loader

All News


இரண்டாம் முறையாக இத்தாலி யூரோ சாம்பியன் ஆகியுள்ளது. 1966- உலகக் கோப்பை வெற்றிக்குப் பிறகு ஒரு பெரிய கோப்பையை வெல்லும் இங்கிலாந்தின் கனவும் இத்தனை போட்டிகளில் மேற்கொண்ட கடின உழைப்பும் வீணாகின. முழு நேர ஆட்டம் கூடுதல் நேரத்துக்குச் சென்றும் 1-1 என்ற இழுபறியிலிருந்து மீள முடியாமல் ஆட்டம் பெனால்டி ஷூட் அவுட்டுக்குச் சென்றது.

ஆட்டம் தொடங்கிய 2-வது நிமிடத்தில் இங்கிலாந்தின் லூக் ஷா தொடக்கத்தை அளித்தார். அவர் அடித்த பிரமாதமான ஷாட் கோலானது இங்கிலாந்து 1-0 என்று முன்னிலை பெற்றது. முதல் பாதியில் இத்தாலியினால் கோலை திருப்பி அடிக்க முடியவில்லை. இடைவேளைக்குப் பிறகு ஆட்டத்தை உக்கிரப்படுத்தியது இத்தாலி,இதனையடுத்து 67வது நிமிடத்தில் போனுக்கி ஒரு கோலை அடித்து சமன் செய்தார். கூடுதல் நேரத்திலும் 1-1 இழுபறி முடியவில்லை என்பதால் பெனால்டி ஷூட் அவுட் முறையில் வெற்றி தீர்மானிக்கப்பட்டது.

1976-ல் செக்கோஸ்லாவாகியா ஜெர்மனியை பெனால்டி ஷூட் அவுட்டில் வீழ்த்திய பிறகு யூரோ கோப்பை இறுதி பெனால்டி முறையில் தீர்மானிக்கப்பட்டது. 2000 மற்றும் 2012ம் ஆண்டு யூரோ கோப்பை இறுதிப் போட்டியில் தோல்விகளைச் சந்தித்த இத்தாலி, இந்த முறை வெற்றியைத் தக்க வைத்து சாதனைப் படைத்துவிட்டது,!

லண்டன்: இங்கிலாந்தில் நடைபெற்று வரும் யூரோ கோப்பை கால்பந்து சாம்பியன்ஷிப் போட்டியில், கடந்த 29 -ஆம் தேதி முன்னாள் சாம்பியன் ஜெர்மனி அணியுடன் இங்கிலாந்து அணி மோதியது. பரம எதிரிகள் மோதிய இந்த ஆட்டத்தில் இரு அணியினரும் நீயா-நானா என்று வரிந்து கட்டி நின்றனர்.

இதில் உள்ளூர் ரசிகர்களின் அமோக ஆதரவுடன் ஆக்ரோஷமாக செயல்பட்ட இங்கிலாந்து அணியினர், ஜெர்மனியின் தடுப்பு கோட்டையைத் தகர்த்தனர். ஆட்டத்தின் முடிவில் இங்கிலாந்து அணி 2-0 என்ற கோல் கணக்கில் ஜெர்மனியை வீழ்த்தி கால்இறுதிக்குள் நுழைந்தது. நாக்-அவுட் சுற்றில் ஜெர்மனியை இங்கிலாந்து அணி வீழ்த்துவது 1966-ம் ஆண்டுக்கு பிறகு இதுவே முதல்நிகழ்வாகும்.

இந்த நிலையில் போட்டியை நேரில் காண வந்த ஜெர்மனியைச் சேர்ந்த சிறுமி ஒருவர், ஜென்மன் அணி தோல்வி அடைந்ததால் கண்ணீர் விட்டுக் கதறி அழுதார். இது ஸ்டேடியத்தில் உள்ள திரைகளிலும் ஒளிபரப்பானது. இதைப் பார்த்த இங்கிலாந்து ரசிகர்கள் இணையத்தில் அதனைக் கிண்டல் செய்து பதிவிட்டனர்.

இணையத்தில் இந்த சம்பவம் வைரலாகப் பரவிய நிலையில், அந்த சிறுமிக்கு ஆதரவு தெரிவித்து இங்கிலாந்து கால்பந்து ரசிகர்கள் பலர் கருத்து பதிவிட தொடங்கினர். இதனால் இணையத்தில் கருத்து மோதல்கள் உருவானது. இதற்கிடையில் அந்த சிறுமிக்கு ஆதரவு தெரிவிக்கும் வகையில் இங்கிலாந்தைச் சேர்ந்த ஜோயல் ஹுயுக்ஸ் என்பவர் 50,000 பவுண்டுகளை இலக்காக வைத்து ஆன்லைனில் நிதி திரட்ட ஆரம்பித்தார்.

ஆனால் அவர் எதிர்பார்த்ததை விட அந்த சிறுமிக்கு ஏராளமானோர் ஆதரவு தெரிவித்தனர். இதன் மூலம் தற்போது வரை அந்த சிறுமிக்காக 28,500 பவுண்டுகள் நிதி திரட்டப்பட்டுள்ளது. இது குறித்து ஜோயல் ஹுயுக்ஸ் கூறுகையில், இங்கிலாந்தில் உள்ளவர்கள் அனைவரும் மோசமானவர்கள் இல்லை என்று அந்த சிறுமி தெரிந்து கொள்ள இது உதவியாக இருக்கும் என்று தெரிவித்துள்ளார்!

உலகப் புகழ்பெற்ற கால்பந்தாட்ட வீரரான லியோனல் மெஸ்ஸி தற்போது விளையாடும் பார்சிலோனா கிளப் அணியில் இருந்து விலகவுள்ளதாக தகவல் வெளியாகியுள்ளது.

