான்மரில் போராட்டம் நாளுக்கு நாள் தீவிரமடைந்து வருகிறது. அதேபோல் மியான்மர் மக்களுக்கான சர்வதேச நாடுகளின் ஆதரவும் தொடர்ந்து பெருகி வருகிறது. இது மியான்மர் ராணுவத்துக்கு பெரும் தலைவலியாக அமைந்தது. இதனால் ராணுவத்தினர் மேலும் ஆக்ரோஷத்துடன் போராட்டத்தை ஒடுக்கத் தொடங்கியுள்ளனர்!

கொரோனாவுக்கு எதிரான போரில் இந்தியாவின் தலைமைக்கும், கொரோனா வைரஸ் தடுப்பூசி உதவிக்கும் ஐ.நா. சபை பொதுச்செயலாளர் ஆண்டனியோ குட்டரெஸ் பாராட்டு தெரிவித்துள்ளார்.

மக்கள் தொகை பெருக்கத்தில் உலகின் 2-வது பெரிய நாடு என்ற வகையில் இந்தியாவில் கொரோனா வைரஸ் தாக்கம் மிகப்பெரிய அழிவை ஏற்படுத்தி விடும் என்று உலக நாடுகள் அஞ்சியது உண்டு. ஆனால் இந்தியா சரியான தருணத்தில் ஊரடங்கு, பொதுமுடக்கம் அறிவித்து, கட்டுப்பாடுகளைப் பின்பற்ற வைத்ததால் பரவல் குறைந்தது. மருத்துவ உள்கட்டமைப்பு வசதிகளை அதிரடியாக ஏற்படுத்தி, மீட்பு நடவடிக்கையிலும், உயிர்ப்பலிகளை குறைத்ததிலும் இந்தியா உலக நாடுகளுக்கு முன்மாதிரியாக அமைந்தது. இன்று வரை கொரோனாவுக்கு எதிரான போராட்டத்தை இந்தியா வெற்றிகரமான ஒன்றாக மாற்றிக்காட்டியும் உள்ளது.

கொரோனா தடுப்பூசிகளை உருவாக்குவதிலும் வேகம் காட்டியது. ஒரே நேரத்தில் 2 தடுப்பூசிகளை உள்நாட்டில் தயாரித்து அவற்றின் அவசர கால பயன்பாட்டு ஒப்புதல் வழங்கி உள்ளது. அந்தத் தடுப்பூசிகள் உள்நாட்டில் பயனாளிகளுக்கு போடப்படுவதுடன், வெளிநாடுகளுக்கும் ஏற்றுமதி செய்யப்படுகிறது.இந்த தருணத்தில் ஐ.நா. அமைதிப்படையினருக்கு இந்தியா கொரோனா தடுப்பூசிகளை இலவசமாக வழங்குவதாக வெளியுறவு மந்திரி எஸ். ஜெய்சங்கர் அறிவித்துள்ளார்.

இதை ஐ.நா. சபை பொதுச்செயலாளர் ஆண்டனியோ குட்டரெஸ் பாராட்டி உள்ளார். இந்த தகவலை ஐ.நா.சபைக்கான இந்திய தூதர் திருமூர்த்தி டுவிட்டரில் வெளியிட்டுள்ளார்.அதில் அவர் ஐ.நா.சபை பொதுசெயலாளர் ஆண்டனியோ குட்டரெஸ் பிப்ரவரி 17-ஆம் தேதியிட்டு ஒரு கடிதம் எழுதி உள்ளார். அதில் அவர் இந்திய வெளியுறவு மந்திரி எஸ்.ஜெய்சங்கர் ஐ.நா. அமைதிப்படையினருக்கு 2 லட்சம் தடுப்பூசிகள் வழங்குவதாக அறிவித்ததற்கு தனிப்பட்ட முறையில் நன்றி தெரிவித்துள்ளார் என கூறி உள்ளார்.

மேலும், கொரோனா வைரஸ் பதிலளிப்பு நடவடிக்கையில் இந்தியா உலகளாவிய தலைவராக இருந்துள்ளது எனவும் ஐ.நா. சபை பொதுச்செயலாளர் ஆண்டனியோ குட்டரெஸ் பாராட்டு தெரிவித்துள்ளார்.

இதையொட்டி ஐ.நா. சபையின் இந்திய தூதர் திருமூர்த்திக்கு, ஆண்டனியோ குட்டரெஸ் எழுதிய கடிதத்தில் கூறி இருப்பதாவது:-

உண்மையில் 150-க்கும் மேற்பட்ட நாடுகளுக்கு முக்கியமான மருந்துகள், கண்டறியும் கருவிகள், வென்டிலேட்டர்கள், சுய பாதுகாப்பு கருவிகள் வழங்கி, கொரோனா தொற்றுநோய் பதிலளிப்பு முயற்சிகளில் இந்தியா உலகளாவிய தலைவராக உள்ளது.

உலக சுகாதார நிறுவனம் தற்போது அங்கீகரித்துள்ள 2 தடுப்பூசிகளில் ஒன்றை உருவாக்கி, உற்பத்தி செய்வதில் இந்தியா மேற்கொண்ட முயற்சிகள், உலகளாவிய தடுப்பூசி சந்தையில் மிகவும் தேவையான வினியோகத்தை கொண்டு வந்துள்ளது. மேலும் தடுப்பூசி கிடைக்கச்செய்வதில் சமமான அணுகலை உறுதி செய்வதற்காக உலகளாவிய கோவாக்ஸ் வசதியை ஆதரிப்பதற்கும், பலப்படுத்துவதற்கும் நீங்கள் தொடர்ந்த முயற்சிகளையும் நான் பாராட்டுகிறேன்.

இவ்வாறு அவர் கூறி உள்ளார்!

வாஷிங்டன்: செவரன்ஸ் ரோபோ ரோவர், சிவப்பு கிரகம் என்று சொல்லப்படுகிற செவ்வாய் கிரகத்தின் பழமையானதும், 3 லட்சம் கோடி அல்லது 4 லட்சம் கோடி ஆண்டுகளுக்கு முன் உருவானது என்று விஞ்ஞானிகளால் கணிக்கப்படுகிற நதிப்படுகையின் அருகில் வெற்றிகரமாக தரை இறங்கி உலகையே வியப்பில் ஆழ்த்தி உள்ளது.

 

இந்த ரோவர், செவ்வாய் கிரகத்தில் பழங்கால வாழ்வின் தடங்களை தேடும், ஒரு தசாப்தத்தில் (10 ஆண்டுகளில்) பூமிக்கு திரும்புவதற்கான பாறைத்துகள்களை தேடும்,

 

இந்த ரோவரில் பொருத்தப்பட்டுள்ள 25 அதிநவீன கேமராக்களும், 2 மைக்ரோபோன்களும் செயல்படத் தொடங்கி விட்டன.

 

இப்போது அந்த ரோவர், செவ்வாய் கிரகத்தில் தரை இறங்கும் அதிர வைக்கிற காட்சி கொண்ட நெருக்கமான படத்தை நாசா வெளியிட்டு இருக்கிறது.

 

அமெரிக்காவின் நாசா விண்வெளி ஆராய்ச்சி மையம் அனுப்பிய பெர்சவரென்ஸ் விண்கலம் வெற்றிகரமாக செவ்வாய் கிரகத்தில் தரை இறங்கி உள்ள நிலையில், அமெரிக்க அதிபர் ஜோ பைடன்,  நாசா விஞ்ஞானிகளை பாராட்டி  உள்ளார். நாசா அமைப்பின் நிர்வாகக் குழு தலைவர் ஸ்டீவ் ஜுர்சிக்கை, தொலைபேசி மூலம் தொடர்பு கொண்டு, பைடன் வாழ்த்துகளைப் பகிர்ந்ததாக வெள்ளை மாளிகை கூறி உள்ளது!

அமெரிக்காவின் நியூயார்க் நகரில் ஐ.நா. பாதுகாப்பு கவுன்சில் கூட்டம் நடைபெற்றது.

இந்தக் கூட்டத்தில் கலந்துகொண்ட இந்திய வெளியுறவு மந்திரி எஸ்.ஜெய்சங்கர், “கடினமான சூழ்நிலைகளில் பணியாற்றி வருகிற ஐ.நா. அமைதிப்படையினரை கருத்தில் கொண்டு, அவர்களுக்கு இந்தியா 2 லட்சம் கொரோனா தடுப்பூசிகளை பரிசாக வழங்கும்” என்று அறிவித்தார்.

இதற்கு ஐ.நா. சபையின் பொதுச்செயலாளர் ஆண்டனியோ குட்டரெஸ் நன்றி தெரிவித்துள்ளார். இதையொட்டி அவரது செய்தி தொடர்பாளர் ஸ்டீபன் துஜாரிக் கூறுகையில், “இந்தியாவின் இந்தப் பரிசுக்கு நாங்கள் மிகவும் நன்றிக்கடன் பட்டுள்ளோம். இந்தத் தடுப்பூசியை வினியோகிக்கும் திட்டத்தை ஐ.நா. ஆதரவு துறை மேற்கொள்ளும் எனத் தெரிவித்தார்.

ஐ.நா. அமைதிப்படையில், அமைதி ஏற்படுத்தும் 12 நடவடிக்கைகளில் 94 ஆயிரத்து 484 பேர் பணியாற்றி வருவது குறிப்பிடத்தக்கது!

நேபிடாவ்:  மியான்மரில் ஆங் சான் சூகி தலைமையிலான ஜனநாயக ரீதியிலான ஆட்சியைக் கவிழ்த்து ஆட்சி அதிகாரத்தை ராணுவம் கைப்பற்றியுள்ளது. தலைவர் ஆங் சான் சூகி, அதிபர் வின் மைண்ட் உள்பட 100-க்கும் மேற்பட்ட அரசியல் தலைவர்கள் மற்றும் செயற்பாட்டாளர்கள் தடுப்புக்காவலில் வைக்கப்பட்டுள்ளனர். கடந்த ஆண்டு நவம்பரில் நடந்த தேர்தலில் மோசடி நடந்திருப்பதாகக் குற்றம்சாட்டி, தன் ராணுவ ஆட்சிக்கவிழ்ப்பை நியாயப்படுத்திக் கொண்டிருக்கிறது மியான்மர் ராணுவம்.

ஆனால் மியான்மர் மக்கள் ராணுவ ஆட்சியை ஏற்றுக்கொள்ளவில்லை. நாட்டில் ஜனநாயகம் மீட்கப்பட வேண்டும் என்று கோரி கடந்த 10 நாள்களாக அந்த நாட்டு மக்கள் தொடர் போராட்டம் நடத்தி வருகின்றனர். ராணுவ ஆட்சிக்கு எதிராகவும் தடுப்புக்காவலில் வைக்கப்பட்டுள்ள அரசியல் தலைவர்களை உடனடியாக விடுவிக்க கோரியும் தினந்தோறும் லட்சக்கணக்கான மக்கள் வீதியில் இறங்கி போராடி வருகின்றனர்.

ராணுவ ஆட்சிக்கு எதிரான போராட்டங்கள் தீவிரமாக நடந்து வரும் தலைநகர் நேபிடாவ், யாங்கூன், மாண்டலே ஆகிய நகரங்களின் முக்கிய சாலைகளில் ஆயுதமேந்திய ராணுவ வாகனங்கள் ரோந்து பணியில் ஈடுபட்டுள்ளன.

இதற்கிடையில் போராட்டம் குறித்த செய்திகள் மற்றும் தகவல்கள் பரவுவதைத் தடுக்கும் விதமாக நேற்று முன்தினம் நள்ளிரவு மியான்மர் முழுவதும் மீண்டும் இணைய சேவை முடக்கப்பட்டது. இப்படி ராணுவம் தனது பிடியை இறுக்கி வந்தாலும் அதற்கு எதிரான மக்களின் போராட்டம் தொடரத்தான் செய்கிறது.

இதற்கிடையே, மியான்மரில் ராணுவ ஆட்சிக்கு எதிராக போராட்டத்தில் ஈடுபடுவர்களுக்கு  20 ஆண்டுகள் வரை சிறை தண்டனை விதிக்கப்படும் என்று அந்நாட்டு ராணுவம் எச்சரிக்கை விடுத்துள்ளது.  மேலும், ராணுவ அதிகாரிகளுக்கு எதிரான கருத்துக்களை பரப்புவர்களுக்கு நீண்ட கால சிறை தண்டனை, அபராதம் ஆகியவை விதிக்கப்படும் என்று எச்சரிக்கப்பட்டுள்ளது. 

இந்த நிலையில் மியான்மரில் ராணுவ ஆட்சிக்கு எதிராக போராடி வரும் போராட்டக்காரர்கள் மீது அடக்குமுறை ஏவப்படுவதாக ஐக்கிய நாடுகள் அவை கண்டனம் தெரிவித்துள்ளது. இதுதொடர்பாக ஐ.நா. சபையின் மியான்மர் நாட்டிற்கான சிறப்பு தூதர் கிறிஸ்டின் ஷ்ரானர் புர்கெனர் வெளியிட்டுள்ள அறிக்கையில், ராணுவ ஆட்சிக்கு எதிரான மக்களின் போராட்டத்தை ஒடுக்க மியான்மர் ராணுவம் அடக்குமுறைகளை மேற்கொள்வதாகக் கண்டனம் தெரிவித்துள்ளார்.

மேலும் அமைதியான போராட்டத்திற்கான மக்களின் உரிமை மதிக்கப்பட வேண்டும் என்று வலியுறுத்திய அவர், மியான்மரில் நடப்பதை உலக நாடுகள் கவனித்து வருவதாகவும், போராட்டக்காரர்கள் மீது கடுமையாக நடந்து கொண்டால் கடும் பின்விளைவுகளை சந்திக்க நேரிடும் என்றும் எச்சரிக்கை விடுத்துள்ளார்.

 

   
மியான்மரில் அதிரடியாக ராணுவம் ஆட்சி அதிகாரத்தை கைப்பற்றியதை அடுத்து, அங்கு மக்கள் போராட்டம் தீவிரமாகியுள்ளது.

ராணுவத்தால் கைது செய்யப்பட்டு வீட்டுச்சிறையில் வைக்கப்பட்டுள்ள அந்த நாட்டின் தலைவரான ஆங் சான் சூ கி உள்ளிட்டவர்களை விடுதலை செய்யக்கோரி போராட்டங்களை நடத்துகின்றனர்.

இந்த நிலையில், மியான்மரில் கடந்த 8 ஆம் தேதி முதல் நாடு முழுவதும் 30 நகரங்களில் ஊரடங்கு அமல்படுத்தப்பட்டுள்ளதாக  மியான்மர் டைம்ஸ் செய்தி வெளியிட்டுள்ளது. பொது இடங்களில் 5 பேருக்கு மேல் கூடுவதற்குத் தடை விதிக்கப்பட்டுள்ளதாகவும் போராட்டங்களுக்கும், பொது இடங்களில் உரை நிகழ்த்தவும் தடை விதிக்கப்பட்டுள்ளதாகவும் தெரிவிக்கப்பட்டுள்ளது.

இருப்பினும் அந்நாட்டு மக்கள் பல்வேறு பகுதிகளில் ஆயிரக்கணக்கில் திரண்டு வந்து போராட்டங்களை நடத்தி வருகின்றனர். இந்த நிலையில் மியான்மரின் நேபிடா என்ற இடத்தில் நேற்று நடந்த 4-வது நாள் போராட்டத்தின் போது, போராட்டக்காரர்களை கலைந்து செல்ல ராணுவத்தினர் வலியுறுத்தினர். அவர்கள் மீது தண்ணீர் பாய்ச்சினர். மேலும் எச்சரிக்கை செய்வதற்காக வானை நோக்கி துப்பாகியால் சுட்டனர்.

அப்போது அங்கிருந்த பெண் ஒருவரின் தலையில் துப்பாக்கி குண்டு பாய்ந்தது. இதனால் அந்த பெண் அதே இடத்தில் சரிந்து விழுந்தார். உடனடியாக அவரை மீட்டு மருத்துவமனைக்கு அழைத்துச் சென்றனர். தற்போது அந்தப் பெண் தீவிர சிகிச்சை பிரிவில் உள்ளதாகத் தெரிவிக்கப்பட்டுள்ளது. இந்த சம்பவத்தில் மேலும் சிலர் காயமடைந்திருப்பதாகவும் தகவல்கள் வெளியாகியுள்ளன!


யாங்கூன்: தென்கிழக்கு ஆசிய நாடான மியான்மரில் கடந்த ஆண்டு நவம்பர் மாதம் பொதுத்தேர்தல் நடைபெற்றது. இதில் அந்நாட்டின் தலைவர் ஆங் சான் சூகி தலைமையிலான ஆளும் தேசிய ஜனநாயக கட்சி மீண்டும் வெற்றி பெற்றதாக அறிவிக்கப்பட்டது.

ஆனால் அந்த நாட்டு ராணுவம் தேர்தலில் பெரிய அளவில் முறைகேடுகள் நடந்ததாக குற்றம் சாட்டியதோடு, தேர்தல் முடிவுகளை ஏற்கவும் மறுத்தது. இருப்பினும் ராணுவத்தின் குற்றச்சாட்டு அடிப்படை ஆதாரமற்றவை என கூறி தேர்தல் ஆணையம் அதை நிராகரித்தது.

இந்த விவகாரத்தில் மியான்மர் அரசுக்கும் அந்த நாட்டு ராணுவத்துக்கும் இடையே மோதல் போக்கு நீடித்து வந்த நிலையில்,  ராணுவம் அதிரடியாக ஆட்சியைக் கைப்பற்றியது.

நாட்டின் தலைவர் ஆங் சான் சூகி, அதிபர் வின் மைன்ட் உள்பட முக்கிய அரசியல் தலைவர்கள் மற்றும் மூத்த அரசு அதிகாரிகளை ராணுவம் கைது செய்து சிறை வைத்துள்ளது.

அடுத்த ஒரு வருடத்துக்கு நாட்டில் ராணுவ ஆட்சி நடைபெறும் என்றும், அதன் பிறகு தேர்தல் நடத்தப்பட்டு வெற்றியாளரிடம் அதிகாரம் ஒப்படைக்கப்படும் என்றும் ராணுவம் அறிவித்துள்ளது.

இதனையடுத்து, ராணுவ ஆட்சிக்கு எதிராக அந்நாட்டில் கடும் எதிர்ப்புகள் எழுந்தன. சமூக வலைத்தளங்களும் மியான்மரில் முடக்கப்பட்டுள்ளன. இதனால், உலக நாடுகள் கடும் கண்டனம் தெரிவித்து வருகின்றன.

இந்த நிலையில், நேப்பிதாவ் நகரில் ஆயிரக்கணக்கான மக்கள் திரண்டு ராணுவ ஆட்சிக்கு எதிராக போராட்டத்தில் ஈடுபட்டனர்.

ராணுவ சர்வாதிகாரம் தோல்வி அடையட்டும், ஜனநாயகம் வெல்லட்டும் என கோஷம் எழுப்பிய போராட்டக்காரர்கள், கையில் பதாகைகளையும் ஏந்தியிருந்தனர். மியான்மரில் ராணுவ ஆட்சிக்கு எதிராக இவ்வளவு பெரிய போராட்டம் நடைபெற்றது இதுதான் முதல் தடவை எனக் கூறப்படுகிறது!

கொழும்பு: இலங்கையில் சீனா வலுவாக காலூன்றுவதில் தீவிரம் காட்டி வருகிறது. இதற்காக பல்வேறு உள்கட்டமைப்பு பணிகளை செய்து வருகிறது. சீனாவின் இந்த முயற்சிக்கு பின்னடைவை ஏற்படுத்தும் வகையில், இலங்கை ரயில் டிரைவர்களின் முடிவு அமைந்துள்ளது.

இலங்கையின் ரயில் என்ஜின் டிரைவர்கள் சங்க செயலாளர் இந்திகா தொடங்கொட சமீபத்தில் செய்தியாளர்களை சந்தித்தார். அப்போது அவர் பேசுகையில்...
“சீனாவில் தயாரிக்கப்பட்ட ரெயில் வண்டிகள், பயணிகளின் பாதுகாப்புக்கு அச்சுறுத்தலாக இருக்கிறது. சீன ரயில் பெட்டிகளில் பிரேக்குகள் கோளாறாக உள்ளன. பிரேக்குகளை அழுத்தும்போது, நிறுத்தவேண்டிய இடத்தை விட கூடுதல் தூரம் செல்கின்றன. சீனாவில் தயாரிக்கப்பட்ட ரயில் வண்டிகள் உள்ளூர் தரத்தை பூர்த்தி செய்வதை உறுதி செய்ய முறையாக பராமரிக்கப்படவேண்டும்.