அர்ஜெண்ட்டினா நாட்டின் கால்பந்து அணியின் கேப்டன் லியோனல் மெஸ்ஸி. இவர் கடந்த 20 ஆண்டுகளாக பார்சிலோனா கிளப் அணிக்காக விளையாடி வருகிறார். 

இதற்கிடையில் தற்போது நடைபெற்று வரும் சாம்பியன்ஸ் லீக் தொடரின் காலிறுதிப் போட்டியில் பார்சிலோனா அணி பெய்ரன் முனிச் அணியிடம் 8-2 என்ற கோல் கணக்கில் படுதோல்வியடைந்தது. இந்தத் தோல்வி மெஸ்ஸியை பெரிதும் பாதித்ததாக கூறப்படுகிறது.

இதன்காரணமாக பார்சிலோனா அணி நிர்வாகத்துக்கு மெஸ்ஸி கடிதம் எழுதியுள்ளாராம்.

அந்தக் கடிதத்தில் அணியிலிருந்து விலக விரும்புவதாக தெரிவித்துள்ளதாகக் கூறப்படுகிறது.  மெஸ்ஸியின் ஆட்டத்தால் பார்சிலோனா அணி 10 முறை சாம்பியன்ஸ் லீக் கோப்பையை வென்றுள்ளது. கடந்த 2007-க்குப் பிறகு சாம்பியன்ஸ் லீக் போட்டியில் பார்சிலோனா அணி இம்முறை படுதோல்வியைச் சந்தித்துள்ளது குறிப்பிடத்தக்கது!

செர்டாங், பிப். 1-

கேப்டன் செல்வக்குமார் ஆதரவில், மாபெரும் பெனால்டி கிக் போட்டி செர்டாங்கில் நாளை நடைபெறவுள்ளது.

செர்டாங் இளையோர் சமூக நல இயக்கத்தின் ஏற்பாட்டில், 3-வது ஆண்டாக நடைபெறும் இப்போட்டி, செர்டாங் மார்டி மைதானத்தில் நடைபெறுகிறது. இப்போட்டியில் 64 குழுக்கள் களமிறங்கவுள்ளன.

பெனாராஜு இன்சான் (PENARAJU INSAN) இயக்கத்தின் தலைவர் கேப்டன் செல்வக்குமார் ஆதரவில் இந்த பெனால்டி கிக் போட்டி நடைபெறவுள்ளது.

இப்போட்டியின் மொத்தப் பரிசுத் தொகையாக 7,500 வெள்ளியை கேப்டன் செல்வக்குமார் வழங்கியுள்ளதாக செர்டாங் இளையோர் சமூக நல இயக்கத்தின் தலைவர் கமல்நாத் முனியாண்டி கூறினார்.

இப்போட்டியில் வெற்றி பெறும் முதல் அணியினருக்கு 4,000 வெள்ளியும், வெற்றிக் கிண்ணமும் பரிசாக வழங்கப்படவுள்ளது.

இரண்டாவது இடத்தைப் பிடிக்கும் அணிக்கு 2,000 வெள்ளியும், மூன்றாவது இடத்தைப் பிடிக்கும் அணிக்கு 1,000 வெள்ளியும், நான்காவது இடத்தைப் பிடிக்கும் அணிக்கு 500 வெள்ளியும் பரிசாக வழங்கப்படவுள்ளது.

இளையோர்களிடையே ஒற்றுமையை ஏற்படுத்தும் நோக்கில் இந்த பெனால்டி கிக் போட்டி ஏற்பாடு செய்யப்பட்டுள்ளதாகவும்,
இப்போட்டியில் ஒவ்வொரு ஆண்டும் அதிகமான குழுக்கள் பங்கேற்பதுதான் தங்களுக்குக் கிடைத்த வெற்றி என்றும்,
அதே வேளையில் இப்போட்டியின் வாயிலாகக் கிடைக்கும் பணத்தில், செர்டாங் தமிழ்ப்பள்ளி மாணவர்களுக்குப் புத்தகங்கள் வழங்கப்பட உள்ளதாகவும் கமல்நாத் முனியாண்டி கூறினார்.

இந்திய இளைஞர்கள் விளையாட்டுத் துறையில் சாதிக்க வேண்டும். இதன் அடிப்படையில் இப்போட்டிக்கு பெனாராஜு இன்சான் இயக்கம்  முழு ஆதரவை வழங்கியுள்ளது.

வரும் காலங்களில் இளையோரை மேம்படுத்தும் திட்டங்களையும் மேற்கொள்ள சங்கம் இலக்கு கொண்டுள்ளதாக அதன் தலைவர் கேப்டன் செல்வக்குமார் கூறினார்!

கோலாலம்பூர் அக்டோபர்- 20

முதல்முறையாக நடத்தப்படும் டத்தோ ஸ்ரீ புலேந்திரன் கிண்ண 'பெனால்ட்டி கிக்' போட்டி இன்று தலைநகரில் தொடங்கியது.

ஜொகூர், சிலாங்கூர், பேராக் இன்னும் பல மாநிலங்களில் இருந்து 48 குழுக்கள் இந்தப் போட்டியில் பங்கேற்றனர். பத்து தொகுதியில் இருந்து செந்தூல் கிளப் அணி, ம.இ.கா வின் நிர்வாகச் செயலாளர் ஏ.கே ராமலிங்கம் தலைமையிலும், ம.இ.கா தேசிய இளைஞர் பிரிவு அணி, ம.இ.கா இளைஞர் அணியின் விளையாட்டுப் பிரிவு பொறுப்பாளர் அன்ட்ரூ தலைமையிலும் இப்போட்டியில் கலந்துகொண்டனர்.