சீனாவில் தயாரிக்கப்படும் ரெயில் வண்டிகள் குறித்து எழுப்பப்படும் குறைபாடுகள் தீர்க்கப்படும் வரை என்ஜின் டிரைவர்கள் அந்த ரயில் வண்டிகளை இயக்குவதை புறக்கணிப்பார்கள்" என்று தெரிவித்துள்ளார்.

இலங்கையில் குறைபாடுகள் கொண்ட சீன ரெயில் பெட்டிகள் குறித்து அறிக்கை சமர்ப்பிக்கும்படி ரெயில்வே பொறியியல் துறைக்கு போக்குவரத்து துறை மந்திரி கடந்த செப்டம்பர் மாதம் அறிவுறுத்தி இருந்தார். சீன ரெயில் பெட்டிகளில் பிரேக்குகள் கோளாறு காரணமாக சமீபத்திய காலங்களில் கிட்டத்தட்ட 200 விபத்துக்கள் பதிவாகி உள்ளதாக என்ஜின் டிரைவர்கள் சங்கம் கூறி உள்ளது குறிப்படத்தக்கது!

இந்திய அரசின் வேளாண் சட்டங்களுக்கு எதிராக விவசாயிகளின் போராட்டம் தொடர்ந்து நடைபெற்று வருகிறது.

இந்திய எதிர்க்கட்சிகள் நாடளுமன்றத்தின் இரு அவைகளிலும், வேளாண் சட்டங்களுக்கு கடுமையான எதிர்ப்புகளைப் பதிவு செய்து வருகின்றனர்.

இந்நிலையில் அமெரிக்க வெளியுறவுத்துறையின் செய்தி தொடர்பாளர் ஹேலி ஸ்டீவன்ஸ், இந்திய வேளாண் சட்டங்களுக்கு ஆதரவு தெரிவிக்கும் விதமாக கருத்து தெரிவித்துள்ளார்.

பொதுவாக இந்தியச் சந்தைகளின் செயல்திறனை அதிகரிக்கும், தனியார் முதலீட்டை ஈர்க்கும் நடவடிக்கைகளை அமெரிக்கா வரவேற்கிறது எனக் கூறியுள்ளார்.

அமைதியான போராட்டங்கள் எந்தவொரு வளர்ந்து வரும் ஜனநாயகத்திற்கும் அடையாளமாக இருப்பதை அங்கீகரிப்பதாக அவர் தெரிவித்துள்ளார்.

மேலும் அவர் எந்தவொரு பிரச்சனையும் பேசித் தீர்க்கப்பட வேண்டும் என்றும் ஹேலி ஸ்டீவன்ஸ் வலியுறுத்தியுள்ளார்!

காபூல்: ஆப்கானிஸ்தானில் தலீபான் பயங்கரவாதிகள் நடத்திய தாக்குதலில் பாதுகாப்பு படையினர் 16 பேர் கொல்லப்பட்டு உள்ளனர்.

ஆப்கானிஸ்தானின் வடக்கே குண்டூஸ் மாகாணத்தில் கான் அபாத் மாவட்டத்தில் பாதுகாப்பு படை முகாம் மீது நேற்றிரவு திடீரென தலீபான் பயங்கரவாதிகள் தாக்குதல் நடத்தியுள்ளனர்.  இந்த தாக்குதலில் பாதுகாப்பு படையை சேர்ந்த 16 பேர் கொல்லப்பட்டு உள்ளனர்.

இதுதவிர 2 பேர் காயமடைந்தனர்.  அவர்கள் மீட்கப்பட்டு சிகிச்சைக்கு கொண்டு செல்லப்பட்டனர்.  அரசுக்கும், தலீபான் பயங்கரவாத அமைப்புக்கும் இடையே அமைதி பேச்சுவார்த்தை ஒருபுறம் நடந்து வந்தபோதிலும், அந்த அமைப்பு தொடர்ந்து அதிரடியான தாக்குதல்களிலும் ஈடுபட்டு வருகிறது!

சர்வதேச பாப் இசை உலகில் மிகவும் பிரபலமானவர் ரியான்னா. இவர் இந்தியாவில் விவசாயிகள் நடத்தி வரும் போராட்டத்திற்கு ஆதரவாக அண்மையில் வெளியிட்ட கருத்து உலக அளவில் டிரண்டாகி வருகிறது.

இதனால் இந்திய ஆளும் பிஜேபி உட்பட இந்திய பாலிவுட் நட்சத்திரங்கள் பலரும் தங்கள் கண்டனத்தைப் பதிவு செய்து வருகின்றனர்.

ரியன்னா இது மட்டுமின்றி மியான்மரில் நிலவும் அசாதாரண அரசியல் சூழ்நிலை குறித்த கருத்தையும் தனது ட்விட்டர் பக்கத்தில் பகிர்ந்திருக்கிறார். 

சர்வதேச அளவில் பிரபலம் என்பதால் இவரது இடுகை, கண்டங்களைக் கடந்தும் வலுவான தாக்கத்தை ஏற்படுத்தி வருவதாகப் பார்க்கப்படுகிறது.

அதேவேளை, இந்திய விவசாயிகள் போராட்டம் பற்றி கருத்தை பதிவிடும் முன்பு இவரது ட்விட்டர் பின்தொடருவோரின் எண்ணிக்கை 10 கோடியாக இருந்தது. இப்போது அந்த எண்ணிக்கை 10 கோடியே பத்து லட்சம் ஆகியிருக்கிறது. அதாவது 10 லட்சம் பேர் கூடுதலாக ரியான்னாவை பின்தொடர இந்திய விவசாயிகள் போராட்டம் தொடர்பான அவரது இடுகை காரணமாகியிருக்கிறது!

வாஷிங்டன்: அமெரிக்காவின் வடக்கு கலிபோர்னியாவின் டேவிஸ் பகுதியில் அமைந்துள்ள சென்ட்ரல் பூங்காவில் காந்தி சிலை நிறுவப்பட்டுள்ளது. ஆறு அடி உயரமும், 294 கிலோ எடையுடன் கூடிய வெண்கல காந்தி சிலை பூங்காவின் மையப்பகுதியில் வைக்கப்பட்டுள்ளது.

இந்நிலையில் மர்ம நபர்கள் சிலர் காந்தி சிலையின் முகம் மற்றும் கணுக்கால்களில் சேதங்களை ஏற்படுத்தியுள்ளனர். காந்தி நினைவு நாளான ஜனவரி 30-ஆம் தேதியன்று காந்தி சிலை சேதமடைந்து காணப்பட்டதால், அமெரிக்க வாழ் இந்தியர்கள் இந்த நிகழ்விற்கு கண்டனம் தெரிவித்தனர்.

இதனிடையே காந்தி சிலையைச் சேதப்படுத்திய நபர்கள் குறித்தும், அதற்கான நோக்கம் குறித்தும் கலிபோர்னியா மாகாண காவல்துறையினர் விசாரணை மேற்கொண்டுள்ளனர். “வெறுக்கத்தக்க இந்த செயலுக்கு” காரணமானவர்கள் மீது தகுந்த நடவடிக்கை எடுக்க வேண்டும் என்று இந்தியா அமெரிக்காவை கேட்டு கொண்டு உள்ளது.

இந்த நிலையில் காந்தி சிலை உடைக்கப்பட்டதற்கு அமெரிக்க வெள்ளை மாளிகை கண்டனம் தெரிவித்துள்ளது. இது குறித்து ஊடகச் செயலாளர் ஜென் பிசாகி கூறுகையில், “மகாத்மா காந்தி சிலை உடைக்கப்பட்டு அவமதிக்கப்பட்டது குறித்து விசாரித்து வருகிறோம். இதுகுறித்து நாங்கள் மிகுந்த கவலை கொண்டுள்ளோம். இந்தச் செயலை அமெரிக்க அரசு வன்மையாகக் கண்டிக்கிறது” என்று தெரிவித்தாா்!

வாஷிங்டன்: மியான்மரில் ராணுவம் ஆட்சியை கைப்பற்றியது. நோபல் பரிசு பெற்ற அந்த நாட்டின் தலைவர் ஆங் சான் சூகி கைது செய்யப்பட்டார். மியான்மர் ராணுவத்தின் இந்த நடவடிக்கைக்கு உலக நாடுகள் கடும் கண்டனம் தெரிவித்துள்ளன.

இந்நிலையில் மியான்மரில் ராணுவம் ஆட்சியை கைப்பற்றியது குறித்து அமெரிக்க அதிபர் ஜோ பைடன் கருத்து தெரிவித்துள்ளார். அதில், மியான்மரில் ராணுவம் அதிகாரத்தைக் கைப்பற்றுவது 'நாட்டின் ஜனநாயகத்தின் மீதான நேரடித் தாக்குதல்.  நாட்டின் ஜனநாயகம் மற்றும் சட்டத்தின் ஆட்சி மீதான நேரடித் தாக்குதல் இது. 

மேலும் ஜனநாயக அரசாங்கத்திற்கு அமைதியான மாற்றம் ஏற்படும் என்ற நம்பிக்கையின் மத்தியில் பொருளாதார அபராதங்களை உயர்த்துவதற்கான 2016-ஆம் ஆண்டு முடிவை உடனடியாக மதிப்பாய்வு செய்யப்படும்.

ராணுவம் ஆட்சி தொடர்ந்தால் மியன்மரில் மீண்டும் பொருளாதார தடைகளை விதிக்க நேரிடலாம் என எச்சரிக்கை விடுத்துள்ளார்!

யாங்கூன்: மியான்மரில் கடந்த சில வாரங்களாகவ தேர்ந்தெடுக்கப்பட்ட அரசுக்கும் அந்நாட்டு ராணுவத்துக்கும் இடையே மோதல்  நிலவி வந்தது. இந்த சூழலில், மியான்மர் அரசு ஆலோசர் ஆங் சான் சூகி, அதிபர் உள்ளிட்டோரை ராணுவம் சிறைபிடித்தது. இதனால், அந்நாட்டில் மீண்டும் ராணுவ புரட்சி ஏற்படுமோ என்ற பரபரப்பு நிலவியது.

இந்த நிலையில், மியான்மரில் ஓராண்டுக்கு அவசர நிலை பிறப்பிக்கப்படுவதாக அந்நாட்டு ராணுவம் அறிவித்துள்ளது. மியான்மர் பொதுத்தேர்தலில் முறைகேடு நடந்ததால் அவசர நிலை அமல்படுத்தப்பட்டுள்ளதாக ராணுவம்  தரப்பில் தெரிவிக்கப்பட்டுள்ளது. மியான்மரில் இன்று நாடாளுமன்றம் கூட இருந்த நிலையில், ராணுவத்தின் இந்த நடவடிக்கையால் அந்நாட்டில் உச்சகட்ட பரபரப்பு ஏற்பட்டுள்ளது.

மியான்மரில் நடைபெற்ற 2-வது பொதுத்தேர்தலில் ஆங் சான் சூகி கட்சி அமோக வெற்றி பெற்றது. ஆனால், ராணுவம் இந்த தேர்தலில் முறைகேடு நடைபெற்றதாகவும் விசாரணை நடத்த வேண்டும் எனவும் தொடர்ந்து வலியுறுத்தி வந்தது!

அமெரிக்காவின் ஃபுளோரிடா மாநிலத்தைச் சேர்ந்தவர் டாக்டர் கிரெகரி மைக்கல். 56 வயதுடைய அவர்  மகப்பேறு மற்றும் மகளிர்நல மருத்துவர் ஆவார்.

அவர், கடந்த மாதம் 18-ஆம் தேதி கோவிட்-19 தடுப்பூசியைப் போட்டுக்கொண்டார்.
ஆனால்,  தடுப்பூசியை போட்டுக்கொண்ட அடுத்த 16 நாட்கள் கழித்து, அவர் உயிரிழந்த சம்பவம்  பெரும் அதிர்ச்சியை ஏற்படுத்தியுள்ளது. இது குறித்து சுகாதாரத் துறை அதிகாரிகள் விசாரணை மேற்கொண்டு வருகின்றனர்.

பதினாறு நாட்கள் கழித்து மூளையில் ரத்தக் கசிவு ஏற்பட்டதைத் தொடர்ந்து, அவர் உயிர் இழந்துவிட்டதாக அவரது மனைவி ஃபேஸ்புக் பதிவில் குறிப்பிட்டுள்ளார்.

இதுகுறித்து தீவிரமாக விசாரணை நடத்தி வருவதாக ‘ஃபைசர்’ நிறுவனம் தெரிவித்துள்ளது. எனினும், தடுப்பூசி போட்டுக்கொண்டதற்கும் அந்த மருத்துவரின் மரணத்திற்கும் இடையே நேரடித் தொடர்பு இருப்பதாக இப்போதைக்குத் தெரியவில்லை என்று அது கூறியது.

அமெரிக்காவில் இதுவரை ‘ஃபைசர்-பயோஎன்டெக்’ அல்லது ‘மொடர்னா’ தடுப்பூசிகளை ஏறத்தாழ ஒன்பது மில்லியன் பேர் போட்டுக்கொண்டனர். அந்நாட்டில் இதுவரை இவ்விரு தடுப்பூசிகளுக்கு மட்டுமே ஒப்புதல் அளிக்கப்பட்டுள்ளது.

தடுப்பூசி போட்டுக்கொண்ட வேறு எவரும் உயிர் இழந்துவிட்டதாக இதுவரை தகவல் இல்லை.

கைவலி, சோர்வு, தலைவலி அல்லது காய்ச்சல் போன்ற சாதாரண பக்கவிளைவுகள் மட்டும் பலருக்கு ஏற்பட்டதாகக் கூறப்படுகிறது. இந்தப் பக்கவிளைவுகள் தற்காலிகமானவை என்றும் தெரிவிக்கப்பட்டுள்ளது!

வாஷிங்டன்: கொரோனா வைரஸ் உருவாகி ஓராண்டு முடிந்துள்ள நிலையில், அதன் உருமாறி வருகிறது. உருமாறுகிற புதிய கொரோனா வைரஸ்கள் பல நாடுகளில் பரவி வருகின்றன.

சமீபத்தில் இங்கிலாந்தில் தோன்றிய உருமாறிய வைரஸ், சீனாவில் முதலில் உருவாகி உலகமெங்கும் பரவியுள்ள கொரோனா வைரஸ்களை விட வேகமாகப் பரவுகிற தன்மையை கொண்டிருப்பதாக விஞ்ஞானிகள் ஏற்கனவே குறிப்பிட்டனர்.

இந்த நிலையில், தற்போது உருமாறிய 3 கொரோனா வைரஸ்கள், 14 நாடுகளில் பரவியுள்ளதாகவும், அவற்றின் தொற்று மற்றும் தீவிரத் தன்மை அச்சுறுத்தலை ஏற்படுத்தும் வகையில் உள்ளதாகவும் ஐ.நா. சபையின் அங்கமான பாஹோ என்று அழைக்கப்படுகிற பான் அமெரிக்க சுகாதார அமைப்பு எச்சரித்துள்ளது.

இந்த 3 வைரஸ்களில் ஒன்றுதான், இங்கிலாந்து நாட்டிலும், தென் ஆப்பிரிக்காவிலும் காணப்பட்ட வைரஸ் என்று அந்த அமைப்பு கூறுகிறது.

இதையொட்டி, பான் அமெரிக்க சுகாதார அமைப்பின் நிகழ்வு மேலாளர் சில்வைன் ஆல்டிகேரி கூறும்போது, “இங்கிலாந்தில் கண்டறியப்பட்ட 2 வகை வைரஸ்கள், அமெரிக்காவின் பிராந்தியத்தில் சமூகல் பரவலை ஏற்படுத்தியதாகத் தெரியவில்லை. இதுவரை அந்த இரு நாடுகளில் இருந்தோ அல்லது அந்த நாடுகளுக்கோ பயணிக்கும் நபர்களிடம் இருந்து மட்டுமே அந்த வைரஸ் தொற்று பாதிப்பு ஏற்பட்டுள்ளதாக தெரிகிறது” என குறிப்பிட்டார்.

மூன்றாவது வகை வைரஸ், பிரேசில் நாட்டின் அமேசோனாஸ் மாகாணத்தில் கண்டறியப்பட்டுள்ளது. இது உள்நாட்டில் பரவலாக இருக்கிறது. அங்குள்ள மானுஸ் நகரில் ஆஸ்பத்திரியில் சேர்க்கப்பட்டுள்ள பலருக்கு அந்த வைரஸ் தொடர்பு இருப்பது தெரிய வந்துள்ளது.

சீனாவில் இருந்து வந்த அசல் கொரோனாவை விட இங்கிலாந்து, தென் ஆப்பிரிக்காவில் கண்டறியப்பட்டுள்ள உருமாறிய கொரோனா அதிக மரண ஆபத்தை ஏற்படுத்துவதாகவும் பான் அமெரிக்க சுகாதார அமைப்பு கூறுகிறது. இவ்விரு வைரஸ்களும் அதிகமாகப் பரவுகிற நிலை இருப்பதாகவும் சொல்லப்படுகிறது!

ஜெனீவா: இந்தியாவில் கோவிஷீல்டு, கோவேக்சின் ஆகிய 2 கொரோனா தடுப்பூசிகளின் அவசர கால பயன்பாட்டுக்கு இந்திய தலைமை மருந்து கட்டுப்பாட்டு இயக்குனரகம் கடந்த மாதம் 3-ஆம் தேதி ஒப்புதல் அளித்துள்ளது.

இந்த தடுப்பூசிகளை போடும் மிகப்பெரிய பணி இந்தியாவில் தொடங்கியுள்ள நிலையில் உலகின் பல நாடுகள், இந்தியாவை தடுப்பூசிகளுக்கு எதிர்பார்த்துக் கொண்டிருக்கிறது.

அந்த வகையில் தென் ஆப்பிரிக்கா, கொரோனாவைத் தடுத்து நிறுத்துவதற்காக இந்தியா 10 லட்சம் தடுப்பூசி டோஸ்களை அனுப்பி வைக்கிறது.

இந்நிலையில், வெளிநாடுகளுக்கு கொரோனா தடுப்பூசி ஏற்றுமதி செய்வதையொட்டி ஐ.நா பொதுச்செயலாளர் அன்டோனியோ குடரெஸ் கூறுகையில்,

இந்தியாவின் கொரோனா (தடுப்பூசி) உற்பத்தி திறன் இன்று உலகில் உள்ள மிகச் சிறந்த சொத்தாக  நாங்கள் கருதுகிறோம்.

உலகளாவிய தடுப்பூசி பிரச்சாரம் சாத்தியமா என்பதை உறுதி செய்வதில் முக்கிய பங்கு வகிக்க தேவையான அனைத்து நடவடிக்கைகளும் இந்தியாவில் இருக்கும் என்று நாங்கள் உறுதியாக நம்புகிறோம் என்றார்!

கராச்சி: பாகிஸ்தான் நாட்டில் கராச்சி நகரில் இருந்து லாகூர் நோக்கி ஏர்பஸ் ஏ-320 விமானம் ஒன்று பறந்து கொண்டிருந்தது.  அந்த விமானம் ரகீம் யார் கான் என்ற பகுதியருகே வந்தபொழுது, வானில் திடீரென அடையாளம் காணமுடியாத பறக்கும் தட்டு ஒன்று தோன்றியுள்ளது.

இதனை பாகிஸ்தான் சர்வதேச ஏர்லைன்ஸ் நிறுவனத்தின் விமானி கண்டு அதிர்ந்துள்ளார்.  பின்னர் அதனை வீடியோவாக எடுத்துள்ளார்.  இதுபற்றி விமான கட்டுப்பாட்டு அறைக்கும் அவர் தகவல் தெரிவித்து உள்ளார்.

இதுபற்றி விமானி கூறும்பொழுது, சூரியஒளி இருக்கும்பொழுது அதனை விட மிக பிரகாசமுடன் அந்த பறக்கும் தட்டு காணப்பட்டது.  பகற்பொழுதில், விமான பயணத்தில் இதுபோன்ற அதிக பிரகாசம் கொண்ட பொருள் ஒன்றை காண்பது மிக அரிது.

வானில் தென்பட்ட அந்த பொருள் கிரகம் இல்லை.  ஆனால், பூமிக்கு அருகே காணப்படும் விண்வெளி நிலையம் அல்லது ஒரு செயற்கை கிரகம் ஆக கூட அது இருக்கலாம் என கூறியுள்ளார்.

அந்த விமானி வீடியோ எடுத்தது போக, ரகீம் யார் கான் பகுதியில் வசிக்க கூடிய குடியிருப்புவாசிகள் கூட பறக்கும் தட்டை கண்டுள்ளனர்.  அவர்களும் வீடியோ எடுத்துள்ளனர்.