இப்போட்டியை டத்தோ ஸ்ரீ புலேந்திரன் இன்று காலையில் துவக்கிவைத்தார். அதன் பின் செய்தியாளர்களிடம் பேசிய அவர்,  எந்த ஒரு தப்பான வழிக்கும் செல்லாமல் நமது இந்திய இளைஞர்கள் ஒற்றுமையாக விளையாட்டுப் போட்டிகள் போன்ற ஆரோக்கியமான  நடவடிக்கைகளில் ஈடுபடவேண்டும் என்பதற்காகவும், நமது இளைஞர்கள் தங்களின் திறமைகளை வெளிப்படுத்துவதற்கு ஒரு வாய்ப்பாகவும் இப்படிப்பட்ட விளையாட்டுப் போட்டிகளை நடத்துவதாக அவர் தெரிவித்தார்.

டத்தோ ஸ்ரீ புலேந்திரன் கிண்ணத்தை தட்டிசெல்லும் அணிக்கு 3000 வெள்ளி ரொக்கமும், 2-ஆம் நிலை அணிக்கு 2000 வெள்ளியும், 3-ஆம், 4-ஆம் நிலை அணிக்கு தலா 1000 வெள்ளி ரொக்கப் பணமும் பரிசாக வழங்கப்படும் என டத்தோ ஸ்ரீ புலேந்திரன் தெரிவித்தார்!

பேட்மிண்டன் உலக சாம்பியன்ஷிப் போட்டியில் தங்கப் பதக்கம் வென்ற முதல் இந்தியர் என்ற சாதனையைப் படைத்தார் இந்திய வீராங்கனை பி.வி.சிந்து.

தற்போது சுவிட்சர்லாந்தில் உலக சாம்பியன்ஷிப் பேட்மிண்டன் போட்டிகள் நடைபெற்று வருகின்றன. இதில் கடந்த இரண்டு ஆண்டுகளாக 2017, 18 களில் இறுதிப் போட்டிக்கு பி.வி.சிந்து முன்னேறியும் வெற்றிபெறவில்லை. மூன்றாவது முறையாக இந்த ஆண்டும், அரையிறுதியில் சீனாவின் சென் யூவுடன் மோதிய சிந்து, 21-7, 21-14 என்ற செட் கணக்கில் அவரை வீழ்த்தி இறுதிச் சுற்றுக்கு முன்னேறினார்.

இதனையடுத்து, ஜப்பானைச் சேர்ந்த நசோமி ஒகுஹாராவை 21-7, 21-7 என்ற கணக்கில் வீழ்த்தி உலக பேட்மிண்டன் சாம்பியன்ஷிப் போட்டியில் தனது முதல் தங்கப் பதக்கத்தை வென்றுள்ளார் இந்திய வீராங்கனை பி.வி. சிந்து.

இதன் மூலம், உலக பேட்மிண்டன் சாம்பியன்ஷிப் போட்டியில் தங்கம் வென்ற முதல் இந்திய வீராங்கனை என்ற சிறப்பைப் பெற்றுள்ளார் பி.வி. சிந்து.

2016-ஆம் ஆண்டு ரியோ ஒலிம்பிக் பேட்மிண்டன் மகளிர் ஒற்றையர் இறுதிப் போட்டியில் உலகின் முன்னிலை ஆட்டக்காரரும் ஸ்பெயின் வீராங்கனையுமான கரோலின் மெரினுக்கு எதிராக 3 செட்களில் இறுதி வரை போராடிய  பி.வி.சிந்து இறுதியில் வெள்ளிப்பதக்கம் வென்று வரலாற்று சாதனை படைத்திருந்தார்.
சிந்துவின் இந்த வெற்றிக்கு பிரதமர் மோடி உட்பட பல முக்கிய தலைவர்கள் தங்கள் வாழ்த்துகளைத் தெரிவித்துள்ளனர்!

கோலாலம்பூர் ஆகஸ்ட்- 9

 

மலேசிய இந்திய  விளையாட்டு கலாச்சார அறவாரியம் (எம்.ஐ.எஸ்.சி.எஃப்) மற்றும் ம.இ.கா தேசிய இளைஞர் பிரிவின் விளையாட்டுப் பகுதி இணை ஏற்பாட்டில், ஆசியா எறி பந்து ஃபெடரேஷன் ஒருங்கிணைப்பில், நாளை (10.8.2019) சனிக்கிழமை, சுபாங் ஜெயா  ஸ்டேடியம் 3k அரங்கில் இந்தியா - மலேசியா எறிபந்து விளையாட்டுப் போட்டி நடைபெறவிருப்பதாக எம்.ஐ.எஸ் சி.எஃப் தலைவரும், ம.இ.காவின் தேசிய உதவித் தலைவருமான டத்தோ டி. மோகன் தெரிவித்தார்.

 

ஆசியா எறிபந்து ஃபெடரேஷன் செயலாளர் டாக்டர் எஸ்.மணி தலைமையில், இந்தியாவில் இருந்து பெண்கள் அணி இப்போட்டியில் கலந்துகொள்கிறார்கள். அந்த ஃபெடரேஷன் குழுவின் பயிற்றுனர்கள் குழு, இங்குத் தேர்ந்தெடுக்கப்பட்ட இரு பெண்கள் அணிகளுக்குப் பயிற்சி வழங்கியுள்ள நிலையில், நாளை இந்திய அணியுடன், மலேசிய அணி விளையாடவிருப்பதாக  டத்தோ டி.மோகன் தெரிவித்தார்.

 

பெண்களுக்காக  அறிமுகம் செய்யப்பட்ட  இந்த விளையாட்டில், இப்போது ஆண்கள் - பெண்கள் என இரு பிரிவு உள்ளது. ஆசியாவைப் பொறுத்தவரை 9 நாடுகள் இந்த விளையாட்டுப் போட்டிகளை நடத்துவதாகவும், 10-வது நாடாக மலேசியா தற்போது இணைந்துள்ளதாகவும் டத்தோ டி.மோகன் தெரிவித்தார். வரும் காலத்தில் ஆசிய போட்டிகளில் இணைக்கும் முயற்சியையும் இந்த ஃபெடரேஷன் மேற்கொண்டு வருவதாக அவர் குறிப்பிட்டார்.

 

இந்த  விளையாட்டுப் போட்டிக்கு பிறகு,  ம.இ.கா இளைஞர் பிரிவின் முயற்சியில், மலேசியாவில் சில  பயிற்றுனர்களுக்குப் பயிற்சி வழங்கி, மாநில ரீதியில் இளைஞர்களுக்கு ஓராண்டு காலம் எறிபந்து பயிற்சிகள் வழங்கும் முயற்சிகள் மேற்கொள்ளப்படும். அதன் பின் எம்.ஐ.எஸ்.சி.எஃப்  தலைமையில், மாநில ரீதியிலும் தேசிய ரீதியிலும் போட்டிகளை நடத்தி, தேசிய ரீதியில் வெற்றி பெறும் அணியை மலேசியாவைப் பிரதிநிதித்து எறிபந்து போட்டிகளுக்கு அனுப்பி வைப்போம் என டத்தோ டி. மோகன் கூறினார். அதன் முதல் படியாக இந்த  ஆட்டம் அமையும் என அவர் தெரிவித்தார். விளையாட்டில் ஆர்வம் உள்ள இளைஞர்கள், நாளை நடக்கும் ஆட்டத்தைக் காண அழைக்கப்படுவதாகவும் அவர் கேட்டுக்கொண்டார்!

 

(வெற்றி விக்டர்)

கோலாலம்பூர் ஜுலை 22-

கோல்ஃப் விளையாட்டு என்பது வசதியானவர்கள், பணக்காரர்களுக்கான விளையாட்டு என்ற கண்ணோட்டம்  பலருக்கும் உண்டு. ஆனால், கோல்ஃப் விளையாட்டிற்கு வசதியும், பணமும் மட்டுமே தகுதி அல்ல, அதற்கான ஆர்வமும் திறமையும் இருந்தாலே, கோல்ஃப் விளையாட்டில் நாமும் கொடி நாட்டலாம் எனச் சொல்ல வைத்திருக்கிறார், நம் இந்திய சமுதாயத்தின் எளிய பிள்ளையான டர்ஷன் குணசேகரன்.

18 வயதான டர்ஷன், 8 வயதில் இருந்து கோல்ஃப் விளையாடுகிறார். இவருடைய சாதனைகளைப் பார்ப்பதற்கு முன், இவர் எப்படி கோல்ஃப் விளையாட்டு உலகத்திற்குள் நுழைந்தார் என்பதை,  அவருடைய தந்தை குணசேகரன் கூறுகிறார்... கேட்போம்.

என் மகனுக்குச் சிறு வயதில் தாழ்வு மனப்பான்மை இருப்பதை நான் உணர்ந்தேன். நான் ஒரு கோல்ஃப் விரும்பி. என் மகனையும் நான் கோல்ஃப் விளையாட அழைத்துச் செல்வேன். அங்குப் பல சமூகப் பிள்ளைகளுடன் பழகவிட்டேன். அவனுடைய குணாதிசியங்களில் மாற்றம் வந்தது. என் பிள்ளைக்கு அவன் மீதே ஒரு நம்பிக்கை பிறந்தது; அது எனக்குப் பிடித்தது. பிறகு மிகவும் ஆர்வத்துடன் கோல்ஃப் பயிற்சி பெற்று நல்ல ஒரு ஆட்டத்தை வெளிப்படுத்தினார் டர்ஷன்.

அதன் பின் கோல்ஃப் துறையில் மிகுந்த ஈடுபாட்டுடன் பல போட்டிகளில் கலந்துகொண்டு, பல சிறப்பான விளையாட்டை வெளிப்படுத்தி பதக்கங்களை வென்றார்.

சிலர் சொல்வதுபோல் இது வசதியானவர்களுக்கான விளையாட்டு அல்ல. விளையாட்டுத் திறமையோடு ஒருவரின் குணாதிசியங்கள்,  சிந்தனைகள், சுயநம்பிக்கையை வளர்க்கக் கூடிய ஒரு விளையாட்டு என்கிறார் டர்ஷனின் தந்தை குணசேகரன்.

கடந்த ஆண்டு அனைத்து நிலை சாம்பியன் போட்டியில் வெற்றிபெற்ற டர்ஷன்,

எம் .எஸ்.எஸ்.எம் பள்ளிகளுக்கான போட்டியில் சிலாங்கூர் மாநிலத்தைப் பிரதிநிதித்து பல முறை வெற்றியாளராக  வலம்வந்துள்ளார். மேலும், தனியார் பெறுநிறுவனங்கள் நடத்திய கோல்ஃப் போட்டிகளிலும் கலந்து வெற்றி பெற்றுள்ளார்.

கோல்ஃப் விளையாட்டு டர்ஷனுக்கு அமெரிக்காவில் ஒரு கல்வி வாய்ப்பையும் வழங்கியிருக்கிறது.

அமெரிக்காவில் உள்ள ஒக்லஹோமா பன்ஹாண்டின் ஸ்டேட் பல்கலைக்கழகம், நான்கு வருடம் கோல்ஃப் பயிற்சி எடுக்க டர்ஷனுக்கு முழு உதவித் தொகை வழங்கி, வாய்ப்பு வழங்கியுள்ளது. அதோடு அவர் 4 ஆண்டுகள்  உடலியல் கல்வியில் பட்டப் படிப்பு படிக்க, 60 சதவிகிதம் கல்வி உதவித் தொகை வாய்ப்பை டர்ஷனுக்கு வழங்கியுள்ளது.