இதுபற்றி பாகிஸ்தான் சர்வதேச ஏர்லைன்ஸ் நிறுவன செய்தி தொடர்பு அதிகாரி ஒருவர் கூறும்பொழுது, அது பறக்கும் தட்டா அல்லது வேறு எதுவும் இருக்கிறதா? என உறுதியாக கூற முடியாது.

அந்த பொருள் என்ன என்பது பற்றி உடனடியாக எதுவும் கூறிவிட முடியாது.  உண்மையில், அந்த பொருள் என்ன என்று எங்களுக்கு தெரியவில்லை.  எனினும் வானில் ஏதோவொன்று தென்பட்டு உள்ளது.  அதுபற்றி விதிமுறைகளின்படி தகவல் தெரிவிக்கப்பட்டு உள்ளது என கூறியுள்ளார்!

சிங்கப்பூர்: உலகில் கொரோனா முடிவுக்கு வர இன்னும் 4 முதல் 5 ஆண்டுகள் வரை ஆகலாம் என்று சிங்கப்பூர் கல்வி மந்திரி லாரன்ஸ் வாங் எச்சரித்துள்ளார். 

நிகழ்ச்சி ஒன்றில் பேசிய லாரன்ஸ் வாங், கொரோனா பிரச்னை முடிந்த பிறகு உலகம் எவ்வாறு இருக்கும் என்பதை யாராலும் யூகிக்க முடியாது என்றும், இந்த வைரஸ் தாக்கத்தால்  நிச்சயமற்ற சூழல் நிலவும் என்றும் அவர் குறிப்பிட்டுள்ளார்.

மேலும், உலகம் முழுவதும் தடுப்பூசி எடுத்துக்கொள்வது உடனடியாகவோ எளிதாகவோ இருக்காது. மாஸ்க் அணிந்து கொள்வது, கூட்டங்களைத் தவிர்ப்பது போன்ற பாதுகாப்பு நடவடிக்கைகள் இந்த ஆண்டும் தொடரும். அடுத்த ஆண்டும் தொடரலாம் என்று அவர் தெரிவித்துள்ளார்

சிங்கப்பூரின் கொரோனா தடுப்பு செயல் குழுவின்  துணைத்தலைவராக லாரன்ஸ் வாங் பொறுப்பு வகித்து வருகிறார் என்பது குறிப்பிடத்தக்கது!

அமெரிக்காவின் 46-வது ஜனாதிபதியாக பதவியேற்றுள்ள ஜோ பைடன் தனது நிர்வாகத்தின் பல முக்கிய பொறுப்புகளில் இந்திய வம்சாவளியினரை நியமனம் செய்து வருகிறார். முக்கியமாக இந்திய வம்சாவளியைச் சேர்ந்த பெண்களுக்கு தனது நிர்வாகத்தில் அவர் முக்கியத்துவம் வழங்கி வருகிறார்.

அந்த வகையில் 13 பெண்கள் உள்பட 20 இந்திய வம்சாவளியினரை முக்கிய பொறுப்புகளில் நியமனம் செய்தார். இதன்  தொடர்ச்சியாக தற்போது அமெரிக்காவின் சர்வதேச மேம்பாட்டு நிதி கழகத்தின் இணை தலைவராக இந்திய வம்சாவளியைச் சேர்ந்த தேவ் ஜெகதீசன் என்பவரை ஜனாதிபதி ஜோ பைடன் நியமனம் செய்துள்ளார்.

அமெரிக்காவின் கத்தோலிக்க பல்கலைக்கழகத்தில் பி.ஏ. பட்டம் பெற்ற ஜெகதீசன் கொலம்பஸ் சட்டக்கல்லூரியில் சட்டப் படிப்பை முடித்தார். இதற்கு முன் அவர் அமெரிக்க சர்வதேச மேம்பாட்டு நிதி நிறுவனத்துக்கான துணை பொது ஆலோசகராக இருந்துள்ளார்.

இதேபோல் அமெரிக்க எரிசக்தித் துறையில் முக்கியமான பொறுப்புகளுக்கு 4 இந்திய வம்சாவளியினரை ஜோ பைடன் நியமித்துள்ளார்!

ஜெனீவா: சீனாவின் உகான் நகரில் வெளிப்பட்ட கொரோனா வைரஸ் உலக நாடுகளை உலுக்கி வருகிறது. வைரஸ் தொற்று பரவி ஏறத்தாழ ஒரு வருடங்கள் கடந்து விட்டாலும் இதன் வீரியம் குறைந்தபாடில்லை.

கொரோனா பாதிப்பு அதிகமுள்ள நாடுகளின் பட்டியலில் அமெரிக்கா, இந்தியா, பிரேசில், ரஷ்யா, பிரிட்டன் ஆகியவை முதல் 5 இடங்களில் உள்ளன.

இந்நிலையில், உலகம் முழுவதும் கொரோனாவால் பாதிப்பு அடைந்தோர் எண்ணிக்கை 10 கோடியைக் கடந்துள்ளது.
கொரோனா பாதிப்பில் இருந்து இதுவரை 7.21 கோடிக்கும் அதிகமானோர் குணமடைந்துள்ளனர்.

மேலும் இந்த வைரஸ் தாக்குதலுக்கு இதுவரை 21.46 லட்சத்துக்கும் மேற்பட்டோர் உயிரிழந்துள்ளனர். 2.59 கோடிக்கும் அதிகமானோர் சிகிச்சை பெற்று வருகின்றனர். சிகிச்சை பெறுபவர்களில் 1.10 லட்சத்துக்கும் மேற்பட்டோரின் நிலைமை கவலைக்கிடமாக உள்ளது!

கொழும்பு: இந்தியாவில் உற்பத்தி செய்யப்பட்டு வரும் கொரோனா தடுப்பூசிகளை, இந்தியா தனது அண்டை நாடுகளுக்கும் விநியோகம் செய்து வருகிறது.

அண்டை நாடுகளுக்கு முன்னுரிமை என்றா திட்டத்தின் கீழ் இலங்கை, பூடான், மாலத்தீவு, வங்காளதேசம், நேபாளம், செஷல்ஸ், ஆப்கானிஸ்தான், மோர்ஷல்ஸ் ஆகிய நாடுகளுக்கு இந்தியா தடுப்பூசி விநியோகிக்கிறது.

இந்த நிலையில், இந்தியாவில் இருந்து அடுத்த வாரம் முதல் இலவசமாக கொரோனா தடுப்பூசி நமக்கு கிடைக்கும் என்று இலங்கை அதிபர் கோத்தபய ராஜபக்சே கூறியுள்ளார்.

நிகழ்ச்சி ஒன்றில் பேசிய கோத்தபய ராஜபக்சே, “ கொரோனா தடுப்பூசிக்காக நாம் அதிக காலம் காத்திருக்க தேவையில்லை. வரும் 27 ஆம் தேதி இந்தியாவில் இருந்து கொரோனா தடுப்பூசிகள் இலவசமாக நமக்கு கிடைக்கும்.

சுகாதார துறை முன்கள பணியாளர்கள், ராணுவம் மற்றும் காவல்துறை மற்றும் கொரோனாவால் எளிதில் பாதிக்கப்படக் கூடியவர்களுக்கு முதலில் தடுப்பூசி போடப்படும்.  ரஷ்யா, சீனா ஆகிய நாடுகளிடம் இருந்து கொரோனா தடுப்பூசி பெறப்படும்” என்றார்.

பிரிட்டன் ஆக்ஸ்போர்டு பல்கலைக்கழகமும் அஸ்ட்ரா செனகா நிறுவனமும் இணைந்து தயாரித்த கோவிஷீல்டு தடுப்பூசி இந்தியாவில் சீரம் நிறுவனம் தயாரித்து வருகிறது. அதேபோல், பாரத் பயோடெக் நிறுவனம் தயாரித்த கோவேக்சின் தடுப்பூசியும் இந்தியாவில் தயாரிக்கப்பட்டு வருகிறது!

 

வாஷிங்டன்: அமெரிக்காவின் 46-வது அதிபராக ஜோ பைடன், கடந்த 20-ஆம் தேதி பதவியேற்றார். இதையொட்டி முன்னெப்போதும் இல்லாத அளவில் பலத்த பாதுகாப்பு ஏற்பாடுகள் செய்யப்பட்டிருந்தன. 6-ஆம் தேதி டிரம்ப் ஆதரவாளர்கள் பாராளுமன்றத்திற்குள் கலவரத்தில் ஈடுபட்டதால், பாதுகாப்பு பல மடங்கு அதிகரிக்கப்பட்டிருந்தது. தலைநகரில் 25 ஆயிரம் வீரர்கள் பாதுகாப்பு பணியில் ஈடுபடுத்தப்பட்டிருந்தனர்.

இந்நிலையில், பைடன் பதவியேற்பு விழாவிற்கான பாதுகாப்பு பணியில் ஈடுபடுத்தப்பட்ட வீரர்களில் சுமார் 200 தேசிய பாதுகாப்பு படை வீரர்களுக்கு கொரோனா பாதிப்பு உறுதி செய்யப்பட்டுள்ளதாக தகவல் வெளியாகி உள்ளது. அவர்களுக்கு உரிய சிகிச்சை அளிக்கப்படுகிறது. மற்ற வீரர்களுக்கும் கொரோனா பரிசோதனை செய்யப்படுகிறது. எனவே, பாதிப்பு எண்ணிக்கை மேலும் அதிகரிக்கலாம் என தெரிகிறது.

அமெரிக்காவில் கொரோனா வைரசால் இதுவரை 4.10 லட்சம் பேர் உயிரிழந்துள்ளனர். கடந்த இரு தினங்களாக பலி எண்ணிக்கை 4000 என்ற அளவில் உள்ளது.

அடுத்த 100 நாட்களுக்கு மக்கள் முக கவசம் கண்டிப்பாக அணிய வேண்டும் என்றும், கொரோனா வழிகாட்டு நெறிமுறைகளை பின்பற்ற வேண்டும் என்றும் அரசு உத்தரவிட்டுள்ளது. வெளிநாடுகளில் இருந்து வருவோர் தனிமைப்படுத்திக்கொள்ள வேண்டும் என்று அதிபர் பைடன் உத்தரவிட்டுள்ளார்.

வாஷிங்டன்: அமெரிக்காவின் 46-வது ஜனாதிபதியாக 78 வயதான ஜோ பைடன் நேற்று முன்தினம் பதவி ஏற்றார்.

அமெரிக்க ஜனாதிபதியாக வாஷிங்டன் வெள்ளை மாளிகையின் ஓவல் அலுவலகத்தில் வந்து அமர்ந்த முதல் நாளிலேயே ஜோ பைடன் செயல்படத் தொடங்கி விட்டார்.

ஒரே நாளில் அவர் அதிரடியாக 15 நிர்வாக உத்தரவுகளைப் பிறப்பித்தார். அவற்றில் பல உத்தரவுகள் முன்னாள் ஜனாதிபதி டிரம்பின் உத்தரவுகளை மாற்றி அமைத்தது ஆகும்.

ஜோ பைடன் பிறப்பித்த முதல் உத்தரவு, 100 நாட்களுக்கு அமெரிக்கர்கள் அனைவரும் கட்டாயம் முகக் கவசம் அணிய வேண்டும். அமெரிக்காவின் மத்திய அரசு இடங்களில் சமூக இடைவெளியைப் பின்பற்ற வேண்டும் என்பதாகும்.

* 2016-ம் ஆண்டு கையெழுத்திடப்பட்ட பாரீஸ் பருவநிலை ஒப்பந்தத்தில் இருந்து விலகும் முடிவை முந்தைய அமெரிக்க ஜனாதிபதி டிரம்ப் எடுத்திருந்தார். இப்போது மீண்டும் பாரீஸ் பருவநிலை ஒப்பந்தத்தில் அமெரிக்காவை சேர்க்கும் நடைமுறையை தொடங்க வேண்டும்.

* கொரோனா வைரஸ் பெருந்தொற்று பரவல் விவகாரத்தில் சீனாவுக்கு ஆதரவாக நடந்து கொண்டதாக உலக சுகாதார நிறுவனத்தில் இருந்து அமெரிக்கா விலகுவதாக டிரம்ப் அறிவித்திருந்தார். அந்த முடிவு நிறுத்தம்.

* ஈரான், சிரியா, லிபியா, ஏமன் உள்ளிட்ட சில குறிப்பிட்ட முஸ்லிம் நாடுகள் மீது டிரம்ப் பிறப்பித்த பயணத் தடைகள் ரத்து.

* மெக்கிகோ எல்லைச்சுவர் கட்டுமானம் உடனடி நிறுத்தம்

இந்த நிர்வாக உத்தரவுகளின் சிறப்பம்சம், இவற்றை செயல்படுத்த நாடாளுமன்றத்தின் ஒப்புதல் பெறத்தேவையில்லை. அதே நேரத்தில் நாடாளுமன்றம் விவாதித்து நிராகரிக்கலாம். அப்படி நாடாளுமன்றம் நிராகரித்தால் தனது மறுப்பு ஓட்டுரிமை (வீட்டோ) அதிகாரத்தை பயன்படுத்தி, ஜோ பைடன் அதை நிராகரிக்கலாம்.

ஜோ பைடன் முதன்முதலாக அமெரிக்க ஜனாதிபதியாக பத்திரிகையாளர்களை சந்தித்தபோது கூறியதாவது:-

இன்றைய நிர்வாக நடவடிக்கைகளுக்காக நான் பெருமிதம் கொள்கிறேன். நான் அமெரிக்க மக்களுக்கு அளித்த வாக்குறுதிகளை நிறைவேற்றுவதின் மூலம் எனது செயல்பாடுகளை தொடங்கப்போகிறேன். நீண்ட தூரம் செல்ல வேண்டியதிருக்கிறது. இவை நிர்வாக நடவடிக்கைகள் மட்டுமே. இவை முக்கியமானவை. ஆனால் நாம் செய்யப்போகும் பல விஷயங்களுக்கு சட்டம் தேவைப்படும்.

இனி வரும் நாட்களில் நிறைய நிர்வாக உத்தரவுகளில் கையெழுத்து போடுவேன்.

நாம் இன்று கொரோனாவின் கூட்டு நெருக்கடி, அதைத் தொடர்ந்த பொருளாதார நெருக்கடி, பருவநிலை மாற்றம், இனப்பாகுபாடு விவகாரம் ஆகிய பிரச்சினைகளில் செயல்பட போகிறேன் என்று அவர் கூறினார்.

முதன் முறையாக நிருபர்களை சந்தித்த வெள்ளை மாளிகை செய்தி தொடர்பாளர் ஜென் சாகி, ஜோ பைடன் 15 நிர்வாக உத்தரவுகளிலும், 2 குறிப்பாணைகளிலும் கையெழுத்து போட்டதாக தெரிவித்தார்.

ஒரே நாளில் ஜோ பைடன் பிறப்பித்த 15 நிர்வாக உத்தரவுகள், அமெரிக்காவை அதிர வைத்துள்ளன!

வாஷிங்டன்: அமெரிக்காவில் நடந்து முடிந்த ஜனாதிபதி தேர்தலில் ஜனநாயக கட்சி வேட்பாளர் ஜோ பைடன் வெற்றி பெற்று, அமெரிக்காவின் 46-வது ஜனாதிபதியாக தேர்வு செய்யப்பட்டுள்ளார்.

வரும் 20-ஆம் தேதி அவர் பதவியேற்க உள்ளார். இந்தத் தேர்தலில் குடியரசுக்கட்சி சார்பில் போட்டியிட்ட தற்போதைய அதிபர் டிரம்ப் தொடக்கத்தில் தனது தோல்வியை ஏற்றுக்கொள்ளாமல் பிடிவாதமாக இருந்து வந்தார். இதற்கிடையில், தேர்தலில் வெற்றிபெற்ற ஜோ பைடனுக்கு வெற்றிச் சான்றிதழ் அளிப்பதற்காக அமெரிக்க நாடாளுமன்றத்தில் இரு அவைகளின் கூட்டுக்கூட்டம் கடந்த 6-ஆம் தேதி நடைபெற்றது. அப்போது நாடாளுமன்ற கட்டிடத்திற்குள் நுழைந்த டிரம்ப் ஆதரவாளர்கள் வன்முறையில் ஈடுபட்டனர்.

இந்த வன்முறையில் போலீஸ் அதிகாரி உள்பட 5 பேர் உயிரிழந்தனர். உலகையே அதிர்ச்சிக்குள்ளாக்கிய இந்தச் சம்பவம் தொடர்பாக நூற்றுக்கும் மேற்பட்டோரை அமெரிக்க மத்திய புலனாய்வு போலீசார் கைது செய்துள்ளனர்.‌ மேலும் நூற்றுக்கணக்கானோர் மீது குற்ற வழக்கு பதிவு செய்யப்பட்டுள்ளது.‌

இதனிடையே ஜோ பைடனின் பதவியேற்பு விழாவும் நாடாளுமன்ற கட்டிடத்தில் தான் நடைபெற உள்ளது. ஜோ பைடன் பதவியேற்பு விழாவின் போதும் நாடாளுமன்றத்தில் ஆயுதம் ஏந்திய நபர்கள் தாக்குதல் நடத்தலாம் என அமெரிக்க உளவு பிரிவு எச்சரிக்கை விடுத்துள்ளது. இதையடுத்து நாடாளுமன்ற கட்டிடம் முழுவதுமே பாதுகாப்பு படையினர் குவிக்கப்பட்டுள்ளனர்.

இதனிடையே ஜோ பைடன் பதவியேற்பு விழாவின் போது, நாடாளுமன்ற கலவரத்தை போல நாடு முழுவதும் உள்ள 50 மாகாணங்களிலும் வன்முறை சம்பவங்களை நிகழ்த்த டிரம்ப் ஆதரவாளர்கள் திட்டமிட்டிருப்பதாக அமெரிக்க உளவுத் துறை எச்சரித்துள்ளது.

இதனால் தலைநகர் வாஷிங்டன் மற்றும் அதனைச் சுற்றி உள்ள பகுதிகள் முழுவதும் ராணுவ கட்டுப்பாட்டு மண்டலமாக மாற்றப்பட்டுள்ளது.

நாடாளுமன்ற கட்டிடம், அலுவலக கட்டிடங்கள், உச்ச நீதிமன்றம் ஆகிய பகுதிகளில் 7 அடுக்கு பாதுகாப்பு போடப்பட்டுள்ளது. 25 ஆயிரம் தேசிய பாதுகாப்பு படையினர் குவிக்கப்பட்டுள்ளனர்.

ஜோ பைடனின் பதவியேற்பு விழாவையொட்டி தலைநகர் வாஷிங்டனில் ஏற்கனவே அவசரநிலை பிரகடனப்படுத்தப்பட்டுள்ளது குறிப்பிடத்தக்கது!

 

கொழும்பு: உலகின் மிகப்பெரிய தடுப்பூசி திட்டம் இந்தியாவில் தொடங்கியது. இந்த மெகா தடுப்பூசி திட்டத்தை பிரதமர் மோடி துவக்கி வைத்தார். இதையடுத்து, நாடு முழுவதும் 3006 மையங்களில் தடுப்பூசி போடும் பணி நடைபெறுகிறது. முதல் கட்டமாக கொரோனா தடுப்பு முன்கள பணியாளர்களுக்கு தடுப்பூசி போடப்பட்டு வருகிறது. முதற்கட்டமாக 3 கோடி பேருக்கும், 2வது கட்டத்தில் 30 கோடி பேருக்கும் தடுப்பூசி போட இலக்கு நிர்ணயிக்கப்பட்டுள்ளது.

இந்நிலையில், இந்தியாவின் தடுப்பூசி திட்டத்திற்கு இலங்கை பிரதமர் மகிந்த ராஜபக்சே வாழ்த்து தெரிவித்துள்ளார். இது தொடர்பாக அவர் வெளியிட்டுள்ள டுவிட்டர் பதிவில், ‘மிகப்பெரிய தடுப்பூசி திட்டத்துடன், மிக முக்கியமான படியை எடுத்து வைத்தமைக்கு பிரதமர் நரேந்திர மோடி மற்றும் இந்திய அரசுக்கு எனது வாழ்த்துக்கள். பேரழிவை ஏற்படுத்தி வரும் தொற்றுநோய் முடிவுக்கு வருவதற்கான ஆரம்பம்’ என்று கூறி உள்ளார்.

வாழ்த்து தெரிவித்த ராஜபக்சேவுக்கு நன்றி தெரிவித்து பிரதமர் மோடி தனது டுவிட்டர் பக்கத்தில் பதிவிட்டுள்ளார். தடுப்பூசியின் விரைவான வளர்ச்சி மற்றும் அதன் அறிமுகம், ஆரோக்கியமான மற்றும் நோய் இல்லாத உலகத்திற்கான எங்கள் கூட்டு முயற்சியில் முக்கியமான அடையாளம் ஆகும் என்றும் மோடி கூறி உள்ளார்!