இந்த வாய்ப்பு டர்ஷனுக்கு வீடு தேடி வரவில்லை. அவருடை சுய நம்பிக்கையால் கிடைத்த வாய்ப்பு.

அவருடைய கோல்ஃப் விளையாட்டு பயிற்றுனர்களில் ஒருவரான சுரேன்  என்பவர் கொடுத்த தகவலைக் கொண்டு இந்த வாய்ப்புக்கு விண்ணப்பம் செய்ததாகக் கூறுகிறார் டர்ஷன்.

இந்தக் கல்விக்கு விண்ணப்பிக்க பல ஆவணங்கள் சமர்பிக்கப்பட வேண்டும். கோல்ஃப் போட்டியில் அவர் அடைந்த அடைவு நிலை, கல்வித் தகுதி மற்றும் பல கேள்விகளுக்கு அவர் பதில் அளிக்க வேண்டும். அதன் பின்னர்தான் வாய்ப்பு தொடர்பான தகவல், விண்ணப்பித்தவர்களுக்குத்  தெரிவிக்கப்படும்.

அனைத்திலும் தகுதி பெற்று, வருகிற  ஆகஸ்ட் 14-ஆம் தேதி, டர்ஷன் அமெரிக்கா செல்லவுள்ளார். இவருடைய வெற்றிக்கு ஏணியாக இருந்த டர்ஷனின் கோல்ஃப் பயிற்றுனர்கள், நண்பர்கள், சகப் போட்டியாளர்கள் மற்றும் ஆலோசகர்கள் அனைவரையும் அழைத்து நன்றி சொல்லும் விதமாக, ஒரு விருந்து நிகழ்சியை ஏற்பாடுசெய்து, அவர்கள் ஆசிர்வாதத்துடன், அவர்கள் முன்னிலையில் டர்ஷன் தனக்குக் கிடைத்த வாய்ப்புக் கடித ஒப்பந்தத்தில் கையெழுத்திட்டார்.

டர்ஷனின் தந்தை ஒரு சரியான இலக்கை நோக்கித் தன் மகனைத் தயார் செய்துள்ளார்.

இந்த நேர்காணல் எதற்கு என்றால், வாய்ப்பு என்பது எல்லா இடத்திலும் உண்டு; அது அனைவருக்கும் பொதுவானது. இங்கு எதுவும் தனிக்குழுவிற்குச் சொந்தமானது அல்ல. முயற்சி ஒருவரை நிச்சயம் திறமைசாலி ஆக்கும்.  வாய்ப்பு ஒருவரை வெற்றியாளராக மிளிரச் செய்யும். கோல்ஃப் துறையில் இந்திய விளையாட்டாளர்கள் அதிகரிக்க வேண்டும், அதற்கு நாம்தான் முயற்சி எடுக்கவேண்டும்!

விளம்பரம்:

 

(மகேன் வித்யாசாகர்)

சுங்கைபூலோ ஜூலை 22-

இடைநிலைப்பள்ளி மாணவர்களுக்கான கால்பந்து, வலைப்பந்து போட்டிகளை 8 ஆண்டுகளாக கல்வி, சமூக மேம்பாட்டு அறவாரியம் (இ.டபள்யூ. ஆர்.எஃப்) நடத்திவரும் வேளையில், இம்முறை  ஆர்.ஆர்.ஐ தோட்டத் திடலில் நடத்தியது.

இடைநிலைப் பள்ளியில் பின் தங்கிய மாணவர்களை ஒன்றுபடுத்தி, அவர்களுக்கு உரிய  பயிற்சிகள் வழங்கப்படுகிறது.

ஒவ்வொரு வாரமும் அம்மாணவர்களைச் சந்தித்து கருத்தரங்கு, கல்வி, விளையாட்டுப் பயிற்சிகளை இலவசமாக இவ்வறவாரியம்  வழங்கிவருகிறது.

அம்மாணவர்களுக்கிடையே கால்பந்து, கூடைப்பந்துப் போட்டிகள் பெரிய அளவில்  ஆண்டு தோறும் நடத்தப்படும். அந்த வகையில் இவ்வாண்டு நடத்தப்பட்ட போட்டியில்  நாடு தழுவிய அளவில் 400-க்கும் மேற்பட்ட மாணவர்கள் போட்டியில் பங்குகொண்டதாக கல்வி, சமூக அறவாரியத்தின் தலைவர்  நடராஜன் தெரிவித்தார்.

ஆண்கள்  கால்பந்து போட்டியிலும், பெண்கள் கூடைப்பந்து போட்டியிலும் கலந்துகொண்டு தங்களின் விளையாட்டுத் திறமையை வெளிப்படுத்தினர்.

பொதுவாக இப்போட்டியில் வெற்றி பெறும் மாணவர்களை அடுத்த நிலைக்குக் கொண்டு செல்ல முயற்சிகளை எடுத்து வருவதாகவும், இதற்கு முன் எங்கள் பயிற்சியில் ஈடுபட்டு சிறந்து விளையாடிய போட்டியாளர்கள்  மாநில அணிகளுக்கு விளையாடி வருவதாகவும் நடராஜன் தெரிவித்தார்.

இம்முறை நடத்தப்பட்ட போட்டியில் கால்பந்து விளையாட்டில்  சுபாங் யுனைட்டெட் அணியினர் வெற்றிபெற்ற நிலையில் இரண்டாவது இடத்தை இ.டபள்யூ. ஆர்.எஃப் மலேசிய அணியினரும், மூன்றாம் இடத்தை டிஎன் சூப்பர் ஸ்ட்ரைக்கர் அணியினரும், நான்காம் இடத்தை  காஜாங் தெர்மினேட்டர் அணியினரும் வாகை சூடினர்.