 

கொரோனா தடுப்பூசி போட்டுக்கொண்ட 23 முதியவர்கள் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

உலகம் முழுவதும் பரவிவரும் கொரோனா வைரஸை கட்டுப்படுத்த, பல்வேறு நாடுகள் தடுப்பூசி கண்டுபிடிக்கும் பணியில் தீவிரமாக உள்ளது. பெரும்பாலான நாடுகளில் சோதனை முயற்சியாக தடுப்பூசி போடும் பணிகள் தீவிரமாக நடந்துவருகிறது.

இந்நிலையில் நார்வே நாட்டில் கொரோனா தடுப்பூசி போட்டுக்கொண்ட 23 முதியவர்கள் தடுப்பூசி போட்டுக்கொண்ட சிறிது நேரத்தில் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

அமெரிக்க நிறுவனம் கண்டுபிடித்த ஃபைசர் பயோன்டெக் என்ற கொரோனா தடுப்பூசியை போட்டுக்கொண்ட சிறிது நேரத்தில் இவர்கள் 23 பேரும் உயிரிழந்துள்ளனர்.

இதுகுறித்து நிபுணர்கள் கூறிய தகவலில், உயிரிழந்த அனைவரும் 80 வயதுக்கு அதிகமானவர்கள் எனவும், தடுப்பூசி போடுவதற்கு முன் அந்த நபர்கள் மிகவும் மோசமான உடல்நிலையை கொண்டிருந்ததாகக் குறிப்பிட்டுள்ளனர்.

அதேபோல் இந்த 23 பேரின் உயிரிழப்புக்கும், தடுப்பூசிக்கும் நேரடித் தொடர்பு உள்ளதா என்பது இன்னும் சரியாக நிரூபிக்கப்படவில்லை எனவும் கூறப்படுகிறது.

தடுப்பூசி போட்டுக்கொண்ட இவர்களில் பலருக்கு தடுப்பூசி போட்ட பிறகு வயிற்றுப்போக்கு, வாந்தி மற்றும் காய்ச்சல் போன்ற அறிகுறிகள் இருந்ததாகவும் கூறப்படுகிறது.

இதனை அடுத்து 80 வயதுக்கு மேற்பட்டவர்களுக்கு இந்தத் தடுப்பூசியை போடவேண்டாம் என நார்வே பொது சுகாதார நிறுவனம் அறிவுறுத்தியுள்ளது!

 

வாஷிங்டன்: உலக அளவில் கொரோனாவால் பாதிக்கப்பட்ட நாடுகளின் பட்டியலில் அமெரிக்கா தொடர்ந்து முதலிடத்தில் இருக்கிறது.‌

அங்கு வைரஸ் தொற்ற  மரணங்களும் மட்டுமல்லாமல், வேலை இல்லா திண்டாட்டமும் உச்சத்தில் உள்ளது. இதுவரை ஒரு கோடிக்கும் அதிகமான அமெரிக்கர்கள் வேலையை இழந்து வறுமை நிலைக்குத் தள்ளப்பட்டுள்ளனர்.‌

இதனிடையே தற்போதைய ஜனாதிபதி டிரம்பைவிட சிறப்பான முறையில் கொரோனா வைரஸ் பிரச்னையைக் கையாளுவேன் என்ற பிரசாரத்தின் மூலம் ஜனாதிபதி தேர்தலில் வெற்றிபெற்ற ஜனநாயக கட்சி வேட்பாளர் ஜோ பைடன் வருகிற 20-ஆம் தேதி பதவி ஏற்க உள்ளார்.

இந்த நிலையில் கொரோனா தொற்றின் தாக்கத்தில் இருந்து அமெரிக்க பொருளாதாரத்தை மீட்க 1.9 லட்சம் அமெரிக்க டாலர் செலவிடுவதற்கான திட்டத்தை ஜோ பைடன் வெளியிட்டுள்ளார்.

இந்த திட்டத்துக்கு அமெரிக்க நாடாளுமன்றம் ஒப்புதல் கொடுக்குமானால், இதன் மூலம் ஒவ்வொரு அமெரிக்கரும் தலா 1,400 டாலர்  நிதியுதவி பெறுவார்கள் என ஜோ பைடன் தெரிவித்தார்‌.

மேலும் கொரோனாவால் வேலை இழந்தவர்களுக்கு வாரம் தோறும் வழங்கப்படும் நிவாரண தொகை 300 டாலரில் இருந்து 400 டாலராக உயர்த்தப்படும் என தெரிவிக்கப்பட்டுள்ளது!

ஜகார்த்தா, ஜனவரி 15: இந்தோனேசியாவின் சுலவேசி தீவில் இன்று நிலநடுக்கம் ஏற்பட்டது. ரிக்டர் அளவுகோலில் 6.2 அலகாக பதிவாகியிருந்த இந்த நிலநடுக்கம் காரணமாக, அப்பகுதியில் உள்ள கட்டிடங்கள் கடுமையாக குலுங்கின. பொதுமக்கள் அவசரம் அவசரமாக வீடுகளை விட்டு வெளியேறினர்.

ஒரு மருத்துவமனை கட்டிடம் இடிந்து விழுந்து தரைமட்டமானது. அதில் இருந்த நோயாளிகள், ஊழியர்களில் பலர் உள்ளே சிக்கிக்கொண்டனர்.

இதுபற்றி தகவல் அறிந்த மீட்புக்குழுவினர் சம்பவ இடத்திற்குச் சென்று கட்டிட இடிபாடுகளை அகற்றி மீட்புப் பணியில் ஈடுபட்டுள்ளனர். இடிபாடுகளில் சிக்கி சுமார் 35 பேர் உயிரிழந்திருப்பதாகவும், ஏராளமானோர் காயமடைந்ததாகவும் தகவல் வெளியாகி உள்ளது!

வாஷிங்டன்:அமெரிக்க அதிபர் தேர்தலில் வெற்றிபெற்ற ஜோ பைடனுக்கு வெற்றி சான்றிதழ் அளிப்பதற்காக அமெரிக்க நாடாளுமன்றத்தின் இரு அவைகளின் கூட்டுக்கூட்டம் கடந்த 6-ஆம் தேதி நடைபெற்றது.

அப்போது தேர்தலில் தோல்வியடைந்த தற்போதைய அதிபர் டிரம்பின் ஆதரவாளர்கள் நூற்றுக்கணக்கானோர் நாடாளுமன்றத்துக்குள் அத்துமீறி நுழைந்து கடும் வன்முறையில் ஈடுபட்டனர். இந்த வன்முறையை கட்டுப்படுத்த போலீசார் துப்பாக்கிச்சூடு நடத்தியதில் 5 பேர் உயிரிழந்தனர்.

இந்தச் சம்பவத்தை தொடர்ந்து அதிபர் டிரம்பின் பதவி காலம் இன்னும் சில நாட்களில் முடிவடைய இருக்கும் நிலையில், நாடாளுமன்ற கலவரத்துக்கு பொறுப்பேற்று அவர் உடனடியாகப் பதவி விலக வேண்டுமென ஜனநாயக கட்சியினர் வலியுறுத்தினர்.‌ இதற்காக டொனால்டு டிரம்பை பதவி நீக்க வகை செய்யும் தீர்மானத்தைக் கொண்டுவர திட்டமிட்டன.

இதற்காக, பிரிதிநிதிகள் சபையில் டிரம்பிற்கு எதிராக பதவி நீக்க தீர்மானத்தை கொண்டுவந்து வாக்கெடுப்பு நடத்துவதற்கான பணிகளை ஜனநாயக கட்சிகள் மேற்கொண்டன.

இந்நிலையில், டிரம்பை பதவி நீக்குவதற்கான தீர்மானம் தொடர்பான வாக்கெடுப்பு அமெரிக்க பிரிதிநிதிகள் சபையில் நடைபெற்றது.

இந்த வாக்கெடுப்பில் 222 ஜனநாயக கட்சி உறுப்பினர்களும், 10 குடியரசு கட்சி உறுப்பினர்களும் டிரம்பிற்கு எதிராகப் பதவி நீக்க தீர்மானத்திற்கு ஆதரவு அளித்தனர்.

இதன் மூலம் இரண்டாவது முறையாக பதவிநீக்க நடைமுறைகளை அதிபர் டொனால்டு டிரம்ப் எதிர்கொள்கிறார்.

தகுதி நீக்க தீர்மானம் நிறைவேறியுள்ளதால், செனட் அவையில் டிரம்ப் மீது விசாரணை நடக்கும். செனட்டில் அவர் மீதான குற்றத்தை உறுதி செய்ய மூன்றில் இரண்டு பங்கு பெரும்பான்மை தேவை. இதனால், குறைந்தது 17 குடியரசுக் கட்சியினர் டிரம்புக்கு எதிராக வாக்களிக்கவேண்டும்.

குற்றம் உறுதி செய்யப்படும் பட்சத்தில் டொனால்டு டிரம்ப் அதிபர் பதவியில்

இருந்து நீக்கப்படுவார். அவர் மீண்டும் அதிபர் தேர்தலில் போட்டியிட முடியாது!

 

கனடா: கொரோனா பரவல் காரணமாக கனடாவில் நான்கு வார காலத்திற்கு இரவு நேர ஊரடங்கு அமல்படுத்தப்பட்டுள்ளது. அங்கு இரவு 8 மணி முதல் அதிகாலை 5 மணி வரையில் மக்கள் வீடுகளை விட்டு வெளியே வர தடை விதிக்கப்பட்டுள்ளது. 

ஆனாலும், அத்தியாவசிய பணியாளர்கள், செல்லப்பிராணிகளுடன் நடைப்பயிற்சி செய்பவர்களுக்கு மட்டும் ஊரடங்கில் அனுமதி விலக்கு அளிக்கப்பட்டுள்ளது. 

இந்நிலையில், கியூபெக் நகரின் ஷெர்ப்ரூக் பகுதியைச் சேர்ந்த பெண் ஒருவர் தனது கணவரை நாயாகப் பாவித்து நடைபயிற்சி செல்வது போல் சென்றுள்ளார். இதனை கவனித்த போலீசார் இது குறித்து அவரிடம் விசாரணை நடத்தினர்.

நான் எனது செல்லப்பிராணியுடன் தான் நடைப்பயிற்சி செல்கிறேன். என்று கூலாக பதில் அளித்துள்ளார் அவர். இதனை அடுத்து அரசின் அறிவிப்பை மீறியதற்காக இருவர் மீதும் அரசின் விதிமீறலுக்கான வழக்கு பதிவு செய்யப்பட்டதோடு அபராதமும் விதிக்கப்பட்டது!

 

டோக்கியோ: இங்கிலாந்தில் உருவான உருமாறிய கொரோனாவில் இருந்து மாறுபட்ட புதிய வகை உருமாறிய கொரோனா, ஜப்பானில் கண்டுபிடிக்கப்பட்டுள்ளது.

பிரேசில் நாட்டில் இருந்து விமானத்தில் டோக்கியோ விமான நிலையத்துக்கு வந்து சேர்ந்த 4 பேரிடம் இந்தப் புதிய கொரோனா உறுதி செய்யப்பட்டது.

45 வயதான ஆண், 35 வயதான பெண், 19 வயதுக்குட்பட்ட ஓர் ஆண், பெண் ஆகியோருக்கு இந்த கொரோனா கண்டுபிடிக்கப்பட்டது.

இவர்களில் 2 பேருக்கு எந்த அறிகுறியும் இல்லை. இருப்பினும், 4 பேரும் மருத்துவமனையில் அனுமதிக்கப்பட்டுள்ளனர்.

இந்த மாறுபட்ட கொரோனா குறித்து உலக சுகாதார நிறுவனத்துடனும், பிற நாடுகளுடனும் ஜப்பான் ஆலோசனை நடத்தி வருகிறது. தற்போதைய தடுப்பூசிகள், இந்த கொரோனாவுக்கு எதிராகச் செயல்படுமா என்பது இன்னும் தெளிவுபடுத்தப்படவில்லை!

 

ஜெனீவா: உலகம் முழுவதும் தற்போது 2-வது கட்ட கொரோனா அலை அமெரிக்காவிலும், ஐரோப்பிய நாடுகளிலும் தனது கோர முகத்தைக் காட்டி வருகிறது. இந்தச் சூழலில் இங்கிலாந்தில் கண்டறியப்பட்ட புதிய வகை கொரோனா வைரஸ் 8 ஐரோப்பிய நாடுகளில் பரவியுள்ளதாக உலக சுகாதார அமைப்பு தெரிவித்துள்ளது.

இந்நிலையில் உலகம் முழுவதும் தற்போதைய நிலவரப்படி, 9,06,88,733 பேருக்கு கொரோனா வைரஸ் தொற்று உறுதி செய்யப்பட்டுள்ளது. கொரோனா பாதிப்பில் இருந்து இதுவரை 6,48,11,380 பேர் குணமடைந்துள்ளனர். மேலும் வைரஸ் தாக்குதலுக்கு இதுவரை 19 லட்சத்து 43 ஆயிரத்து 090 பேர் உயிரிழந்துள்ளனர்.

கொரோனா தொற்றுக்கு தற்போது 2,39,34,263 பேர் சிகிச்சை பெற்று வருகின்றனர். சிகிச்சை பெறுபவர்களில் 1,08,531 பேரின் நிலைமை கவலைக்கிடமாக உள்ளது!

இந்தோனேசியாவின் ஜகார்த்தா நகரிலிருந்து போன்டியானக் எனும் நகருக்கு நேற்று நண்பகல்(உள்ளூர்நேரப்படி) 2.36 மணிக்கு ஸ்ரீவிஜயா விமானநிறுவனத்துக்குச் சொந்தமான போயிங் 737-500 விமானம் புறப்பட்டது. விமானத்தில் 50 பயணிகள், 12 ஊழியர்கள் இருந்தனர்.

விமானம் புறப்பட்டவுடன் விமானி, கட்டுப்பாட்டு அறையைத் தொடர்பு கொண்டு விமானத்தை 29 ஆயிரம் அடி உயரத்தில் பறக்க அனுமதி கேட்டுள்ளார். ஆனால், அடுத்த4 நிமிடங்களில் விமானம் கட்டுப்பாட்டு அறையின் தொடர்பிலிருந்து துண்டிக்கப்பட்டது.

இதையடுத்து, இந்தோனேசிய அரசின் 4 போர் கப்பல்கள், 12-க்கும் மேற்பட்ட படகுகள் இணைந்து லான்சங் தீவுக்கும், லாக்கி தீவுக்கும் இடையே தேடுதல் வேட்டையில் ஈடுபட்டன. வடக்கு ஜகார்த்தாபகுதி என்பது ஆயிரக்கணக்கான தீவுகளைக் கொண்டதாகும்.

இந்தத் தீவுகளில் தேடுதல் வேட்டை தீவிரமாக நடந்தது.இந்த தேடுதலின்போது, விமானத்தின் உடைந்த பாகங்கள், உடைகளை மீனவர்கள் கண்டுபிடித்ததாக தேசிய மீட்புப்பபடையின் துணைத் தலைவர் பாம்பாங் சூர்யோ அஜி தெரிவித்தார். கடலில் இருந்து மீட்கப்பட்ட பொருட்களையும் தேசிய மீட்புப்படையினரிடம் மீனவர்கள் ஒப்படைத்தனர்.

இதற்கிடையே இந்தோனேசியா தேசிய தேடுதல் மீட்புப்படையினர், கடல் பகுதியிலிருந்து விமானத்தின் பாகங்களையும், கடலில் மிதந்த பயணிகளின்உடலையும் இன்று காலை மீட்டதாகத் தவல்கள் தெரிவிக்கின்றன.

ஆனாலும், விமானத்திலிருந்து ரேடார் சிக்னல் வருவதால் இந்தோனேசியஅரசு நம்பிக்கையாக இருக்கிறது. இதன் காரணமாக கடலில் விமானம் விழுந்து விபத்துக்குள்ளானது என்பதை அதிகாரபூர்வாக அறிவிக்கத் தயங்கி வருகிறது.

இந்தோனேசியா கடற்பகுதியில் விமானங்கள் விழுவது தொடர்ந்து நடந்து வருகிறது. இதற்கு முன் கடந்த 2018-ல் விமானம் லயன் ஏர்வேஸுக்கு சொந்தமான போயிங்737 மேக்ஸ்8 189 பயணிகளுடன் கடலில் விழுந்து விபத்துக்குள்ளானது.

இதில் அனைவரும் உயிரிழந்தனர். 1997-ஆம் ஆண்டு சுமத்ரா தீவு அருகே கருடா விமானம் விபத்துக்குள்ளானதில் 234 பயணிகள் உயிரிழந்தனர். 2014-ஆம் ஆண்டில் ஏர் ஏசியா விமானம் இந்தோனேசியாவின் சுரபயா நகரிலிருந்து சிங்கப்பூருக்கு புறப்பட்டபோது கடலில் விழுந்தது இதில் 162 பேர் உயிரிழந்தனர் என்பது குறிப்பிடத்தக்கது!

இலங்கை போரில் உயிரிழந்த தமிழர்களின் நினைவாக அமைக்கப்பட்ட முள்ளிவாய்க்கால் நினைவிடம் இரவோடு இரவாக பொக்லைன் இயந்திரம் மூலம் இடிக்கப்பட்டு தரைமட்டமாக்கி உள்ளதால், யாழ்ப்பாணத்தில் பதற்றம் நிலவி வருகிறது.

அரசின் நடவடிக்கைக்கு எதிர்ப்பு தெரிவித்து, மாணவர்கள், தமிழ் தேசிய கூட்டமைப்பினர் உள்ளிட்டோர் போராட்டத்தில் ஈடுபட்டுள்ளனர்.

இலங்கையில் தமிழர்களுக்கு சம உரிமை வழங்க வேண்டும் என அங்கு அரசுமுறை பயணம் மேற்கொண்ட இந்திய வெளியுறவுத்துறை அமைச்சர் ஜெய்சங்கர் வலியுறுத்தியிருந்த நிலையில், தமிழர்களின் நினைவாக யாழ்ப்பாணம் பல்கலைக்கழக வளாகத்தில் அமைக்கப்பட்டிருந்த நினைவிடத்தை இடித்து தரைமட்டமாக்கப்பட்டுள்ளது. 

இலங்கை அரசின் செயலுக்கு தலைவர்கள் பலர் கண்டனம் தெரிவித்துள்ளனர்.

இலங்கையில் உள்நாட்டுப் போரின்போது, அப்பாவி தமிழ் இன மக்கள் கொத்து கொத்தாகக் கொல்லப்பட்டதை நினைவுகூறும் வகையில் 2019 ஆம் ஆண்டு யாழ்ப்பாணம் பல்கலைக்கழக வளாகத்தில் முள்ளிவாய்க்கால் நினைவிடம் அமைக்கப்பட்டு நினைவேந்தல் நிகழ்ச்சியும் நடைபெற்று வந்தது குறிப்பிடத்தக்கது!

இலங்கை போரில் உயிரிழந்த தமிழர்களின் நினைவாக அமைக்கப்பட்ட முள்ளிவாய்க்கால் நினைவிடம் இரவோடு இரவாக பொக்லைன் இயந்திரம் மூலம் இடிக்கப்பட்டு தரைமட்டமாக்கி உள்ளதால், யாழ்ப்பாணத்தில் பதற்றம் நிலவி வருகிறது.

அரசின் நடவடிக்கைக்கு எதிர்ப்பு தெரிவித்து, மாணவர்கள், தமிழ் தேசிய கூட்டமைப்பினர் உள்ளிட்டோர் போராட்டத்தில் ஈடுபட்டுள்ளனர்.

இலங்கையில் தமிழர்களுக்கு சம உரிமை வழங்க வேண்டும் என அங்கு அரசுமுறை பயணம் மேற்கொண்ட இந்திய வெளியுறவுத்துறை அமைச்சர் ஜெய்சங்கர் வலியுறுத்தியிருந்த நிலையில், தமிழர்களின் நினைவாக யாழ்ப்பாணம் பல்கலைக்கழக வளாகத்தில் அமைக்கப்பட்டிருந்த நினைவிடத்தை இடித்து தரைமட்டமாக்கப்பட்டுள்ளது. 

இலங்கை அரசின் செயலுக்கு தலைவர்கள் பலர் கண்டனம் தெரிவித்துள்ளனர்.

இலங்கையில் உள்நாட்டுப் போரின்போது, அப்பாவி தமிழ் இன மக்கள் கொத்து கொத்தாகக் கொல்லப்பட்டதை நினைவுகூறும் வகையில் 2019 ஆம் ஆண்டு யாழ்ப்பாணம் பல்கலைக்கழக வளாகத்தில் முள்ளிவாய்க்கால் நினைவிடம் அமைக்கப்பட்டு நினைவேந்தல் நிகழ்ச்சியும் நடைபெற்று வந்தது குறிப்பிடத்தக்கது!

வாஷிங்டன்: அமெரிக்க அதிபர் டிரம்ப் தனது ஆதரவாளர்களை ஊக்குவிக்கும் வகையிலும், வன்முறையைத் தூண்டும் வகையிலும் பேசியதுடன், அவர் பேசியபோது எடுக்கப்பட்ட வீடியோக்களை தனது டுவிட்டரில் பதிவேற்றம் செய்தார். அதேபோல், டிரம்பின் பேச்சு பேஸ்புக், யூடியூப் உள்ளிட்ட சமூக வலைதளங்களிலும் வேகமாகப் பரவியது.

இதனால் வன்முறையைத் தூண்டும் வகையில் இருந்த அந்த வீடியோக்களை டுவிட்டர், பேஸ்புக், யூடியூப் ஆகிய நிறுவனங்கள் தங்கள் பக்கங்களில் இருந்து உடனடியாக நீக்கின. அதன்பின்னர் டிரம்பின் டுவிட்டர் பக்கம் நிரந்தரமாக முடக்கப்பட்டது. மேற்கொண்டு வன்முறை பரவாமல் தடுக்கும் வகையில் இந்த நடவடிக்கை எடுக்கப்பட்டதாக டுவிட்டர் தெரிவித்துள்ளது.

இதனையடுத்து அதிபர் டிரம்ப் தனது அதிகாரப்பூர்வ டுவிட்டர் கணக்கில் தனது கருத்தை பதிவு செய்தார். அதில் டுவிட்டர் நிறுவனம் பேச்சு சுதந்திரத்தை தடை செய்வதாகவும், தன்னைப் பேசாமல் அமைதியாக இருக்கச் செய்வதற்காக தனது கணக்கை நீக்கியிருப்பதாகவும் குற்றம்சாட்டினார். டுவிட்டர் ஊழியர்கள் ஜனநாயக கட்சி மற்றும் தீவிர இடதுசாரிகளுக்கு ஆதரவாக செயல்படுவதாகவும் கூறினார்.

கருத்துக்களைச் சுதந்திரமாகப் பதிவு செய்யும் வகையில், எதிர்காலத்தில் டுவிட்டருக்கு மாற்றாக சொந்த தளத்தை உருவாக்குவதற்கான சாத்தியக்கூறுகள் குறித்து ஆராய்ந்து வருவதாகவும் டிரம்ப் கூறினார். பின்னர், சில நிமிடங்களில் அந்த டுவீட்டுகள் நீக்கப்பட்டன!

புதுடெல்லி: புதுடெல்லியில் இந்திய தேசியப் பாதுகாப்பு ஆலோசகர் அஜித் தோவலுடன்  பிரான்ஸ் அதிபர்  இமானுவல் மேக்ரானின் தூதரக ஆலோசகரான இம்மானுவேல் பொன்னே பேச்சு வார்த்தை நடத்தினார்.

இது குறித்து அவர் பேசுகையில், ஐக்கிய நாடுகள் பாதுகாப்பு கவுன்சிலில், இந்தியாவுக்கெதிராக சீனா கேம் ஆடுவதை அனுமதிக்கமாட்டோம் என்று தெரிவித்தார்.

எப்போதெல்லாம் இந்தியாவுக்கு நேரடியாக அச்சுறுத்தல் ஏற்படுகிறதோ, அப்போதெல்லாம் இதை நாங்கள் தெளிவுபட தெரிவித்துள்ளோம் . காஷ்மீர் விவகாரமானாலும் சரி, நாங்கள் ஐக்கிய நாடுகள் பாதுகாப்பு கவுன்சிலில் இந்தியாவுக்கு ஆதரவாகத்தான் இருந்து வந்துள்ளோம்.

வழக்கம்போல கேம் ஆடும் சீனாவை நாங்கள் கேம் ஆட அனுமதித்ததில்லை. இமயமலை விஷயத்தில் நாங்கள் வெளியிட்டுள்ள அறிக்கையை பாருங்கள், நாங்கள் மிகவும் தெளிவாக இருக்கிறோம்.வெளிப்படையாகவும், சீனாவுக்கு தனிப்பட்ட முறையிலும் நாங்கள் தெரிவிப்பது என்னவென்றால், நாங்கள் எப்போதும் ஒரே நிலைப்பாட்டில்தான் உள்ளோம் என்பதுதான் என்று அவர் கூறினார்.

நியூயார்க்: அமெரிக்க அதிபர் தேர்தலில் ஜனநாயக கட்சி வேட்பாளரான ஜோ பைடன் வெற்றிபெற்றார். ஜோ பைடனின் வெற்றியை அங்கீகரிக்கும் வகையில் அதற்கான சான்றை வழங்கும் நடைமுறை வாஷிங்டன்னில் உள்ள பாராளுமன்ற கட்டிடத்தில் இன்று நடைபெற்று வந்தது. காங்கிரஸ் உறுப்பினர்கள் முன்னிலையில் பைடனை வெற்றியாளராக அங்கீகரிக்கும் நடைமுறைகளை மேற்கொண்டு வந்தனர். அப்போது, திடீரென பாராளுமன்ற கட்டிடத்திற்கு வெளியே டிரம்ப் ஆதரவாளர்கள் ஆயிரக்கணக்கானோர் திரண்டனர். இது ஒரு புறமிருக்க வெள்ளைமாளிகையில் செய்தியாளர்களை சந்தித்த டிரம்ப் தேர்தலில் முறைகேடு நடந்துள்ளதாகவும், முடிவுகளை ஏற்றுக்கொள்ளப்போவதில்லை எனவும் பேசினார்.

டிரம்பின் பேச்சால் உணர்ச்சிவசப்பட்ட அவரது ஆதரவாளர்கள் பாராளுமன்ற கட்டிடத்திற்குள் நுழைய முற்பட்டனர்.

இதனால், பாதுகாப்பு பணியில் இருந்த போலீசார் அவர்களை தடுக்கும் நடவடிக்கையில் ஈடுபட்டனர். அப்போது பாதுகாப்பு படையினருக்கும் டிரம்ப் ஆதரவாளர்களுக்கும் இடையே மோதல் ஏற்பட்டது. பாதுகாப்பு படையினரை மீறி நுற்றுக்கணக்கானோர் பாராளுமன்ற கட்டிடத்திற்குள் நுழைந்தனர். இந்த சம்பவம் அமெரிக்காவில் பெரும் பரபரப்பை ஏற்படுத்தியது. தனது ஆதரவாளர்களை ஊக்குவிக்கும் வகையிலும், வன்முறையை தூண்டும் வகையிலும் பேசிய டிரம்ப் தான் பேசிய வீடியோக்களை டுவிட்டரில் பதிவேற்றம் செய்தார்.

அதேபோல், டிரம்பின் பேச்சு பேஸ்புக், யூடியூப் உள்ளிட்ட சமூகவலைதளங்களிலும் வேகமாக பரவியது. இதையடுத்து, வன்முறையை தூண்டும் வகையில் இருந்த அந்த வீடியோக்களை டுவிட்டர், பேஸ்புக், யூடியூப் ஆகிய நிறுவனங்கள் தங்கள் பக்கங்களில் இருந்து உடனடியாக நீக்கினர். குறிப்பாக, தேர்தலில் முறைகேடு நடந்துள்ளதாக பேசிய வீடியோவை டுவிட்டரில் பதிவிட்டிருந்தார். அவர் தனது அதிகாரப்பூர்வ தனிப்பட்ட டுவிட்டர் பக்கமான பக்கத்தில் இருந்து சில டுவிட்டுகள் செய்தார்.

இந்த டுவிட்டுகள் வன்முறையை தூண்டும் வகையில் இருந்ததால் அவற்றை டுவிட்டர் நிறுவனம் உடனடியாக நீக்கியது. மேலும், விதிகளை மீறியதற்காக அதிபர் டிரம்பின் பக்கத்தை டுவிட்டர் நிறுவனம் தற்காலிகமாக முடக்கியுள்ளது. அடுத்த 12 மணி நேரம் டுவிட்டர் பக்கத்தை டிரம்ப் பயன்படுத்த முடியாத நிலைக்கு முடக்கப்பட்டுள்ளது என டுவிட்டர் நிறுவனம் தெரிவித்துள்ளது. அதன் பின்னரும் தொடர்ந்து டிரம்ப் வன்முறை மற்றும் தேர்தல் தொடர்பான தவறான தகவல்களை பரப்பினால் அவரின் பக்கம் நிரந்தரமாக நீக்கப்படும் என டுவிட்டர் நிறுவனம் எச்சரிக்கை விடுத்துள்ளது!

ஜெனீவா: உலக நாடுகளை உலுக்கி வரும் கொரோனா வைரஸ் கடந்த 2019 ஆம் ஆண்டு டிசம்பரில் முதன் முதலாக சீனாவின் உகான் நகரில் கண்டறியப்பட்டது.

இந்த வைரஸின் தோற்றம் குறித்து ஆய்வு செய்ய உலக சுகாதார அமைப்பு நடவடிக்கை எடுத்து வருகிறது. இதன் பலனாக சர்வதேச நிபுணர் குழு ஒன்றை ஜனவரி முதல் வாரத்தில் சீனாவுக்கு அது அனுப்பி வைக்க முடிவு செய்தது.

இந்தச் சிறப்புக்குழு உகான் நகரில் மனிதர்களிடம் முதன் முதலில் கொரோனா கண்டறியப்பட்ட இடங்களில் முழுமையாக ஆய்வு செய்யும் என தெரிவித்தது. இந்நிலையில், சீனாவில் ஆய்வு செய்யவுள்ள நிபுணர் குழுவுக்கு அந்நாட்டு அரசு அனுமதி அளிக்கவில்லை என உலக சுகாதார அமைப்பின் தலைவர் டெட்ரோஸ் அதனோம்  அதிருப்தி தெரிவித்துள்ளார்.

இதுதொடர்பாக டெட்ரோஸ் அதனோம் வெளியிட்டுள்ள அறிக்கையில், சீனாவில் தோன்றிய கொரோனா வைரஸ் தொடர்பாக ஆய்வுசெய்ய அங்கு நிபுணர் குழுவை அனுப்ப முடிவுசெய்தோம். ஆனால் நிபுணர் குழுவுக்கு அனுமதி அளிக்காமல் சீன அரசு தாமதித்து வருவது மிகவும் ஏமாற்றம் அளிக்கிறது என தெரிவித்துள்ளார்!

வாஷிங்டன்: அமெரிக்க அதிபர் தேர்தலில் தோல்வி அடைந்த அதிபர் டிரம்ப், தேர்தல் முடிவுகளை மாற்ற இறுதி முயற்சி மேற்கொண்டதாக அந்நாட்டில் பரபரப்பு ஏற்பட்டுள்ளது. 

ஜார்ஜியா மாகாணத்தின் உயர் தேர்தல் அதிகாரியிடம் தேர்தல் முடிவை மாற்றத் தேவையான வாக்குகளைக் கண்டுபிடிக்கக் கூறியதாகச் சொல்லப்படும்  ஆடியோ ஒன்று வெளியாகி அதிர்ச்சியை ஏற்படுத்தியுள்ளது. வரும் 6 ஆம் தேதி அதிபர் தேர்தலுக்கான  தேர்தல் வாக்குகளை அமெரிக்க நாடாளுமன்றம் சரிபார்க்க உள்ள நிலையில், இந்த ஆடியோ வெளியாகி பரபரப்பைல் கிளப்பியுள்ளது.

ஒரு மணி நேரம் பதிவாகியுள்ள இந்த ஆடியோவில் டிரம்ப், "நான் வெறும் 11,780 வாக்குகளைப் பெற விரும்புகிறேன்" என குடியரசுக் கட்சியை சேர்ந்த ஜார்ஜியா மாகாண செயலாளர் பிராட் ராஃபென்ஸ்பெர்கரிடம் கூறுவதாக உள்ளது. அமெரிக்காவின் பிரபல நாளிதழான வாஷிங்டன் போஸ்ட் இந்தச் செய்தியை வெளியிட்டுள்ளது. 

டிரம்புக்கு பதிலளிக்கும்,  ராஃபென்ஸ்பெர்கர், ஜார்ஜியா மாகாணத்தின் தேர்தல் முடிவுகள் சரியானவை என்று பதிலளிப்பதாக அதில் உள்ளது. ஜார்ஜியா மாகாணத்தில் ஜோ பைடன், 74 தேர்தல் சபை வாக்குகளை அதிகம் பெற்று அதிபர் தேர்தலில் டிரம்பைத் தோற்கடித்திருந்தார்.

அமெரிக்க அரசியல் களத்தில் அதிர்வலைகளை ஏற்படுத்தியுள்ள இந்த ஒலிப்பதிவு குறித்து இதுவரை வெள்ளை மாளிகை கருத்தேதும் தெரிவிக்கவில்லை. இதற்கிடையே, அமெரிக்க துணை அதிபராக தேர்வு செய்யப்பட்டுள்ள கமலா ஹாரிஸ் இந்த விவகாரத்திற்கு கடும் கண்டனம் தெரிவித்துள்ளார்!

வாஷிங்டன்: உலக அளவில் கொரோனா பாதிப்பு அதிகம் காணப்படும் நாடுகளின் பட்டியலில் முதலிடம் வகிப்பது அமெரிக்காதான். வல்லரசு நாடான அமெரிக்கா கொரோனா பாதிப்பை கட்டுப்படுத்த முடியாமல் திணறியது.

தற்போது, கொரோனா தடுப்பூசிக்கு அனுமதி அளிக்கப்பட்டு, தடுப்பூசி போடப்பட்டு வருகிறது.  4.2 மில்லியன் பேருக்கு கொரோனா தடுப்பூசியின் முதல் டோஸ் போடப்பட்டுள்ளது.

இந்த நிலையில், அமெரிக்காவில் கடந்த 24 மணி நேரத்தில் இதுவரை இல்லாத அளவாக 2 லட்சத்து 77 ஆயிரம் பேருக்கு கொரோனா உறுதி செய்யப்பட்டுள்ளது.

அமெரிக்காவில் இதுவரை கொரோனா பாதித்தவர்கள் எண்ணிக்கை 2.04 கோடியை தாண்டியுள்ளது. தொற்று பாதிப்பால் உயிரிழந்தவர்கள் எண்ணிக்கை 3 லட்சத்து  50 ஆயிரத்தை நெருங்கிவிட்டது!

 

லாகூர்:

பாகிஸ்தானில் சிறுபான்மையாக வாழ்ந்துவரும் இந்துக்கள், சீக்கியர்கள் உள்ளிட்டோருக்கு எதிரான வன்முறைகளும், குற்றங்களும் தொடர்ந்து அதிகரித்து வருகிறது.

குறிப்பாக, இந்து மதத்தை சேர்ந்தவர்களையும் அவர்கள் வழிபாடு நடத்தும் கோவில்களையும் குறிவைத்து தாக்குதல் சம்பவங்கள் அரங்கேறி வருகிறது. இந்த சம்பவங்களை அந்நாட்டில் செயல்பட்டு வரும் பல்வேறு அரசியல் கட்சிகளும், மத அமைப்புகளும் ஆதரிக்கின்றன.

இதற்கிடையில், அந்நாட்டின் கைபர் பக்துவா மாகாணம் கரக் மாவட்டம் தெறி என்ற கிராமத்தில் இந்து மத கோவில் ஒன்று உள்ளது. இந்த கோவிலில் வாரம் தோறும் அப்பகுதியில் வசித்துவரும் இந்துக்கள் வழிபாடு செய்வது வழக்கம்.

இந்நிலையில், இந்து மத கோவில் அமைந்திருந்த தெறி கிராமம் அருகே ஜமாத் உலேமா இ இஸ்லாம் எஃப் என்ற இஸ்லாமிய மதவாத கட்சி நேற்று பேரணி ஒன்றை நடத்தியது.

இந்த பேரணியின் போது கூடியிருந்தவர்களிடம் இந்துமத கோவிலை அழிக்க வேண்டும் என்ற நோக்கத்தோடு வெறுப்புணர்வை தூண்டும் வகையிலான பேச்சை சிலர் ஒலிப்பெருக்கி மூலம் பேசினர்.

இந்த வெறுப்புணர்வு பேச்சால் உணர்ச்சிவசமடைந்த பேரணியில் கூடியிருந்தவர்கள் தெறி கிராமத்தில் உள்ள இந்து மத கோவிலை அழிக்க வேண்டும் என்ற நோக்கத்தோடு கும்பலாக கோவில் இருந்த பகுதிக்கு சென்றனர்.

கிராமத்தில் இந்து மத கோவில் அமைந்திருந்த பகுதிக்கு சென்ற அந்த கும்பல் கோவிலை முற்றுகையிட்டனர். மேலும், அந்த இந்து மத கோவில் கட்டிடத்தை இடித்தனர். கோவிலை தீ வைத்து கொளுத்தி அட்டூழியத்தில் ஈடுபட்டனர்.

அந்த கும்பல் நடத்திய தாக்குதலில் இந்து மத கோவில் தீக்கிரையாகி, கட்டிடம் தகர்க்கப்பட்டு முழுவதும் அழிக்கப்பட்டது. கோவில் முழுவது அழிக்கப்பட்ட பின்னர் சில மணி நேரம் கழித்தே அப்பகுதியில் போலீசார் குவிக்கப்பட்டு நிலைமை கட்டுக்குள் கொண்டுவரப்பட்டது.

இந்து மத கோவில் அழிக்கப்படுவதற்கு காரணமாக இருந்து ஜமாத் உலேமா இ இஸ்லாம் எஃப் அரசியல் கட்சியின் பேரணி குறித்து கருத்து தெரிவித்துள்ள அக்கட்சியின் தலைவர் மௌளானா அதர் ரகுமான் தனது கட்சி பேரணிக்கும் இந்து மத கோவில் தீ வைத்தும், இடித்தும் எரிக்கப்பட்டதற்கும் எந்த தொடர்பும் இல்லை என கூறியுள்ளார்.

மேலும், இந்த தாக்குதல் சம்பவத்திற்கு அவர் கண்டனமும் தெரிவித்துள்ளார்

லண்டன், டிசம்பர் 30: இங்கிலாந்தில் நேற்று ஒரே நாளில் 53 ஆயிரத்திற்கும்  மேற்பட்ட  கொரோனா பாதிப்புகள் பதிவாகி உள்ளது. அரசின் புள்ளிவிவரங்கள் படி கடந்த 24 மணி நேரத்தில் 53,135 பேர் கொரோனா பாதிப்புக்கு ஆளாகி உள்ளனர்.  இங்கிலாந்தில் 71,100 க்கும் மேற்பட்ட உயிரிழப்புகள் ஏற்பட்டு உள்ளன.

தலைநகர் லண்டனில் கொரோனா நோயாளிகளின் எண்ணிக்கை அதிகரித்துவரும் நிலையில், மருத்துவமனைகளில் அவசர சிகிச்சைp பிரிவு மொத்தமாக முடங்கியுள்ளதாக தகவல் வெளியாகியுள்ளது. இதனால் எஞ்சிய நோயாளிகளை யார்க்சயர் பகுதி மருத்துவமனைகளுக்கு மாற்றப்படும் நிலை ஏற்பட்டுள்ளது.

இந்த நிலையில் இங்கிலாந்தில்  பரவி வரும் புதிய வீரியமிக்க கொரோனா பாதிப்பு நாடு தழுவிய மூன்றாவது ஊரடங்கிற்கு காரணமாக அமையும் என்ற தகவலும் வெளியாகியுள்ளது.

மேலும், லண்டன் மருத்துவமனைகளில் இடம் பற்றாக்குறை ஏற்பட்டுள்ளதால், மருத்துவமனைகளுக்கு வெளியே கூடாரங்கள் அமைத்து நோயாளிகளை பராமரிக்க வேண்டிய மிக மோசமான நிலைக்கு தள்ளப்பட்டுள்ளது.

பொதுவாக போர் காலகட்டத்தில் இதுபோன்ற கூடாரங்கள் அமைத்தே நோயாளிகளை பரமாரிக்கும் நிலை உருவாகும்.தற்போது லண்டனிலும் அதே நிலை உருவாகியுள்ளதாக மருத்துவர்கள் தரப்பு எச்சரிக்கை விடுத்துள்ளனர்.

இதனிடையே, சில லண்டன் மருத்துவமனைகளின் நிர்வாகிகள் தரப்பு பல பிரதான யார்க்சயர் மருத்துவமனைகளிடம் கொரோனா நோயாளிகளைப் பெறுமாறு கோரிக்கை விடுத்துள்ளனர். லண்டன் மருத்துவமனைகளின் தீவிர சிகிச்சை பிரிவுகள் தற்போது 114 சதவீத திறனில் செயல்படுவதாக தெரிய வந்துள்ளது!