பெண்களுக்கான கூடைப்பந்து போட்டியில், பினாங்கு பிளாக்பேர்ல் அணியினர் வெற்றிபெற்ற நிலையில், இரண்டாம் இடத்தை  ஜெராய் என்சி அணியும், மூன்றாம் இடத்தை பினாங்கு ஒய்ட் பேர்ல் அணியும், நான்காம் இடத்தை லெம்பா பூஜாங்கும் பிடித்தனர்.

வெற்றிபெற்ற மாணவர்களுக்குத்  தலைவர் நடராஜன், முன்னாள் தலைவர் டத்தோ யோகேஸ்வரன், துணைத்தலைவர் கோவிந்தசாமி மற்றும் ஒருங்கிணைப்பாளர் ரவீந்திரன் ஆகியோர் பரிசுகளை எடுத்து வழங்கினர்!

விளம்பரம்:

ஷங்காய் ஜூன்16-

 

கலப்பு தற்காப்புக் கலை வீரர்களுக்கான ஒன் சாம்பியன்ஷிப் போட்டி நேற்று இரவு சீனாவின் ஷங்காய் நகரில் நடைபெற்றது.

 

இப்போட்டியில் மலேசிய இந்திய வீரரான அகிலன் தாணி ஜப்பானின் ஜாம்பவானான அகியாமாவை எதிர்த்துக் களமிறங்கினார்.

 

ஜப்பானின் வெட்ரன் வீரரான அகியாமா, கலப்பு தற்காப்புக் கலையில் முன்னணி வீரராகத் திகழ்பவர். பல போட்டிகளில் வெற்றிகளைக் குவித்தவர்.

 

43 வயதான அகியாமாவை எதிர்த்து, 23 வயது நிரம்பிய அகிலன் தாணி கலமிறங்குவது பலரது கவனத்தை ஈர்த்தது.

 

முதல் சுற்றில், பாயும் புலி போல் அகிலன் தாணி கிடைத்த வாய்ப்பைப் பயன்படுத்தி பல யுத்திகளுடன், அதிவேகமாகத் தாக்குதலை நடத்தினார். இருந்தபோதும், முதல் சுற்றில் அகியாமாவை அகிலனால் வீழ்த்த முடியவில்லை. இரண்டாம் சுற்றில் சற்றுத் தோய்வடைந்த அகிலன், அகியாமாவின் தாக்குதலுக்கு முட்டுக்கொடுக்கச் சிரமப்பட்டார். ஆனாலும், அகிலன் அகியாமாவிடம் வீழ்வில்லை.

 

மூன்றாம் சுற்றில் பல வித்தைகளைக் களமிறக்கி ஒரு வேங்கையாய் மாறி, தனது அதிரடி ஆட்டத்தை வெளிப்படுத்தினார் அகிலன் தாணி.

 

அகியாமாவிற்கும், அகிலன் தாணிக்கும் 20 வயது வித்தியாசம். எனவே, மூன்றாம் சுற்று இளைஞனுக்குச் சாதகமாக அமைந்தது. காரணம் 43 வயதான அகியாமா 3 வது சுற்றில் சற்றுச் சோர்வடைந்ததால், அகிலன் தனது நிலையை வலுப்பெறச் செய்தார்.

 

மூன்றாவது சுற்றில்,  2 சுற்று அபார ஆட்டத்தை வெளிப்படுத்திய  அகிலன் தாணியை, போட்டியின் மூன்று நடுவர்களும் ஏகமனதாக வெற்றியாளராக அறிவித்தனர்.

 

இதன் வழி புதிய சரித்திரத்தை ஷங்காயில்  பதித்துள்ளார் நம் மண்ணின் மைந்தன் அகிலன் தாணி!

கோலாலம்பூர் ஜூன் 13-

மலேசியப் பூப்பந்துத் துறையின் செல்லப்பிள்ளையும்,  நாடே தலையில் தூக்கி வைத்துக் கொண்டாடிய விளையாட்டு வீரருமான டத்தோ லீ சோங் வேய் இன்று தேசிய பூப்பந்து விளையாட்டுப் போட்டிகளில் இருந்து ஓய்வு பெறுவதாக அதிகாரப்பூர்வமாக அறிவித்துள்ளார்.

இளைஞர், விளையாட்டுத்துறை அமைச்சின் கட்டடத்தில் இன்று  நடைபெற்ற செய்தியாளர் சந்திப்பில் அவர் இந்த அறிவிப்பை வெளியிட்டார். அவருடன்  இளைஞர் விளையாட்டுத்துறை அமைச்சர்  சைட் சாடிக் பின் சைட் அப்தூல் ரஹ்மான் உடனிருந்தார்.

இதுநாள் தமக்கு ஆதரவு வழங்கிய இளைஞர் விளையாட்டுத் துறை அமைச்சுக்கும்,   பயிற்றுனர் மிஸ்புன் சீடேக் மற்றும்  எல்லா வகையிலும்  உதவியாக இருந்த தேசிய பூப்பந்து சங்கம் மற்றும் குழுவினருக்கும் நன்றி தெரிவித்துக் கொள்வதாக டத்தோ லீ சோங் வேய் தெரிவித்தார்.

“19 ஆண்டு காலமாக எனது ஆட்டத்தை ரசித்து வற்றாத ஆதரவை வழங்கி என்னைக் கொண்டாடிய மலேசிய ரசிகர்களுக்கு நன்றி” என கூறும் போது உணர்ச்சியைக் கட்டுப்படுத்த முடியாமல்  கண்ணீர் விட்டு அழுதார் டத்தோ லீ. உடனே அங்கிருந்தவர்கள் லீ சோங் வேய் என்றும் மலேசிய  பூப்பந்துத் துறையின் ‘கிங்’ என உற்சாகம் ஊட்டினர்.

19 ஆண்டுகளாகப் பூப்பந்துத் துறையில் தேசிய அணிக்காக விளையாடிய டத்தோ லீ சோங் வேய், 3 முறை ஒலிம்பிக் போட்டியில்  மலேசியாவுக்கு வெள்ளிப் பதக்கத்தை வென்று தந்தவர். பல போட்டிகளில் பங்குபெற்று பல முறை வெற்றியாளர் பட்டத்தை தக்க வைத்தவர். உலகப் பூப்பந்து விளையாட்டாளர்களின் தரவரிசையில் முதல் நிலை விளையாட்டாளர் எனும் மகுடத்திற்குச் சொந்தக்காரர். சில மாதங்களுக்கு முன் மூக்குப் புற்றுநோய் காரணமாக சிகிச்சைப் பெற்று ஓய்வில் இருந்த  டத்தோ லீ சோங் வேய், தற்போது மலேசியப் பூப்பந்துத் துறையில் இருந்து ஓய்வு பெறுகிறார்.

ஒலிம்பிக் விளையாட்டில் பூப்பந்து போட்டியில் டத்தோ லீ சோங் வேய் தங்கம் வெல்வார் என்பது மலேசிய ரசிகர்களின் கனவு. ஒலிம்பிக்கில் தங்கத்தைப் பெற்றுத் தரவேண்டும் என்பது  லீ சொங் வேய்யின் நீண்ட நாள் தவம். ஆனால் இன்று அவரின் அறிவிப்பு மலேசியப் பூப்பந்து ரசிகர்களுக்கு மிகப் பெரிய ஏமாற்றத்தைத் தந்துள்ளது!

கோலாலம்பூர் ஜூன் -3

ஐரோப்பிய சாம்பியன்ஸ் லீக் கிண்ணத்தை 6-வது முறையாகக் கடந்த ஞாயிற்றுக்கிழமை டோட்டன்ஹாமை 2-0 என்ற கோல் கணக்கில் வீழ்த்தி, லிவர்புல்  அணி வென்றது.

அந்த வெற்றியுடன் இன்று லிவர்புல் அணியின் 127-வது ஆண்டு நிறைவு நாளைக் கொண்டாடவுள்ள நிலையில், லிவர்புல் அணியின் சென்டர் மிட்ஃபிளர் ஆட்டக்கார் ஜோர்டன் ஹண்டர்சன்,  வெற்றிக் கோப்பை மீது கால்  வைத்து  விமானத்தில் அமர்ந்த படி இருக்கும் படம் சர்சையை ஏற்படுத்தியுள்ளது.

பொதுவாக மேற்கத்திய விளையாட்டாளர்கள்  தாங்கள் வென்றெடுத்த கோப்பைகள் மீது கால் வைத்துப் படம்பிடிப்பது வழங்கம்.

அது அவர்களுக்குப் பெரிதாகத் தெரியாது. ஆனால்  பல ரசிகர்கள் தங்கள் அணிக்கு  இந்தக் கோப்பை கிடைக்காதா என்று ஏங்கிவருகிறார்கள்.  அப்படி இருக்க,  6 முறை கோப்பையை வென்ற லிவர்புல், பல ஆண்டுகளாக இந்தக் கோப்பைக்காகக் காத்திருந்த லிவர்புல், அத்தகைய மாபெரும் கோப்பையை மதிக்கும் லட்சணம் இதுதானா? என்று சமூகவலைதளத்தில் பதிவு செய்து வருகிறார்கள் ரசிர்கள். இதனால்  சர்ச்சையில் சிக்கியுள்ளார் ஜோர்டன் ஹண்டர்சன்.

இப்படிபட்ட சம்பவங்கள் நடப்பது இது முதல் முறையல்ல. பல புகழ் பெற்ற ஆட்டக்காரர்கள் இப்படித் தாங்கள் வென்ற கோப்பை மீது கால் வைத்துப் படம்பிடித்துள்ளனர். அது மேற்கத்திய விளையாட்டாளர்களின் பாணி.

இருந்தாலும், இந்தக் கோப்பைக்கு மரியாதை கொடுக்கும்படி பல ரசிகர்கள் வேண்டுகோள் விடுத்துள்ளதோடு, தங்கள் அதிருப்தியையும் வெளியிட்டு வருகின்றனர்.

இனி இப்படிச் சம்பவம் நடக்காமல் விளையாட்டாளர்கள் பார்த்துக்கொள்வார்களா?

கோலாலம்பூர் ஜூன் 3-

ஜப்பான் ஜாம்பவான் என அழைக்கப்படும் அகியாமாவுடன் மலேசிய வீரர் அகிலன் தாணி மோதவிருப்பது உலக அரங்கில் பெரும் எதிர்பார்ப்பை ஏற்படுத்தியுள்ளது.

கலப்பு தற்காப்பு கலை வீரர்களுக்கான ஒன் சாம்பியன்ஷிப் போட்டி வரும் ஜூன் 15-ஆம் தேதி சீனாவின் ஷங்காய் நகரில் நடைபெறவுள்ளது.

இப்போட்டியில் மலேசிய இந்திய வீரரான அகிலன் தாணி களமிறங்கவுள்ளார். இவர் ஜப்பானின் ஜாம்பவான் வீரரான அகியாமாவை எதிர்த்துக் களமிறங்கவுள்ளார்.

ஜப்பானின்  அகியாமா கலப்பு தற்காப்புக் கலையில் முன்னணி வீரராகத் திகழ்பவர்

அதே வேளையில் பல போட்டிகளிலும் வெற்றிகளைக் குவித்துள்ளார்.

அவருடன் அகிலன் தாணி மோதுவது கலப்பு தற்காப்பு கலை போட்டியின் ரசிகர்களிடையே பெரும் எதிர்பார்ப்பை ஏற்படுத்தி உள்ளது.