பீஜிங்: சீனாவின் உகான் நகரில் உருவான கொரோனா வைரஸ் உலகத்தையே ஆட்டிப் படைத்து வருகிறது. அந்த வைரஸின் தாக்கம் தற்போது சற்றுக் குறையத் தொடங்கி உள்ளது. மேலும் கொரோனாவுக்கு மருந்தும் கண்டுப்பிடிக்கப்பட்டுள்ளது. இந்த நிலையில், இங்கிலாந்தில் கொரோனா வைரஸ் உருமாற்றம் அடைந்து புதிய வகை வைரஸாகப் பரவி வருகிறது. இந்த உருமாற்றம் அடைந்த கொரோனா வைரஸ் 70 சதவீதம் வேகமாகப் பரவி வருகிறது.

இந்த நிலையில் சீன தலைநகர் பெய்ஜிங்கில் மீண்டும் கொரோனா தொற்று மீண்டும் பரவத் தொடங்கியுள்ளது.

தலைநகர் பீஜிங்கில்  21 பேருக்கு கொரோனா தொற்று உறுதி செய்யப்பட்டிருக்கிறது. இதையடுத்து பீஜிங்  நகரில் கொரோனா தொற்று பரவலைத் தடுக்க அவசர நிலையை சீனா பிறப்பித்துள்ளது.

புதிதாக உறுதிப்படுத்தப்பட்ட 21 கொரோனா வைரஸ் பாதிப்புகள்  சீனாவில் பதிவாகியுள்ளதாக தேசிய சுகாதார ஆணையம் திங்களன்று தெரிவித்துள்ளது.

உள்நாட்டில் பரவும் பாதிப்புகள் அனைத்தும் லியோனிங் மாகாணத்தில் பதிவாகியுள்ளன என்று சின்ஹுவா செய்தி நிறுவனம் கூறியுள்ளது.நோய் தொடர்பான புதிய இறப்புகள் எதுவும் பதிவாகவில்லை.

விடுமுறை காலம் என்பதால் கொரோனா தொற்று பரவலைத் தடுக்க சீனா இந்த உத்தரவை பிறப்பித்துள்ளது. கொரோனா தொற்று விவகாரத்தில் தீவிரம் காட்ட வேண்டும் என்பதால் பீஜிங்கில் உள்ள அரசு அதிகாரிகளுக்கு அடுத்த இரண்டு மாதங்களுக்கு விடுமுறை அளிக்கப்படாது என்றும் சீன ஊடகங்கள் தெரிவித்துள்ளன.


ஜெனீவா: உலகம் முழுவதும் தற்போது 2-வது கட்ட கொரோனா அலை அமெரிக்காவிலும், ஐரோப்பிய நாடுகளிலும் தனது கோர முகத்தைக் காட்டி வருகிறது.

இந்தச் சூழலில் இங்கிலாந்தில் கண்டறியப்பட்ட புதிய வகை கொரோனா வைரஸ் 8 ஐரோப்பிய நாடுகளில் பரவியுள்ளதாக உலக சுகாதார அமைப்பு தெரிவித்துள்ளது.

இங்கிலாந்தில் கண்டறியப்பட்டுள்ள புதிய வகை கொரோனா வைரசான வி.யு.ஐ. 202012/01, 70 சதவீதம் அதிவேகமாகப் பரவுகிற தன்மையைக் கொண்டுள்ளதால் ‘சூப்பர் ஸ்பிரெடர்’ என அழைக்கப்படுகிறது. இது கொத்து, கொத்தாக மக்களுக்குப் பரவுகிற தன்மையைக் கொண்டிருக்கிறது.

இந்நிலையில் உலகம் முழுவதும் தற்போதைய நிலவரப்படி, 8,07,10,850 பேருக்கு கொரோனா வைரஸ் தொற்று உறுதி செய்யப்பட்டுள்ளது. கொரோனா பாதிப்பில் இருந்து இதுவரை 5,68,99,243 பேர் குணமடைந்துள்ளனர். மேலும் வைரஸ் தாக்குதலுக்கு இதுவரை 17 லட்சத்து 64 ஆயிரத்து 374 பேர் உயிரிழந்துள்ளனர்.

கொரோனா தொற்றுக்கு தற்போது 2,20,47,233 பேர் சிகிச்சை பெற்று வருகின்றனர். சிகிச்சை பெறுபவர்களில் 1,05,611 பேரின் நிலைமை கவலைக்கிடமாக உள்ளது.

வாஷிங்டன்: கிறிஸ்துமஸ் அதிகாலையில் அமெரிக்காவின் நாஷ்வில்லே பகுதியில் குண்டு வெடித்ததில் 3 பேர் படுகாயமடைந்தனர். இச்சம்பவம் திட்டமிட்டு நடந்திருப்பதாகவும், முன்கூட்டியே எச்சரிக்கப்பட்டதால் பெரும் சேதம் தவிர்க்கப்பட்டுள்ளதாகவும் காவல்துறை அதிகாரிகள் தெரிவித்துள்ளனர்.

அமெரிக்காவின் டெண்ணஸி மாகாணத்தில் உள்ள நாஷ்வில்லே பகுதியில், உள்ளூர் நேரப்படி கிறிஸ்துமஸ் தினத்தின் காலையில் குடியிருப்புப் பகுதியில் நிறுத்தி வைக்கப்பட்டிருந்த கார் ஒன்றில் குண்டு வெடித்துள்ளது.

குண்டு வெடிப்பு குறித்த வீடியோ வெளியாகி அதிர்ச்சியை ஏற்படுத்தியிருக்கிறது. அதில், ``சாலையின் ஓரமாக நிறுத்தப்பட்டிருந்த கார் ஒன்றிலிருந்து பதிவுசெய்யப்பட்ட ஆடியோ பதிவு ஒன்று ஒலித்துக் கொண்டிருந்தது.

அந்த ஆடியோவில் `இன்னும் 15 நிமிடத்தில் வெடிகுண்டு வெடிக்கும். இதை நீங்கள் கேட்டுக்கொண்டிருந்தால், இப்போதே வெளியேறுங்கள்" என்று குண்டுவெடிப்பதற்கு முன்பு எச்சரிக்கை விடுக்கப்பட்டுள்ளது. அதன்பிறகுதான் வாகனத்திலிருந்த வெடிகுண்டு வெடித்திருப்பதாக போலீஸார் தரப்பில் கூறப்படுகிறது.

இச்சம்பவம் குறித்து பேசிய நாஷ்வில்லே நகரக் காவல்துறைத் தலைவர் ஜான் டிரேக், ``15 நிமிடங்களில் வெடிகுண்டு வெடிக்கும் என்ற ஆடியோ பதிவு ஒலித்து கொண்டிருந்த வாகனத்தைப் பற்றி எங்களுக்குத் தகவல் கிடைத்தது. உடனடியாக, அந்த பகுதியிலிருந்த மக்களுக்கும் எச்சரிக்கை விடுத்து, அவர்களை அங்கிருந்து வெளியேற்றினோம். மேலும், அந்த வாகனத்தை நோக்கி போலீஸார் துப்பாக்கிச் சூடு நடத்தியதோடு, வெடிகுண்டு நிபுணர்களையும் சம்பவ இடத்துக்கு வரவழைத்தோம்" என்றார்.

நாஷ்வில்லே நகரின் மத்தியில் நடந்த குண்டுவெடிப்பு சம்பவத்தால், அப்பகுதி முழுவதையும் கரும்புகை சூழ்ந்தது. கட்டடங்கள் பலத்த சேதமடைந்தன. தொலைபேசி சேவை வழங்கும் நிறுவனத்தின் கட்டடம் ஒன்றும் இந்த குண்டுவெடிப்பில் சேதமடைந்தது. அதனால், அந்தப் பகுதியில் தொலைதொடர்பு சேவையில் பிரச்னை இருப்பதாக அதிகாரிகள் தரப்பில் தெரிவிக்கப்பட்டுள்ளது. இதனால், அமெரிக்க பெடரல் ஏவியேஷன் (Federal Aviation) நிர்வாகம் நாஷ்வில்லே சர்வதேச விமான நிலையத்திலிருந்து அனைத்து விமான சேவைகளையும் தற்காலிகமாக நிறுத்தி வைத்துள்ளது. அமெரிக்கா நேரப்படி இன்று மாலை விமான சேவை மீண்டும் தொடங்கும் என்று எதிர்பார்க்கப்படுகிறது.

நாஷ்வில்லே குண்டுவெடிப்பு
``என்ன நோக்கத்துக்காக இந்தத் தாக்குதல் நடத்தப்பட்டது என்பது பற்றி தெரியவில்லை. விசாரணை நடைபெற்று வருகிறது, காயமடைந்த மூன்று பேரும் சிகிச்சைக்காக மருத்துவமனைகளுக்குக் கொண்டு செல்லப்பட்டனர். ஆனால் யாரும் ஆபத்தான நிலையில் இல்லை" என்று காவல்துறை செய்தித் தொடர்பாளர் டான் ஆரோன் தெரிவித்துள்ளார். இச்சம்பவம் குறித்து எஃப்.பி.ஐ (FBI) உள்ளிட்ட பல்வேறு விசாரணை ஏஜென்சிகள் விசாரணையைத் தொடங்கியிருக்கின்றன!

ஜெனீவா: உலகம் முழுவதும் தற்போது 2-வது கட்ட கொரோனா அலை அமெரிக்காவிலும், ஐரோப்பிய நாடுகளிலும் தனது கோர முகத்தைக் காட்டி வருகிறது.

இதனிடையே இங்கிலாந்தில் ஏற்பட்டுள்ள புதிய வகை கொரோனா வைரஸ் பரவல் ஒட்டுமொத்த உலகத்தையும் அதிர்ச்சியில் ஆழ்த்தியுள்ளது.

இந்த அதிர்ச்சியில் இருந்து மீள்வதற்குள் தென்னாப்பிரிக்காவில் இருந்து இங்கிலாந்து வந்த இரண்டு பயணிகளுக்கு மற்றொரு புதிய வகை கொரோனா வைரஸ் இருப்பது கண்டறியப்பட்டுள்ளது.

இங்கிலாந்தில் சமீபத்தில் கண்டறியப்பட்டது போலவே வீரியமாகப் பரவும் திறன் கொண்டதாக இது அறியப்படுகிறது. இங்கிலாந்தில் இருந்து புறப்பட்டுள்ள புதிய வகை கொரோனா வைரஸ் அசுர வேகத்தில் பரவுவதால், மீண்டும் மக்கள் நிம்மதியை இழந்துள்ளனர்.

இது ஏற்கனவே இருக்கும் வைரஸை விட 70 சதவீதம் வேகமாகப் பரவுகிறது என முதற்கட்ட ஆராய்ச்சியில் தெரியவந்துள்ளது. 

இந்நிலையில், இங்கிலாந்தில் கண்டறியப்பட்ட புதிய வகை கொரோனா வைரஸ் 8 ஐரோப்பிய நாடுகளில் பரவியுள்ளதாக உலக சுகாதார அமைப்பு தெரிவித்துள்ளது.

உலகம் முழுவதும் தற்போதைய நிலவரப்படி, 8,01,94,033 பேருக்கு கொரோனா வைரஸ் தொற்று உறுதி செய்யப்பட்டுள்ளது. கொரோனா பாதிப்பில் இருந்து இதுவரை 5,64,60,230 பேர் குணமடைந்துள்ளனர். மேலும் வைரஸ் தாக்குதலுக்கு இதுவரை 17 லட்சத்து 56 ஆயிரத்து 947 பேர் உயிரிழந்துள்ளனர்.

கொரோனா தொற்றுக்கு தற்போது 2,19,76,856 பேர் சிகிச்சை பெற்று வருகின்றனர். சிகிச்சை பெறுபவர்களில் 1,05,799 பேரின் நிலைமை கவலைக்கிடமாக உள்ளது!

உலகம் முழுவதும்

கொரோனா பாதிப்பு உச்சத்தில் இருந்து வருகிறது. இதுவரை 7 கோடிக்கும் அதிகமானவர்களை இந்த நோய்த் தாக்கியுள்ளது. 17 லட்சத்துக்கும் மேற்பட்டவர்கள் இந்த நோயினால் உயிரிழந்துள்ளனர்.

உலகளவில் 7.78 கோடி பேருக்கு கொரோனா தொற்று உறுதி செய்யப்பட்டுள்ளது. இதில் 5.46 கோடி பேர் குணமடைந்து வீடு திரும்பியுள்ளனர். உயிரிழந்தவர்களின் எண்ணிக்கை 17.11 லட்சமாக இருக்கிறது. இந்தியாவில் இதன் பாதிப்பு மிக அதிகமாக இருந்துவந்த நிலையில், தற்போது பாதிப்பு எண்ணிக்கை சீராகக் குறையத் தொடங்கியுள்ளது.

இந்தியாவில் கொரோனா பாதித்தவர்களின் எண்ணிக்கை 1 கோடியைக் கடந்துள்ளது. முதலிடத்தில் அமெரிக்கா இருந்துவருகிறது. இதுவரை 1.85 கோடி பேர் அங்கு கரோனாவால் பாதிக்கப்பட்டுள்ளனர். 3.27 லட்சம் பேர் மரணமடைந்துள்ளனர். இந்நிலையில், கடந்த வாரத்தில் மட்டும் ஒவ்வொரு 33 வினாடிக்கும் ஒருவர் கொரோனாவால் மரணமடைந்துள்ளது தற்போது தெரியவந்துள்ளது. இது அமெரிக்க மக்களை அதிர்ச்சி அடையவைத்துள்ளது!

சிங்கப்பூர், டிசம்பர் 24: சிங்கப்பூரில் கொரோனா நோய்த்தொற்றுக்கு எதிராக அந்நாட்டு அரசு மேற்கொண்ட தீவிர பாதுகாப்பு நடவடிக்கைகள் காரணமாக, அங்கு தினசரி பாதிப்பு எண்ணிக்கை முற்றிலுமாக கட்டுப்படுத்தப்பட்டிருந்தது.

மேலும் விமானம் மூலமாக ஐரோப்பிய நாடுகளில் இருந்து சிங்கப்பூருக்கு வரும் பயணிகளுக்கும் தீவிர பரிசோதனைகள் மேற்கொள்ளப்பட்டு வருகிறது.

இதற்கிடையில் கடந்த நவம்பர் 17 முதல் டிசம்பர் 17 வரை இங்கிலாந்து மற்றும் ஐரோப்பிய நாடுகளில் இருந்து சிங்கப்பூருக்கு வந்த 31 பேருக்கு கொரோனா தொற்று உறுதி செய்யப்பட்டிருந்தது.

இங்கிலாந்தில் அண்மையில் புதிய வகை கொரோனா தொற்று கண்டறியப்பட்டுள்ளதால், அந்த 31 பேரின் மாதிரிகளும் பரிசோதனை செய்யப்பட்டது.

இதனையடுத்து இவர்களில் ஒருவருக்கு இங்கிலாந்தில் உருவான புதிய வகை கொரோனா வைரஸ் தொற்று ஏற்பட்டுள்ளது கண்டறியப்பட்டுள்ளது.

மேலும் 11 பேருக்கு இதே தொற்று ஏற்பட்டிருக்கலாம் என்றும் சந்தேகிக்கப்படுகிறது. புதிய வகை கொரோனாவால் பாதிக்கப்பட்டுள்ள நபர் கடந்த 6-ஆம் தேதி சிங்கப்பூருக்கு வந்துள்ளார்.

இங்கிலாந்தில் இருந்து வந்தவர்கள் அனைவரும் தனிமைப்படுத்தப்பட்டு கண்காணிக்கப்பட்டு வருவதால், புதிய வகை கொரோனா வைரஸ் சிங்கப்பூர் மக்களிடையே பரவி இருக்க வாய்ப்பில்லை என்று அந்நாட்டு சுகாதார அமைச்சகம் தெரிவித்துள்ளது.

அதே நேரம் தொற்று உறுதி செய்யப்பட்ட நபர்களின் உறவினர்களிடம் மேற்கொள்ளப்பட்ட பரிசோதனையில், அவர்கள் யாருக்கும் கொரோனா பாதிப்பு இல்லை என்பது உறுதியாகியுள்ளதாகவும் அந்நாட்டு அரசு தெரிவித்துள்ளது!

பெர்லின்: அமெரிக்காவின் பைசர் நிறுவனம் ஜெர்மனியின் பயோன்டெக் நிறுவனத்துடன் இணைந்து தயாரித்துள்ள கொரோனா தடுப்பூசி அமெரிக்கா உள்ளிட்ட சில நாடுகளில் மக்களுக்குச் செலுத்தப்பட்டு வருகிறது.

இந்தத் தடுப்பூசிக்கு உலகிலேயே முதன் முதலில் இங்கிலாந்து தான் ஒப்புதல் வழங்கியது. அங்கு கடந்த 8-ஆம் தேதி முதல் மக்களுக்கு இந்தத் தடுப்பூசி செலுத்தப்பட்டு வருகிறது. இந்த நிலையில் இங்கிலாந்தில் புதிய வகை கொரோனா வைரஸ் பரவி வருவது ஒட்டுமொத்த உலகையும் அச்சத்தில் ஆழ்த்தியுள்ளது.

புதிய வகை கொரோனா வைரஸுக்கு எதிராக தங்களது தடுப்பூசி வேலை செய்யும் என்று பயோன்டெக் நிறுவனத்தின் தலைமைச் செயலதிகாரி உகுர் சாஹின் நம்பிக்கை தெரிவித்துள்ளார்.

இதுகுறித்து அவர் கூறுகையில், “விஞ்ஞான ரீதியாகப் பார்த்தால் எங்கள் தடுப்பூசியின் நோய் எதிர்ப்பு ஆற்றல் புதிய வகை கொரோனா வைரசுக்கு எதிராகச் செயல்பட வாய்ப்பு உள்ளது.

ஆனால் சோதனை செய்யப்பட்டால் மட்டுமே நாங்கள் அதை உறுதியாக அறிவோம். சோதனையின் தரவுகளைப் பெறுவதற்கு இப்போதிலிருந்து சுமார் 2 வாரங்கள் தேவைப்படும்” எனக் கூறினார்!

 

இங்கிலாந்தில் கண்டறியப்பட்டுள்ள புதிய உருமாற்றம் பெற்ற கொரோனா வைரஸ் ஏற்கனவே பல்வேறு நாடுகளிலும் பரவி இருக்கலாம் என்று உலக சுகாதார அமைப்பின் மூத்த விஞ்ஞானி டாக்டர் சவுமியா சுவாமிநாதன் எச்சரித்துள்ளார்.

புதிதாக கண்டறியப்பட்டுள்ள வைரஸ் 70 சதவீத வேகத்துடன் பரவி வருவதாக ஆரம்பக்கால ஆய்வுகள் தெரிவிக்கும் நிலையில் இங்கிலாந்து அரசு இது தொடர்பாக தக்க நேரத்தில் கவனமாக நடவடிக்கை எடுத்திருப்பதாகவும் அவர் தெரிவித்தார்.

பல்வேறு நாடுகள் தங்கள் தரவுகளைச் சோதித்தால் இந்த புதிய வைரஸ் தொற்று ஏற்கனவே அங்கு பரவியிருப்பதையும் கண்டறிய முடியும் என்றும் அவர் குறிபபிட்டார்.

ஏற்கனவே ஆஸ்திரேலியா, டென்மார்க், நெதர்லாந்து, உள்ளிட்ட பகுதிகளிலும் தென்ஆப்பிரிக்காவில் முழுவீச்சிலும் கொரோனா வைரஸ் பரவல் குறித்த தகவல்கள் வெளியாகியுள்ளன!

 

வாஷிங்டன்: அமெரிக்காவில் கொரோனா பெருந்தொற்று இன்னும் கட்டுக்குள் வராமல் தொடர்கிறது. அங்கு ஒரே நாளில் 4 லட்சத்து 3 ஆயிரத்து 359 பேருக்கு கொரோனா தொற்று பாதிப்பு உறுதி செய்யப்பட்டுள்ளது. இது புதிய உச்சம் ஆகும்.

இதற்கு முன்பாக கடந்த 11-ந் தேதியன்று ஒரே நாளில் 2 லட்சத்து 44 ஆயிரத்து 11 பேருக்கு வைரஸ் தொற்று உறுதியானதே உச்சமாக இருந்தது.

அங்கு கொரோனாவுக்கு ஒரே நாளில் 2,756 பேர் பலியாகி உள்ளனர். அமெரிக்காவில் கொரோனாவின் மொத்த பாதிப்பு எண்ணிக்கை 1 கோடியே 80 லட்சத்தை தாண்டி உள்ளது. உயிரிழப்பு 3 லட்சத்து 23 ஆயிரத்து 400-ஐ கடந்துள்ளது.

இந்தப் புள்ளிவிவரங்களை அமெரிக்க நோய் கட்டுப்பாடு மற்றும் தடுப்புமையம் (சிடிசி) வெளியிட்டுள்ளது.

கொரோனா தடுப்பூசி செலுத்தும் பணி அமெரிக்காவில் நடைபெற்று வந்தாலும், அந்த நோய்த்தொற்று கட்டுப்பாடின்றி பரவி வருவது மக்கள் மத்தியில் மிகுந்த சோகத்தை ஏற்படுத்தி உள்ளது!

காபூல்: ஆப்கானிஸ்தானில்  கஜினி மாகாணத்தின் கிலான் மாவட்டத்தில் உள்ள ஒரு கிராமத்தில் நேற்று முன்தினம் உள்ளூர் நேரப்படி மதியம் 2 மணிக்கு ரிக்‌ஷா குண்டு பலத்த சத்தத்துடன் வெடித்தது.

இதில் அந்தப் பகுதியே அதிர்ந்தது. அந்தப்பகுதியில் இருந்தவர்கள் தூக்கி வீசப்பட்டனர். அவர்களது உடல் பாகங்கள் சிதறின. அந்தப்பகுதியே புகை மண்டலமாக மாறியது. இதுகுறித்து தகவல் அறிந்ததும் பாதுகாப்பு படையினர் விரைந்து வந்து அந்தப் பகுதியை சுற்றிவளைத்தனர்.

இந்த குண்டுவெடிப்பில் 15 குழந்தைகள் உடல்சிதறி பரிதாபமாக பலியானதாக முதல் கட்ட தகவல்கள் தெரிவிக்கின்றன. மேலும் 20 பேர் படுகாயம் அடைந்தனர். அவர்கள் உடனடியாக அங்கிருந்து மீட்கப்பட்டு ஆம்புலன்சுகளில் ஆஸ்பத்திரிகளுக்கு அனுப்பி வைக்கப்பட்டனர். இதில் உயிர்ப்பலி மேலும் உயரும் என அஞ்சப்படுகிறது.

இந்த குண்டுவெடிப்புக்கு எந்தவொரு பயங்கரவாத இயக்கமும் பொறுப்பேற்கவில்லை. இந்த குண்டுவெடிப்பு குறித்து கஜினி மாகாண கவர்னரின் செய்தி தொடர்பாளர் வாகிதுல்லா ஜூமசாதா கூறுகையில், “கிலான் மாவட்டத்தில் வெள்ளிக்கிழமை மதியம் இந்த குண்டுவெடிப்பு நடந்துள்ளது. மோட்டார் பொருத்தப்பட்ட ரிக்‌ஷாவில் பொருட்களை விற்பனைக்காக ஒருவர் ஒரு கிராமத்திற்குள் எடுத்துச்சென்றபோது, அந்த ரிக்‌ஷாவில் குண்டு வெடித்திருக்கிறது” என குறிப்பிட்டார்.

உள்துறை அமைச்சக செய்தி தொடர்பாளர் தாரிக் ஆர்யன் கூறும்போது, “குரான் பாராயண நிகழ்ச்சிக்காக ஏராளமானோர் கூடி இருந்த நிலையில் குண்டு வெடித்துள்ளது. இதில் 15 பேர் கொல்லப்பட்டனர். 20 பேர் படுகாயம் அடைந்தனர்” என தெரிவித்தார்.

இந்தக் குண்டுவெடிப்பை தலீபான் பயங்கரவாதிகள்தான் நடத்தி இருப்பார்கள் என்று போலீஸ் செய்தி தொடர்பாளர் அகமது கான் குற்றம் சாட்டினார். இந்த குண்டுவெடிப்பில் 15 குழந்தைகள் உடல் சிதறி உயிரிழந்திருப்பது அந்த நாட்டை உலுக்கி உள்ளது;

வாஷிங்டன்: அமெரிக்க அரசின் முக்கிய துறைகளின் கம்ப்யூட்டர்களில் ஹேக்கர்கள் ஊடுருவி உளவு பார்த்த சம்பவம் பெரும் பரபரப்பை ஏற்படுத்தியுள்ளது.

அமெரிக்க அரசின் முக்கியத் துறைகளைக் குறிவைத்து பல மாதங்களாக இந்த சைபர் தாக்குதல் தொடர்ந்து நடந்து கொண்டிருந்ததை, அமெரிக்க அதிகாரிகள் தற்போது கண்டுபிடித்துள்ளனர்.

இந்த தாக்குதலால் அமெரிக்காவின்  முக்கிய அமைப்புகள் மற்றும் தனியார் நிறுவனங்கள் ஆபத்தில் இருப்பதாக அதிகாரிகள் எச்சரித்து இருக்கிறார்கள்.

இந்த சைபர் தாக்குதலை தடுப்பது மிகவும் சிக்கலானது என அமெரிக்காவின் சைபர் பாதுகாப்பு மற்றும் கட்டமைப்பு பாதுகாப்பு முகமை (சி.ஐ.எஸ்.ஏ) கூறியுள்ளது. ரஷியா இந்த தாக்குதலை நடத்தியிருக்கலாம் என கூறப்படுகிறது. ஆனால் ரஷியா இதை மறுத்திருக்கிறது!


அபுஜா: மேற்கு ஆப்பிரிக்க நாடான நைஜீரியாவில் போகோ ஹராம் பயங்கரவாதிகள், கிராமங்களுக்குள் புகுந்து அப்பாவி பொதுமக்களை கொன்று குவிப்பதோடு, சிறுவர் சிறுமிகளைக் கடத்திச் சென்று அவர்களை தற்கொலைப்படை பயங்கரவாதிகளாக மாற்றுவதை வாடிக்கையாகக் கொண்டுள்ளனர்.

நைஜீரியாவின் வடக்குப் பகுதியில் உள்ள கட்சினா மாகாணத்தில் அரசு ஆண்கள் பள்ளிக்கூடத்தில் கடந்த 11-ஆம் தேதி கையில் துப்பாக்கிகளுடன் மோட்டார் சைக்கிள்களில் வந்து இறங்கிய பயங்கரவாதிகள் அந்தப் பள்ளிக்கூடத்தில் புகுந்து சூறையாடினர்.

இதனால் அதிர்ச்சியில் மாணவர்கள் உயிரை காப்பாற்றிக்கொள்ள பள்ளிக்கூடத்தில் இருந்து தப்பி வெளியே ஓடினர். பின்னர் அவர்கள் பயங்கரவாதிகளிடம் இருந்து தற்காத்து கொள்வதற்காக அருகில் உள்ள புதர்களில் மறைந்து கொண்டனர்.

இரவு முழுவதும் அங்கேயே பதுங்கி இருந்த மாணவர்கள் சூரிய உதயத்துக்கு பின் மறுநாள் காலை வீடுகளுக்குத் திரும்பினர்.

406 மாணவர்கள் வீட்டுக்குத் திரும்பி விட்ட நிலையில், ஏறக்குறைய 400 மாணவர்கள் வீடு திரும்பவில்லை.

இதனால், மாயமான அந்த மாணவர்களின் கதி என்ன என்பது தெரியவில்லை. அவர்களைப் பயங்கரவாதிகள் துப்பாக்கி முனையில் கடத்தி சென்றிருக்கலாம் என்று கூறப்பட்டது.

இதற்கிடையில் போலீசார் மற்றும் ராணுவ வீரர்கள் இணைந்து பள்ளிக்கூடத்துக்கு அருகில் உள்ள வனப்பகுதிக்குள் சென்று மாயமான மாணவர்களை தேடும் பணியில் ஈடுபட்டனர்.  எனினும், அதில் பலன் ஏற்படவில்லை.

இந்தச் சம்பவத்திற்கு நைஜீரிய அதிபர் முகமது புகாரி கடும் கண்டனம் தெரிவித்ததுடன், தாக்குதலில் ஈடுபட்டவர்களைக் கண்டறிந்து விசாரணை மேற்கொள்ளும்படி பாதுகாப்பு வீரர்களுக்கு உத்தரவிட்டார்.

இந்த நிலையில், கடந்த செவ்வாய் கிழமை ஜிகாதி போராளி அமைப்பு இந்த தாக்குதலுக்கும், மாணவர்கள் கடத்தலுக்கும் பொறுப்பேற்றுஜ் கொண்டது. 

இதுபற்றி அந்த அமைப்பின் தலைவர் அபுபக்கர் ஷேகாவ் கூறும்பொழுது, மேற்கத்திய கல்விக்கு எதிராகவும் மற்றும் இஸ்லாம் பெயரிலும் இந்த கடத்தல்கள் நடத்தப்பட்டன என கூறினார்.

இதனை தொடர்ந்து, அந்நாட்டு பாதுகாப்பு படையினர், கடத்தப்பட்ட மாணவர்களை மீட்கும் பணிக்கு அனுப்பி வைக்கப்பட்டனர்.

பின்னர் கடத்தப்பட்ட மாணவர்கள் 344 பேரும் கடத்தல்காரர்களிடம் இருந்து மீட்கப்பட்டு விட்டனர்!

வாஷிங்டன்: கொரோனா பெருந்தொற்று உலகின் பல நாடுகளையும் இன்னும் விடாமல் துரத்தி வருகிறது. இந்நோய்க்கு நிரந்தர முடிவு கட்டுவது தடுப்பூசிதான் என்ற நம்பிக்கை மக்கள் மத்தியில் நிலவுகிறது. எனவே கொரோனா தடுப்பூசியை மக்கள் மிகுந்த ஆவலுடன் எதிர்பார்த்துக் காத்திருக்கிறார்கள்.

இங்கிலாந்திலும், அமெரிக்காவிலும் கொரோனா வைரஸ் தடுப்பூசி போடும் பணி தொடங்கியுள்ளது.

இந்நிலையில்,  உலகளவில் 7.37 கோடி பேருக்கு கொரோனா தொற்று ஏற்பட்டுள்ளது. அதில் 5.17 கோடி பேர் குணமடைந்துள்ளனர். உலகளவில் 16.40 லட்சம் பேர் கொரோனா தொற்றால் உயிரிழந்துள்ளனர்.  5 கோடியே 17 லட்சத்து 43 ஆயிரத்து 888 பேர் கொரோனாவில் இருந்து மீண்டுள்ளனர் என தகவல் வெளியாகியுள்ளது.

அமெரிக்காவில் புதிதாக 1.90 லட்சம் பேருக்கு  கொரோனா தொற்று ஏற்பட்டுள்ளது. ஒரே நாளில் 2,716 பேர் உயிரிழந்துள்ளனர்.

அமெரிக்காவில் மொத்தம் 1.71 கோடி பேருக்கு கொரோனா பாதிப்பு ஏற்பட்டுள்ளது. 3.10 லட்சம் பேர் கொரோனாவால் உயிரிழந்துள்ளனர்!


சிட்னி: கொரோனா வைரஸ் உலகம் முழுவதும் பரவுவதற்கு சீனாதான் காரணம், அந்த நாடுதான் நோயைப்.  பரப்பி வருகிறது என்று குற்றம் சாட்டப்பட்டு வருகிறது. அதுமட்டுமின்றி உலகை ஆள்வதற்கு பல்வேறு திட்டங்களை வகுத்து வருவதாகவும், இதன் காரணமாக உலகின் பல்வேறு நாடுகளில் தன்னுடைய இராணுவ பலத்தை கூட்டி வருவதாகவும் கூறப்படுகிறது.

இந்தநிலையில் மேலும் ஒரு அதிர்ச்சி தகவல் ஒன்று வெளியாகியுள்ளது. உலகத்தின் மிகப் பெரும் தயாரிப்பு நிறுவனங்கள், வங்கிகள், ஊடக நிறுவனங்கள், பல்கலைக்கழகங்கள் மற்றும் அரசு நிறுவனங்களில் சுமார் இருபது லட்சம் சீன கம்யூனிஸ்ட் கட்சி உறுப்பினர்கள் ரகசியமாகப் பணிபுரிந்து வருகிறார்கள் என்று பிரபல ஆங்கில ஊடகம் ஒன்று குறிப்பிட்டுள்ளது.

'தி ஆஸ்திரேலியன்' செய்தித்தாள்  இதுகுறித்து கசிந்த தகவல்களை பெற்று செய்தி வெளியிட்டுள்ளது. சுமார் 20 லட்சம் கம்யூனிஸ்ட் கட்சி  உறுப்பினர்களின் பெயர்களைத் தவிர, அவர்களின் கட்சிபதவி  பிறந்த தேதி, தேசிய அடையாள எண் மற்றும் இனம் ஆகியவை, அந்த கசிந்த தகவல்களில் அடங்கி உள்ளன.

ஆனால் பெயர்கள் எதுவும் தற்போது வெளியிடப்படவில்லை.அந்த நிறுவனங்களின் பட்டியலில் தயாரிப்புத் துறையில் போயிங் மற்றும் வோக்ஸ்வேகன். மருந்துத் தயாரிப்பில் பிபைசர் மற்றும் அஸ்ட்ராசனேகா, வங்கிகளில் ஏ.என்.இசட் மற்றும் எச்.எஸ்.பி.சி ஆகியவையும் அடங்கும்.

குறிப்பாக எச்.எஸ்.பி.சி மற்றும் ஸ்டாண்ட்டர்ட் சார்டட் ஆகிய இரு வங்கிகளில் மட்டும் 700-க்கும் மேற்பட்டசீன கம்யூனிஸ்ட் கட்சி உறுப்பினர்கள் இருப்பது தெரிய வந்துள்ளது. கூடுதலாக இத்தகைய மேற்கத்திய நிறுவனங்களில் 79,000 சீன கம்யூனிஸ்ட் கட்சிக் கிளைகள் செயல்பட்டு வருவதும், இதன் உறுப்பினர்கள் அனைவரும் சீன அதிபரான ஜி சின்பிங்கிற்கு நேரடியாக பதில் சொல்லக் கடமைப்பட்டவர்கள் என்பதும் கூறப்பட்டுள்ளது.

ஆஸ்திரேலிய பத்திரிகையாளரும் ஸ்கை நியூஸ் தொகுப்பாளருமான ஷாரி மார்க்சன் கூறும் போது,  இந்த தரவுத்தளத்தில் ஆச்சரியமான விஷயம் என்னவென்றால், அது கம்யூனிஸ்ட் கட்சியின் உறுப்பினர்களாக இருப்பவர்களை அம்பலப்படுத்துவது மட்டுமல்ல, அவர்கள் ஆஸ்திரேலியா முதல் அமெரிக்கா வரை இங்கிலாந்து வரை உலகம் முழுவதும் இப்போது வாழ்ந்து வருகிறார்கள், ஆனால் அது ஆச்சரியமாக இருக்கிறது, ஏனெனில் இது சீனா ஜனாதிபதி மற்றும் தலைவர் ஜி ஜின்பிங்கின் கீழ் கட்சி எவ்வாறு செயல்படுகிறது என்பதற்கான ஆச்சரியத்தை கொடுக்கிறது.

"இது அவர்களின் உலகளாவிய அறிவுசார் சொத்துக்களை திருட்டில் இருந்து, பொருளாதார உளவுத்துறையிலிருந்து பாதுகாக்க  உதவுகிறது. சில உலகளாவிய நிறுவனங்களையும்  இது சங்கடப்படுத்தப் போகிறது என்று மார்க்சன் கூறினார்.

2016 ஆம் ஆண்டில் ஷாங்காயில் உள்ள ஒரு சேவையகத்திலிருந்து சீன அதிருப்தியாளர்களால் இந்த ஆவணம்  கசிந்ததாகக்  கூறப்படுகிறது, அவர்கள் இதைப்  புலனாய்வு நோக்கங்களுக்காகப் பயன்படுத்தினர்.

ஆஸ்திரேலியா, இங்கிலாந்தின் மெயில் ஆன் சன்டே, பெல்ஜியத்தின் டி ஸ்டாண்டார்ட் மற்றும் ஒரு ஸ்வீடிஷ் எடிட்டர் ஆகிய நான்கு ஊடக அமைப்புகளுக்கு இந்த ஆவணம் அனுப்பப்படுவதற்கு முன்னர், இது சீனா சர்வதேச இரு கட்சி குழுவான சீனா நாடாளுமன்ற கூட்டணிக்கு கசிந்துள்ளது!

 


ஹூஸ்டன்: கொரோனா பெருந்தொற்றினை 15 நிமிடங்களில் கண்டறியும் உமிழ் நீர் அடிப்படையிலான ஸ்மார்ட் போன் பரிசோதனையை, அமெரிக்காவில் உள்ள துலேன் பல்கலைக்கழக மருத்துவக் கல்லூரி விஞ்ஞானிகள் கண்டுபிடித்துள்ளனர்.

இது குறித்து சயின்ஸ் அட்வான்சஸ் பத்திரிகையில் அவர்கள் கருத்து பதிவிட்டுள்ளனர்.

ஆர்.டி.பி.சி.ஆர். பரிசோதனை போன்றே இந்த பரிசோதனை திறம்படச் செயல்படுகிறது. இந்த ஸ்மார்ட் போன் இயங்குதளம் எதிர்கால பயன்பாடாக அமையும் என்று நம்புகிறோம். கொரோனா பரிசோதனையை விரைவாக விரிவுபடுத்துவதற்கான திறனை இது வழங்குகிறது. வழக்கமாக கொரோனா பரிசோதனைக்கு தொண்டை அல்லது மூக்கு சளி மாதிரி சேகரிக்கப்படுகிறது. இதில் உமிழ்நீர்தான் சேகரிக்கப்படுகிறது. ஆரம்ப நோய்த்தொற்றின்போது, உமிழ்நீரில் கொரோனா வைரஸ் இருக்கும்.

இந்தப்ன்பரிசோதனைக்காக ஒரு சிப்பை உருவாக்கி உள்ளோம். இது சிஆர்ஐஎஸ்பிஆர்/கேஸ் 12 ஏ மூலக்கூறுகளை பயன்படுத்துகிறது. இந்த சிப், ஸ்மார்ட் போன் அடிப்படையிலான புளோரசன்ஸ் மைக்ரோஸ்கோப்பில் இணைக்கப்படுகிறது. அதன்மூலம் உமிழ்நீர் மாதிரியில் உள்ள வைரஸ் மரபணு பொருளை சிறப்பாக கண்டறியலாம், 15 நிமிடங்களில் கொரோனா தொற்றைக் கண்டறிந்து விடலாம்.

இவ்வாறு அவர்கள் கூறியுள்ளனர்.

வாஷிங்டன், டிசம்பர் 12-  அமெரிக்காவில் அடுத்த 24 மணி நேரத்திற்குள் கொரோனாவுக்கான முதல் தடுப்பூசி செலுத்தப்படும் என்று அதிபர் டிரம்ப் தெரிவித்துள்ளார்.

பைசர் நிறுவனத்தின் கொரோனா தடுப்பூசியை மக்களுக்கு பயன்படுத்த அமெரிக்க உணவு மற்றும் மருந்து நிர்வாக அமைப்பு பரிந்துரை செய்துள்ளது.

இந்நிலையில், இதுதொடர்பாக டிரம்ப் தனது டுவிட்டரில் வெளியிட்ட காணொளியில், “அமெரிக்காவில் அனைவருக்கும் பைசர் தடுப்பூசி இலவசமாக வழங்கப்படும். பைசர் தடுப்பூசியை அவசரகால அடிப்படையில் பயன்படுத்த எப்.டி.ஏ அனுமதி அளித்ததற்கு வரவேற்பு தெரிவித்துக் கொள்கிறேன். அமெரிக்காவில் அடுத்த 24 மணி நேரத்திற்குள் கொரோனாவுக்கான முதல் தடுப்பூசி செலுத்தப்படும். மூத்த குடிமக்கள், சுகாதாரப் பணியாளர்கள் மற்றும் முன்களப்பணியாளர்களுக்கு முதற்கட்டமாக தடுப்பூசி செலுத்தப்படும்” என்று அதில் தெரிவித்தார்!

ஜெருசலேம்: வேற்றுக் கிரகவாசிகளின் கூட்டமைப்புடன் அமெரிக்கா ஒப்பந்தம் மேற்கொண்டுள்ளது என, இஸ்ரேல் ராணுவ விண்வெளிப்பிரிவின் முன்னாள் தலைவர் ஹைம் எஷெட் வெளியிட்டுள்ள தகவல் பெரும் பரபரப்பை ஏற்படுத்தியுள்ளது.

இஸ்ரேல் ராணுவ விண்வெளிப்பிரிவின் முன்னாள் தலைவர் ஹைம் எஷெட் இஸ்ரேலிய பத்திரிகை ஜெருசலேம் போஸ்ட்டுக்கு அளித்த பேட்டியில் அவர் இவ்வாறு பதில் அளித்துள்ளார்.