மலேசிய வீரரான அகிலன் தாணி, பல முதன்மைப் போட்டிகளில் களமிறங்கி வெற்றிக்காகப் போராடி வெற்றியைப் பெற்றுள்ளார். அதே வேளையில், பல தோல்விகளையும் சந்தித்துள்ளார்.

தற்போது ஜப்பான் வீரர் அகியாமாவுடன் மோதுவது அவருக்குப் பெரும் சவாலை ஏற்படுத்தியுள்ளது.

இருந்த போதிலும் அந்தச் சவால்கள் அனைத்தையும் முறியடித்து வெற்றிக் கனியைப் பறிப்பேன் என்று அகிலன் தாணி செய்தியாளர்களிடம் கூறினார்.

இதற்காகப் பல மாதங்களாகக் கடுமையான பயிற்சியை மேற்கொண்டு வரும் அகிலன் தாணிக்கு பிரேசிலைச் சேர்ந்த பயிற்றுநர் பயிற்சி வழங்கி வருகிறார்.

அகியாமா ஜாம்பவான் வீரராகத் திகழ்ந்தாலும், அது குறித்து எந்தவொரு சிந்தனையும் எனது மனதில் இல்லை.

அவரும் ஒரு வீரர். அவரை வீழ்த்துவது எப்படி என்ற வியூகத்தை மட்டுமே சிந்தித்துக் கொண்டிருக்கிறேன் என்று அகிலன் தாணி கூறினார்!

(சசிதரன் தர்மலிங்கம்)

நெதர்லாந்து மே 9-

ஐரோப்பிய வெற்றியாளர்கள் லீக் கிண்ண இறுதி ஆட்டத்திற்கு நுழைய வாய்ப்பில்லை என்று எண்ணிக்கொண்டிருந்த லிவர்பூல் அணி, நேற்று அதிரடியாக பார்செலோனாவை வீழ்த்தி அந்தக் கனவை நிறைவேற்றியுள்ளது.

இன்று அதிகாலை அஜெக்ஸ் அரங்கில் நடந்த மற்றொரு அரை இறுதி ஆட்டத்தில் கனவா? இல்லை நிஜமா? என்று நினைக்கும் அளவிற்கு அபார ஆட்டத்தை வெளிப்படுத்தி 90-வது நிமிடம் வரை இறுதிச் சுற்றுக்கு செல்லும் வாய்ப்பு அஜெக்ஸ்  அணியிடம் இருந்தவேளை, அந்த இறுதி நிமிடம் செலுத்தப்பட்ட கோல் சரித்திரத்தை மாற்றி எழுதியது.

கடந்த வாரம் டோட்டன்ஹம் தனது சொந்த அரங்கில் அஜெக்ஸிடம் 1-0 என்று தோல்வி கண்ட நிலையில், இன்று அதிகாலை நடந்த 2-வது அரை இறுதி ஆட்டத்தில், 5-வது நிமிடம், 35-வது  நிமிடங்களில், அஜெக்ஸ் கோல்களைப் புகுத்தி  3-0 என்று தங்களது முன்னிலையை வலுவாக்கியது.

முதல் பாதி ஆட்டம் அஜெக்ஸ் வசம் இருந்தாலும், பிற்பாதி ஆட்டத்தின் போது டோட்டன்ஹம் ஆட்டக்காரர் லுகாஸ் மோரா 55 - 59-வது நிமிடங்களில் அடித்த கோல் டோட்டன்ஹம் ரசிகர்களை உற்சாகப்படுத்தியது.

2-2 என்ற நிலையில் அந்த ஆட்டம் சமநிலை கண்டாலும், தனது சொந்த அரங்கில் அஜெக்ஸுக்கு வெற்றியைத் தந்த அந்த ஒரு கோல், அவர்களை  முன்னிலையில் வைத்திருந்தது.

கடுமையான முயற்சிக்குப் பிறகு, ஆட்டம் முடிவடையச் சில நிமிடங்களே எஞ்சியுள்ள தருணத்தில், லுகாஸ் மோரா அடித்த அந்த முன்றாவது கோல், எதிரணி அரங்கில் டோட்டன்ஹமிற்கு வெற்றியைத் தந்தது .

இவ்விரு ஆட்டத்தை ஒப்பிடுகையில் 3-3 என்ற கோல் எண்ணிக்கையில், இரு அணிகளும் சமநிலை கண்ட வேளையில், எதிர் அணியின் அரங்கில் அதிகமான கோல்களைப் புகுத்திய டோட்டன்ஹம் இறுதிச் சுற்றுக்கும் தகுதி பெற்றது.

இம்முறை இங்கிலாந்தைச் சேர்ந்த இரு அணிகள் ஐரோப்பிய வெற்றியாளர்கள் லீக் கிண்ண இறுதிச் சுற்றுக்குத் தகுதி பெறுவதால், இம்முறை அக்கிண்ணம் இங்கிலாந்தை நோக்கிச் செல்கிறது என்பது உறுதியாகிறது.

கடும் போராட்டத்திற்குப் பிறகு இறுதி ஆட்டத்தில் சந்திக்க உள்ள லிவர்பூல் -டோட்டன்ஹம் ஆகிய இரு அணிகளும் ஒன்றுக்கு ஒன்று சளைத்தவர்கள் இல்லை என்பதால், வரும் ஜூன் 2-ஆம் தேதி அதிகாலையில் நடக்கவிருக்கும் இறுதி ஆட்டம், கடைசி நிமிட விசில் அடிக்கும் வரை சுவாரஸ்யமாகவும், கடுமையாகவும் இருக்கும் என்பது உறுதி. அந்தக் கடைசி நிமிட விசிலுக்காகக் காத்திருக்கிறார்கள் ரசிகர்கள், உற்சாகமாய்!