வேற்றுக்கிரகவாசிகள் இருப்பது உண்மைதான். அவர்களுக்கான ஒரு கூட்டமைப்பு இயங்கி வருகிறது. வேற்றுகிரகவாசிகளுடனான தகவல் தொடர்பு முன்னரே தொடங்கி விட்டது.

பூமியில் சோதனை நடத்துவதற்கான ஒரு ஒப்பந்தத்தை அமெரிக்காவுடன் வேற்றுக்கிரகவாசிகள் மேற்கொண்டுள்ளனர்.

இந்த ஒப்பந்தம் பூமியை வேற்றுக்கிரகவாசிகள் ஆக்கிரமிப்பதற்கான முயற்சி அல்ல. பிரபஞ்ச விதிகளைப் புரிந்து கொள்வதற்கான தேடலில் அவர்கள் மனித குலத்தையும் உதவியாகச் சேர்த்துக் கொள்ள விரும்புகின்றனர்.

வேற்றுக்கிரகவாசிகள் குறித்த தகவலை வெளியிட டிரம்ப் முயற்சித்தார். ஆனால் மக்கள் அதற்குத் தயாராகவில்லை என்று வேற்றுக்கிரகவாசிகள் தடுத்ததால், அந்த முயற்சி கைவிடப்பட்டது.

வேற்றுக்கிரகவாசிகளுடன் இணைந்து செவ்வாய் கிரகத்தில் அமெரிக்கா ஒரு நிலத்தடி தளத்தை அமைத்துள்ளது. ஆதாரங்கள் ஏதுமின்றி நான் சொல்லும் இந்த தகவல்களை இப்போது யாரும் நம்பாமல் இருக்கலாம். ஆனால் விரைவில் மக்கள் உண்மையை அறிவார்கள்.

மனிதகுலம் விண்வெளி மற்றும் விண்கலங்கள் என்ன என்பதை பொதுவாக நாம் புரிந்துகொள்ளும் ஒரு கட்டத்தை அடைவதற்கு அவர்கள் காத்திருக்கிறார்கள் எனக் கூறினார்.

கடந்த 1981 முதல் 2010 வரை இஸ்ரேலின் விண்வெளி பாதுகாப்புத் திட்டத்திற்கு ஹைம் எஷெட் தலைமை தாங்கி உள்ளார் என்பது குறிப்பிடத்தக்கது!

டிசம்பர் 15 முதல் மக்கள் இனி யாஹூ கணக்கிலிருந்து மின்னஞ்சல்களை அனுப்பவும் பெறவும் முடியாது என்று யாஹூ  நிறுவனம் தெரிவித்துள்ளது.

கடந்த சில ஆண்டுகளாகவே யாஹு தொடர்ந்து நிலையான சரிவை எதிர்கொண்டு வருகின்றது. மேலும் கடந்த சில நாட்களாகவே யாஹு இணையதளத்தை பயன்படுத்துவோரின் எண்ணிக்கையும் குறைந்து கொண்டு வருகிறது. இதன் காரணமாகவும் அதை மூட உள்ளதாகவும் அறிவிப்பு வெளியாகியுள்ளது.

இந்த நிறுவனம் 2001 ஆம் ஆண்டு தொடங்கப்பட்டது.  மற்ற போட்டியாளர்களான கூகுள் நிறுவனம் மற்றும் ஃபேஸ்புக் நிறுவனங்கள் உடன் போட்டி போட முடியாத காரணத்தினால் இந்த முடிவை யாஹூ எடுத்துள்ளது.

அதன்படி டிசம்பர் 15 முதல் மக்கள் யாஹு குரூப்பில் இருந்து மின்னஞ்சல்களை அனுப்பவும் பெறவும் முடியாது என்று அமெரிக்காவின் வயர்லெஸ் தொலைதொடர்பு சேவை நிறுவனமான வெரிஸோன் தெரிவித்துள்ளது.

மேலும் வலைத்தளங்களை அணுக முடியாது. நீங்கள் அனுப்பிய மற்றும் பெறப்பட்ட மின்னஞ்சல்கள் மற்றும் உங்களது ஈமெயிலில் இருக்கும். ஆனால் உங்கள் குரூப் நண்பர்களுக்கு அனுப்பப்படாது அல்லது பெறப்படாது என்று தெரிவிக்கப்பட்டுள்ளது!

ஜெனீவா: உலகம் முழுவதையும் அச்சுறுத்திவரும் கொரோனா தொற்றின் முதல் கட்ட அலை முடிந்த நிலையில், தற்போது 2-வது கட்ட கொரோனா அலை அமெரிக்காவிலும், ஐரோப்பிய நாடுகளிலும் பரவத் தொடங்கி உள்ளது.

உலகம் முழுவதும் தற்போதைய நிலவரப்படி, 6,85,26,041 பேருக்கு கொரோனா வைரஸ் தொற்று உறுதி செய்யப்பட்டுள்ளது. கொரோனா பாதிப்பில் இருந்து இதுவரை 4,74,36,549 பேர் குணமடைந்துள்ளனர். மேலும் வைரஸ் தாக்குதலுக்கு இதுவரை 15 லட்சத்து 61 ஆயிரத்து 901 பேர் உயிரிழந்துள்ளனர்.

வைரஸ் பாதிப்பு காரணமாக தற்போது 1,95,27,591 பேர் சிகிச்சை பெற்று வருகின்றனர். சிகிச்சை பெறுபவர்களில் 1,06,080 பேரின் நிலைமை கவலைக்கிடமாக உள்ளது!

லண்டன்: கொரோனா பெருந்தொற்றுக்கு எதிரான தடுப்பு மருந்தை தயாரிக்கும் ஆய்வுப்பணிகள் பல்வேறு உலக நாடுகளில் நடந்து வருகிறது. சோதனை முயற்சியில் சில நாடுகள் தடுப்பூசியை மனிதர்களின் உடலில் செலுத்தி ஆய்வு நடத்தி வருகின்றன.

இந்த நிலையில் இங்கிலாந்து அரசு முதன் முதலில் கொரோனா தடுப்பூசியின் பயன்பாட்டுக்கு அண்மையில் ஒப்புதல் அளித்தது. அமெரிக்காவின் பைசர் நிறுவனமும், ஜெர்மனியின் பயோஎன்டெக் நிறுவனமும் இணைந்து உருவாக்கியுள்ள கொரோனா தடுப்பூசி 95 சதவிகிதம் செயல் திறன் கொண்டது என அறிவிக்கப்பட்டுள்ளது.

இந்தத் தடுப்பூசி விரைவில் பொதுமக்கள் பயன்பாட்டுக்கு வரும் என இங்கிலாந்து அரசு அறிவித்திருந்தது. இரண்டு டோஸ்களாக வழங்கப்படவேண்டிய இந்த தடுப்பூசியின் நான்கு கோடி டோஸ்களை இங்கிலாந்து  ஏற்கனவே ஆர்டர் செய்துள்ளது.

இங்கிலாந்தில் வடக்கு அயர்லாந்தை சேர்ந்த
மார்கரெட் கீனன்  என்ற 90 வயது மதிக்கத்தக்க பெண், முதல்  கொரோனா தடுப்பூசியை பெற்றுள்ளார்.

இது குறித்து மார்கரெட் கீனன் கூறுகையில், கொரோனாவுக்கு எதிராக தடுப்பூசி போட்ட முதல் நபராக இருப்பதை  நான் மிகவும் பாக்கியமாகக் கருதுகிறேன். ஏனென்றால் புதிய ஆண்டில் எனது குடும்பத்தினருடனும் நண்பர்களுடனும் நேரத்தை செலவழிக்க நான் செல்ல முடியும். என்னைப் பெரிதும் கவனித்துக்கொண்ட தேசிய சுகாதார ஊழியர்களுக்கு நான் நன்றிசொல்லி முடித்துவிட முடியாது என்று தெரிவித்துள்ளார்!

லண்டன்: இந்திய அரசின்  வேளாண் சட்டங்களை வாபஸ் பெறக் கோரி, டெல்லியில் கடும் குளிர் நிலவி வரும் நிலையிலும் விவசாயிகள் தங்கள் போராட்டத்தை தொடர்ந்து 12-வது நாளாக நடத்தி வருகின்றனர்.

இந்நிலையில், இந்திய விவசாயிகளுக்கு ஆதரவாக லண்டனில் ஆயிரத்துக்கும் மேற்பட்டோர் போராட்டத்தில் ஈடுபட்டனர்.

லண்டனில் உள்ள இந்திய உயர் மட்டக் குழு அலுவலகம் முன் திடீர் போராட்டத்தில் ஈடுபட்ட அவர்கள், "விவசாயிகளுக்கு நாங்கள் இருக்கிறோம்" என்று கோஷமிட்டவாறு ஆர்ப்பாட்டம் நடத்தினர். பின்னர் லண்டன் போலீசார் போராட்டக்காரர்களைக் கலைத்தனர்.

மேலும் 30-க்கு மேற்பட்டவர்கள் ஒரு இடத்தில் கூடினால் அபராதம் விதிக்கப்படும் என போலீசார் எச்சரிக்கை விடுத்தனர்.

இதனையடுத்து, இங்கிலாந்தில் உள்ள பல்வேறு கட்சிகளைச் சேர்ந்த 36 எம்.பிக்கள் இந்திய வம்சாவளி எம்.பிக்கள் உள்ளிட்டோர் இங்கிலாந்தின் வெளியுறவு செயலாளர் டோமினிக் ராப் வசம் விவசாயிகள் பிரச்சினைகள் குறித்து கடிதம் எழுதினர்.

முன்னதாக கனடா பிரதமர் ஜஸ்டின் ட்ரூடோ இந்திய விவசாயிகளின் போராட்டத்திற்கு ஆதரவு தெரிவித்திருந்தார் என்பது  குறிப்பிடத்தக்கது!

வாஷிங்டன்: தெற்காசியாவின் பொருளாதார முன்னேற்றத்திற்கான ஒரு முக்கிய சக்தியாக இந்தியா இருப்பதாக அமெரிக்க பாதுகாப்புத்துறை தெரிவித்துள்ளது.

இதனை மேம்படுத்தும் வகையில், முக்கிய ராணுவத் தளவாடப் பொருள்களை 90 மில்லியன் டாலருக்கு இந்தியாவிற்கு விற்க ஒப்புதல் அளிக்கப்பட்டுள்ளதாக அமெரிக்க பாதுகாப்புத்துறை தெரிவித்துள்ளது.

இந்நடவடிக்கையின் மூலம் அமெரிக்க-இந்தியா உறவை வலுப்படுத்தவும், ஒரு பெரிய சக்தி மிக்க கூட்டாளியின் பாதுகாப்பை மேம்படுத்தவும் முடியும் என்று அமெரிக்க பாதுகாப்புத் துறையின் பாதுகாப்பு  ஒத்துழைப்பு நிறுவனம் (டி.எஸ்.சி.ஏ) தெரிவித்துள்ளது.

பீஜிங்: அமெரிக்கா, ரஷியா உள்ளிட்ட நாடுகளின் வரிசையில் சீனாவும் நிலவை ஆராய்ச்சி செய்வதில் தீவிர கவனம் செலுத்தி வருகிறது.

அந்த வகையில் 1976-ஆம் ஆண்டுக்குப் பிறகு முதல் முறையாக சீனா நிலவிலிருந்து பாறை துகள்களைப் பூமிக்கு எடுத்து வந்து ஆய்வு செய்ய உள்ளது.

இதற்காக சேஞ்ச் 5 என்கிற ஆளில்லா விண்கலத்தை கடந்த 24 ஆம் தேதி  சீனா விண்ணில் செலுத்தியது. அந்த நாட்டின் ஹனைன் மாகாணத்தில் உள்ள வென்சாங் ஏவுதளத்தில் இருந்து லாங் மார்ச் 5 ராக்கெட் மூலம் சேஞ்ச் 5 விண்கலம் நிலவுக்கு புறப்பட்டது. 

இந்த விண்கலம் நிலவில் திட்டமிட்டபடி தரையிறங்கியது. தரையிறங்கும் மேற்பரப்பில் தரையிறங்கும் காட்சி  படங்களையும் சீன அரசு  செய்தி நிறுவனம் வெளியிட்டுள்ளது.

இந்த விண்கலம் மூலம் நிலவில் இதுவரை கால் பதிக்காத பகுதியான ‘ஓஷன் ஆப் ஸ்டார்ம்ஸ்’ என்ற பகுதியிலிருந்து 2 கிலோ பாறை துகள்ளை எடுக்க சீனா திட்டமிட்டுள்ளது.

சீனாவின் இந்தத் திட்டம் வெற்றிகரமாக அமைந்தால், அமெரிக்கா ரஷியாவிற்குப் பிறகு நிலவில் உள்ள பாறைகளை ஆராய்ச்சி செய்யும் 3-வது நாடு என்ற பெருமையை சீனா பெறும்!

வாஷிங்டன்: கொரோனா தொற்றைக் கட்டுப்படுத்த தடுப்பூசியை கண்டுபிடிக்கும் முயற்சியில், உலகின் பல்வேறு நாடுகள் ஈடுபட்டுள்ளன.

ரஷ்யா, அமெரிக்கா, சீனா, இங்கிலாந்து போன்ற நாடுகள் கொரோனா தடுப்பூசி கண்டுபிடிக்கும் போட்டியில் முன்னிலையில் உள்ளன.

அந்த வகையில் அமெரிக்காவின் மாடர்னா என்ற மருந்து நிறுவனம் கொரோனா தடுப்பூசியைத் தயாரித்துள்ளது. இந்தத் தடுப்பூசி மனிதர்களிடம் இறுதிகட்ட பரிசோதனையில் உள்ளது.

இந்த நிலையில், தங்களது தடுப்பூசி கொரோனா வைரஸ் பாதிப்பு மிகவும் தீவிரமாக உள்ள நபர்களிடம் 100 சதவிகிதம் செயல்திறன் கொண்டது என்பதை உறுதி செய்துள்ளதாக அந்த நிறுவனம் அறிவித்துள்ளது.

ஏற்கனவே ஜெர்மனியின் பயோன்டெக் நிறுவனத்துடன் இணைந்து கொரோனா தடுப்பூசியைத் தயாரித்துள்ள அமெரிக்காவின் பைசர் நிறுவனம், தங்களது தடுப்பூசி கொரோனாவை ஒழிப்பதில் 95 சதவீதம் திறன் வாய்ந்தது என அறிவித்து, அதை அவசர தேவைக்கு பயன்படுத்த அனுமதி கோரியிருப்பது குறிப்பிடத்தக்கது!

வெனிஸ்: அமெரிக்காவைத் தலைமையிடமாகக் கொண்டு ஐபோன்களைத் தயாரித்து வரும் ஆப்பிள் நிறுவனம், ஐபோன்கள் பற்றிய விளம்பரமொன்றில் 30 நிமிடங்கள் வரை நீருக்குள் மூழ்கினாலும் அவை பாதிக்கப்படாது என தெரிவித்தருந்தது.

ஆனால், இத்தாலி நாட்டின் ஏ.ஜி.சி.எம். என்ற ஒழுங்குமுறை ஆணையம், ஐபோன் பற்றிய தவறான விசயங்களை வாடிக்கையாளர்களுக்கு ஐபோன் நிறுவனம் அளித்துள்ளது எனக் கூறி, சுமார் 4 கோடியே 81 லட்சம் வெள்ளிக்கும் மேல் அபராதம் விதித்துள்ளது.

நீரால் பாதிப்பு ஏற்படாது என்பது பற்றி ஆப்பிள் நிறுவனம் கூறும் விசயங்களில் வெளிப்படைத் தன்மை இல்லை என குற்றச்சாட்டு எழுந்துள்ளது.

4 மீட்டர் ஆழத்தில் 30 நிமிடங்கள் வரை நீருக்குள் மூழ்கினால் பாதிப்பு இல்லை என நிறுவனம் கூறியுள்ளது.  ஆனால், ஆய்வகப் பரிசோதனையில் தூய தண்ணீரில் மட்டுமே இது சாத்தியம் என்றும் கூறப்படுகிறது.

இதேபோன்று, ஐபோன்கள் நீரால் பாதிக்கப்படாது என விளம்பரப்படுத்தி விட்டு, நீரால் பாதிப்பு ஏற்பட்டால் அது உத்தரவாதத்தின் ஒரு பகுதியில் வராது என கூறுவதும் மோசடியானது என்ற விமர்சனமும் முன்வைக்கப்படுகிறது.

இதுபோன்று இத்தாலிய அமைப்பு அபராதம் விதிப்பது இது முதன்முறையல்ல.  போனின் பேட்டரி பற்றிய தகவல்கள் உள்பட வாடிக்கையாளர்களுக்குத் தேவையான தகவல்களைப் பகிர்ந்து கொள்ளாதது போன்ற விசயங்களுக்காகக் கடந்த காலங்களிலும் ஆப்பிள் நிறுவனத்திற்கு அபராதம் விதித்துள்ளது.

எனினும், இந்தத் தொகை மிகக் குறைவானது என்றும் கூறப்படுகிறது.  ஏனெனில் சமீபத்தில் அமெரிக்காவிலும் பேட்டரி விவகாரத்தில் சமரசம் செய்து கொள்ள பல கோடி மதிப்பிலான தொகையை வழங்க அந்நிறுவனம் முன்வந்தது!

 

வாஷிங்டன்: அமெரிக்க அதிபராகத் தேர்வு செய்யப்பட்டுள்ள ஜோ பைடன் நேற்று முன் தினம் இரவு தன் இரு நாய்களில் ஒன்றான மேஜருடன் விளையாடும்போது, அவருக்கு காயம் ஏற்பட்டுள்ளது.

இதையடுத்து ஞாயிற்றுக்கிழமை பிற்பகல் டெலாவேரின் நெவார்க்கிலுள்ள எலும்பியல் நிபுணரைச் சந்தித்ததாக அவரது அலுவலகத் தரப்பில் தெரிவிக்கப்பட்டுள்ளது. 

ஜோ பைடனுக்கு சுமார் இரண்டு மணி நேரத்திற்கும் மேலாக பரிசோதனை நடத்தப்பட்டதாக கூறப்படுகிறது.

அவரது வலது காலின் நடுவில் இரண்டு சிறிய எலும்புகளில் முறிவு ஏற்பட்டுள்ளதால் சில வாரங்களுக்கு அவருக்கு நடைப்பயிற்சி தேவைப்படும் என்றும், சிறப்புக் காலணி  அணிய வேண்டுமெனவும் டாக்டர் ஓ கானர் தெரிவித்தார்!

சியோல்:ஆசிய நாடுகளில் கடந்த அக்டோபர் மாதம் இறுதியில் பறவை காய்ச்சல் ஏற்பட்டது.  எச்5என்8 புளூ காய்ச்சலால் பறவைகள் பாதிக்கப்பட்ட சம்பவங்கள் நடந்தன.  கடந்த 2018-ஆம் ஆண்டுக்குப் பின் முதல் பறவை காய்ச்சலாக இது அறியப்பட்டது.

இந்தச் சூழலில் தென்கொரியா நாட்டின் தென்மேற்கே அமைந்த ஜியோன்புக் மாகாணத்தில் உள்ள வாத்து பண்ணை ஒன்றில் இந்த ஆண்டில் முதன்முறையாக எச்5என்8 பறவை காய்ச்சல் ஏற்பட்டுள்ளது.

இதனை அந்நாட்டிற்கான உணவு, விவசாயம், வனம் மற்றும் மீன்வள அமைச்சகம் உறுதிப்படுத்தியுள்ளது.

இதனைத் தொடர்ந்து காய்ச்சல் மற்ற பறவைகளுக்குப் பரவி விடாமல் இருப்பதற்காக, அந்தப் பண்ணையில் இருந்த 19 ஆயிரம் வாத்துகளும் அழிக்கப்பட்டன.

இந்தப் பண்ணையைச் சுற்றி 3 கி.மீ. தொலைவில் 6 கோழிப்பண்ணைகளும் உள்ளன.  இதனால் அடுத்த 48 மணிநேரத்திற்கு நாடு முழுவதும் பண்ணை பொருட்களைக் கொண்டு செல்வதற்கு தடை விதிக்கப்பட்டுள்ளது.

முன்னெச்சரிக்கை நடவடிக்கையாக, பறவை காய்ச்சல் கண்டறியப்பட்ட வாத்துப் பண்ணையைச் சுற்றியுள்ள 3 கி.மீ. தொலைவிற்குள் உள்ள 3.92 லட்சம் கோழிக் குஞ்சுகள் மற்றும் வாத்துகளை அழிக்க அரசு முடிவு செய்துள்ளதாக அந்நாட்டு ஊடகங்கள் தெரிவித்துள்ளன!